Հայաստանի առաջնության 17-րդ տուրից հետո «Շիրակը» մրցաշարային աղյուսակի 4-րդ տեղում է․ սա նշանակում է, որ գյումրեցիները, ըստ նոր ձևաչափի, պահպանում են մեդալների համար պայքարի հնարավորությունը։ Այս և այլ հարցերի մասին զրուցել ենք թիմի կիսապաշտպան Կարեն Մուրադյանի հետ։
Հիշեցնենք, որ կորոնավիրուսի համաճարակով պայմանավորված՝ Հայաստանի առաջնությունը, ինչպես և շատուշատ այլ մրցաշարեր, անժամանակ դադարեցված է։
-Ե՞րբ և ինչպե՞ս կշարունակվի Բարձրագույն խմբի առաջնությունը՝ ըստ քեզ։
-Սա շատ դժվար հարց է ոչ միայն մեր առաջնության, այլև բոլորի համար։ Ըստ իս՝ ամեն ինչ կախված է նրանից, թե իրավիճակն ինչպես կզարգանա։ Հիմա շատ դժվար կլինի ասել, թե ինչպես կլինի։ Հույս ունենանք, որ նոր դեպքերը կնվազեն ու շուտով կվերադառնանք մեր բնականոն կյանքին։
-Ինչպիսի՞ն է նոր ձևաչափը քո կարծիքով։
-Ընդհանուր առմամբ, կարծում էի՝ այն ավելի մեծ հետաքրքրություն է հաղորդում առաջնությանն ու փոփոխությունը դրական էի գնահատում։ Բայց մյուս կողմից էլ տեսանք, որ մեր առաջնությունը դեռ այդքան էլ կայուն չէ, նկատի ունեմ «Երևանի»՝ մրցաշարից դուրս գալը։ Փաստորեն, վեցնյակից դուրս մնացած թիմերն ուղղակի ընկերական խաղեր են անցկացնելու։ Կարծում եմ՝ այդ ձևաչափն օպտիմալ է 12 թիմով առաջնություն ունենալու դեպքում։ Կամ որպեսզի առաջնությունն ավելի հետաքրքիր լինի, կարելի է բացի նրանից, որ մի թիմ դուրս է մնում, մտցնել նաև անցումային խաղ, որտեղ կմրցեն Բարձրագույն խմբի նախավերջին ու Առաջին խմբի երկրորդ տեղի թիմերը ու վերջինս, հաղթելու դեպքում, կտեղափոխվի ԲԽ։ Դա ընդունված պրակտիկա է շատ երկրների առաջնություններում։
-Ձեր թիմը 4-րդ տեղում է ընթանում՝ հետ մնալով «Արարատ-Արմենիայից», «Ալաշկերտից» ու «Լոռիից» ու կիսելով միավորները «Արարատի» հետ։ Ի՞նչ շանսեր ես տեսնում ձեր թիմի համար։
-Ունենք լավ թիմ։ Պայքարելու ենք բարձր տեղերի համար։ Շանսերը բոլորի համար հավասար եմ գնահատում, տեսնում եք՝ մրցաշարային աղյուսակում թիմերն իրար որքան մոտ են դասավորված։
-Մարզումները դադարեցվելուն զուգահեռ տնային առաջադրանքներ ստացե՞լ էիք։
-Այո՛։ Ամեն օր մարզումային ծրագիր ենք ստանում ակումբից։ Աշխատում ենք պահպանել մարզավիճակը, ամբողջությամբ չենք կտրվել ֆուտբոլից։
Ստելլա Բաբլոյան