Անգլիայի Պրեմիեր լիգայի 2024/25 մրցաշրջանը կմեկնարկի արդեն այս շաբաթ՝ օգոստոսի 16-ին։ Առաջնությանը կմասնակցի 20 ակումբ։
Չեմպիոնշիփի նախորդ մրցաշրջանի արդյունքներով երեք թիմ նվաճել է ԱՊԼ-ի ուղեգիր։
Այս տարի «Լեսթերը» նվաճեց տիտղոս, այս անգամ՝ Չեմպիոնշիփում: «Աղվեսները» նախ ժամանակից շուտ երաշխավորեցին իրենց տեղն Անգլիայի Պրեմիեր լիգայում, իսկ հետո նաև դարձան Անգլիայի երկրորդ ուժեղագույն լիգայի չեմպիոններ:
«Լեսթերը» 8-րդ անգամ հաղթեց Չեմպիոնշիփը՝ շրջանցելով «Մանչեսթեր Սիթիին», որն այս մրցաշարում ունի 7 տիտղոս։
«Լեսթերի» ամենամեծ նվաճումը, դա Անգլիայի չեմպիոնի տիտղոսն է 2015/16 մրցաշրջանում։ Ակումբը նաև մեկ անգամ հաղթել է Անգլիայի գավաթը, երկու անգամ՝ Սուպերգավաթը, ևս երեք անգամ՝ Լիգայի գավաթը։
Ամռանը թիմի գլխավոր մարզչի պաշտոնը լքեց Էնցո Մարեսկան՝ տեղափոխվելով «Չելսի»։ Նրան փոխարինեց ուելսցի մասնագետ Սթիվ Քուփերը։
Հաղթելով Անգլիայի Չեմպիոնշիփի 46-րդ տուրի «Հադերսֆիլդի» հետ խաղում (2-0)՝ «Իպսվիչը» Անգլիայի Պրեմիեր լիգայի ուղեգիր ձեռք բերեց։ Այսպիսով, «Իպսվիչը» 22 տարի անց առաջին անգամ կխաղա Անգլիայի Պրեմիեր լիգայում։
Վերջին անգամ թիմն այս մրցաշարում հանդես են եկել 2001/2002 մրցաշրջանում։ Նախանցած մրցաշրջանում «Իպսվիչը» հանդես էր գալիս Անգլիայի երրորդ դիվիզիոնում՝ Առաջին լիգայում։ «Իպսվիչը», որը հիմնադրվել է 1878 թվականին, 1962 թվականի Անգլիայի առաջնության հաղթողն է։ Թիմը նաև մեկական անգամ դարձել է Անգլիայի գավաթի և ՈՒԵՖԱ-ի գավաթի հաղթող։
Թիմը գլխավորում է հյուսիսիռլանդացի Կիրան Մակքենան, ով ժամանակին աշխատել է ՄՅՈՒ-ի համակարգում։
Անգլիայի առաջնության երրորդ ուղեգիրը վիճարկվեց փլեյ-օֆֆում՝ «Լիդսի», «Սաութհեմփթոնի», «Վեստ Բրոմվիչի» և «Նորվիչի» միջև։ Արդյունքում՝ այն բաժին հասավ շոտլանդացի մասնագետ Ռասել Մարտինի գլխավորած «Սաութհեմփթոնին»։
«Սաութհեմփթոնն» ակումբի՝ մոտ 140 տարվա պատմության ընթացքում մեկ անգամ դարձել է Անգլիայի առաջնության փոխչեմպիոն, մեկ անգամ հաղթել է Անգլիայի գավաթը։
Վերջին 30 տարիների ընթացքում ակումբի ակադեմիան ֆուտբոլին տվել է այնպիսի աստղեր, ինչպիսիք են Ալան Շիրերը, Թիմ Ֆլաուերսը, Գարեթ Բեյլը և Մետյու Լե Տիսիեն։ Ակումբի այլ նշանավոր ֆուտբոլիստներից են նաև Ուեյն Բրիջը, Թեո Ուոլքոթը, Ալեքս Օքսլեյդ-Չեմբերլենը, Լյուկ Շոուն։
Կարդացեք նաև՝
Թոփ-5 լիգաների նորեկները․ Լիգա 1
Թոփ-5 լիգաների նորեկները․ Բունդեսլիգա
Թոփ-5 լիգաների նորեկները․ Լա լիգա
