«Դինամո» մարզահամալիրի լեփ-լեցուն տրիբունաների ներքո այսօր կայացել են Հայաստանի բռնցքամարտի առաջնության եզրափակիչ մենամարտերը։ Տղամարդկանց13 և կանանց 3 քաշային կարգերում հայտնի են դարձել երկրի ուժեղագույն բռնցքամարտիկները։
48 կգ քաշային կարգում Հայաստանի չեմպիոնի կոչումը նվաճել է Բարեղամ Հարությունյանը, 51 կգ-ում` Ռուդոլֆ Գարբոյանը, 54 կգ-ում` Հենրիկ Սահակյանը, 57 կգ՝ քաշային կարգում` Արթուր Բազեյանը, 60 կգ քաշային կարգում՝ Արթուր Ղազարյանը, 63,5 կգ-ում՝ Արթուր Շախպազյանը, 67 կգ քաշային կարգում՝ Արարատ Հարությունյանը, 71 կգ քաշային կարգում՝ Զավեն Գալստյանը, 75 կգ քաշային կարգում՝ Վախթանգ Հարությունյանը, 80 կգ քաշային կարգում՝ Համբարձում Հակոբյանը, 86 կգ քաշային կարգում՝ Ռաֆայել Հովհաննիսյանը, 92 կգ քաշային կարգում՝ Անուշավան Մխիթարյանը, +92 կգ քաշային կարգում՝ Դավիթ Չալոյանը։
Կանանց առաջնությանն ընդհանուր առմամբ մասնակցել են 14 մարզուհիներ․ նրանք մրցել են 3 քաշային կարգերում։ Արդյունքում, Հայաստանի չեմպիոններ են հռչակվել Գայանե Տեր-Բարսեղյանը (48 կգ), Անուշ Գրիգորյանը (52 կգ) և Տաթեւիկ Խաչատրյանը (57 կգ): Նրանց պարգևատրումն իրականացրել է ՀՀ ԿԳՄՍ նախարարի տեղակալ Կարեն Գիլոյանը։
Եվրոպայի փոխչեմպիոն Ռաֆայել Հովհաննիսյանի խոսքով Հայաստանի առաջնությունում ծավալվել է շատ բարդ ու հետաքրքիր պայքար, իսկ երկրպագուների աջակցությունը որքան, որ ոգևորիչ է, այնքան էլ` պարտավորեցնող․
«Ոսկե մեդալը նվաճելը բարդ էր։ Հիմա պետք է շարժվենք առաջ և լավագույնս նախապատրաստվենք առաջիկա կարևոր մրցաշարերին»,- ասում է Ռաֆայել Հովհաննիսյանը։
Տղամարդկանց հավաքականը նախապատրաստվում է Տաշքենդում մայիսի 1-15-ը կայանալիք աշխարհի առաջնությանը: Մինչ այդ՝ թիմը կմասնակցի Բուլղարիայի մայրաքաղաք Սոֆիայում փետրվարի 19-ին մեկնարկելիք «Ստրանջայի գավաթ» միջազգային մրցաշարին: Այնուհետև հայ բռնցքամարտիկները կմեկնեն Սերբիա, որտեղ մարտի 2-ից ևս մեկ միջազգային մրցաշարի կմասնակցեն:
Հիշեցնենք` Հայաստանի առաջնությանը չեն մասնակցել Օլիմպիական խաղերի բրոնզեմեդալակիր Հովհաննես Բաչկովը և Եվրոպայի առաջնության բրոնզեմեդալակիր Նարեկ Մանասյանը, որը վնասվածք ունի:
Առաջնության ավարտից հետո կձևավորվի նաև կանանց հավաքական թիմը, որը Ռաֆայել Մեհրաբյանի գլխավորությամբ փետրվարի 7-ից ուսումնամարզական հավաք կանցկացնի Օլիմպավանում: Մարզումները կտևեն մինչև փետրվարի 23-ը:
Եվս մեկ ուսումնամարզական հավաք կանայք կանցկացնեն փետրվարի վերջին՝ նախապատրաստվելով Հնդկաստանի Դելի քաղաքում մարտի 15-ին մեկնարկելիք աշխարհի առաջնությանը: