ՊՍԺ-ն մտադիր է նոր պայմանագիր առաջարկել թիմի հարձակվող Կիլիան Մբապեին, որպեսզի պահի նրան մինչև Քաթարում կայանալիք աշխարհի 2022 թվականի առաջնությունը, հայտնում է Paris United-ը:
Մբապեի պայմանագիրն առաջնային է ՊՍԺ-ի նախագահ Նասեր Ալ-Խելայիֆիի և այն մարդկանց համար, ովքեր որոշումներ են կայացնում Դոհայում:
21-ամյա ֆրանսիացին ամռանը կդառնա փարիզյան թիմի միակ ֆուտբոլիստը, որը չի կարողանա հեռանալ: Ալ-Խելայիֆիի կարծիքով, թիմը պետք է կառուցվի հենց Մբապեի շուրջը: Եվրոպական մյուս խոշոր ակումբների` ներառյալ «Ռեալի», հետաքրքրությունից խուսափելու համար, ՊՍԺ-ն մտադիր է ֆուտբոլիստին այնպիսի աշխատավարձ առաջարկել, որ նախկինում երբևէ որևէ խաղացողի չի վճարել:
Այս առաջարկը կգերազանցի Նեյմարի աշխատավարձն ու Մբապեին կդարձնի ՊՍԺ-ի ամենաբարձր վարձատրվող ֆուտբոլիստը:
Ընթացիկ մրցաշրջանում Մբապեն ՊՍԺ-ի կազմում բոլոր մրցաշարերում 32 հանդիպման է մասնակցել և դարձել 30 գոլի ու 17 գոլային փոխանցման հեղինակ: Նրա գործող պայմանագիրը ՊՍԺ-ի հետ ուժի մեջ է մինչև 2022 թվականը:
