Պրոֆեսիոնալ բռնցքամարտի WBA վարկածով առաջին ծանր քաշային կարգում աշխարհի չեմպիոն Արսեն Գուլամիրյանը նախորդ տարվա նոյեմբերին պաշտպանեց չեմպիոնական տիղոսը։
Ֆրանսիայի Կան քաղաքում կայացած մենամարտում ֆրանսահայ բռնցքամարտիկը մրցավարների միաձայն որոշմամբ հաղթեց ռուս Ալեքսեյ Եգորովին՝ 116-112, 116-112, 117-111 հաշվով:
Արսեն Գուլամիրյանը պրոֆեսիոնալ ռինգում անցկացրել է 27 մենամարտ ու տարել նույնքան հաղթանակ (18 նոկաուտ):
Հայ բռնցքամարտիկը ծնվել է Երևանում, իսկ 7 տարեկանից ընտանիքով տեղափոխվել Ֆրանսիա: Նրա խոսքով` եթե չլիներ բռնցքամարտիկ, ապա հնարավոր է հիմա ըմբշամարտում լիներ:
«Բռնցքամարտով սկսել եմ զբաղվել 14 տարեկանից: Դպրոցական ընկեր ունեի, որը հաճախում էր բռնցքամարտի, երկուսս էլ շատ կռվարար էինք: Իրեն տեսնելով` ես էլ գնացի ու այդպես մնացի բռնցքամարտի մեջ»,-ասում է Գուլամիրյանը:
Արսեն Գուլամիրյանը 5 անգամ դարձել է Ֆրանսիայի չեմպիոն սիրողական բռնցքամարտում, 3 անգամ` երկրի պրոֆեսիոնալ բռնցքամարտի չեմպիոն:
Չնայած նրան, որ վաղ տարիքից բռնցքամարտիկն ապրում է արտասահմանում, սակայն հայրենիքի հետ կապը երբեք չի կորցնում.
«Ես տարին երկու անգամ գալիս եմ Հայաստան: Միակ տեղն է, որտեղ լիակատար հանգստանում եմ ու կարողանում լավ ժամանակ անցկացնել: Երևանում ունեմ շատ ընկերներ և հարազատներ: Սիրում եմ ամեն ինչ՝ ինչը կապված է Երևանի հետ: Ինձ համար աշխարհում Երևանի նման գեղեցիկ քաղաք չկա»,-ասում է բռնցքամարտիկը:
Գուլամիրյանն իր նորամուտը պրոֆեսիոնալ ռինգում նշել է 2012 թվականի մայիսի 27-ին: Այդ ժամանակ 24-ամյա բռնցքամարտիկը առաջին ռաունդում նոկաուտի էր ենթարկել մրցակցին: Նրա խոսքով` ինքը միշտ էլ հավատացել է իր ուժերին և վստահ է եղել, որ մի օր դառնալու է աշխարհի չեմպիոն:
Հայ մարզիկի համար ամենաբարդը եղել է 2020-2022 թվականներին՝ կորոնավիրուսի ժամանակահատվածում. այդ ընթացքում Գուլամիրյանը մենամարտ չի անցկացրել սահմանափակումների պատճառով: Բռնցքամարտիկի համար անմոռանալի է չեմպիոնական տարին: 2018-19 թվականներին նա դարձավ աշխարհի չեմպիոն, այնուհետև պաշտպանեց տիտղոսը:
Արսեն Գուլամիրյանի խոսքով` Ֆրանսիայում իր մենամարտերին ներկա են լինում 3-ից 4 հազար հայ:
Խոսելով հայկական բռնցքամարտի մասին Գուլամիրյանն ասում է. «Հայկական բռնցքամարտն այսօր լավ վիճակում է: Աշխարհի կամ Եվրոպայի առաջնություններում մենք մեդալներ ենք նվաճում, ինչն արդեն իսկ շատ լավ է, բայց կարող են անել այնպես, որ ամեն ինչ ավելի լավ լինի:
Հայաստանում չունենք պրոֆեսիոնալ բռնցքամարտի լիգա, ու դա լավ չէ: Հուսով եմ, որ կբացվի ու կզարգանա պրոֆեսիոնալ բռնցքամարտը մեր երկրում, որ կարողանանք արտասահմանում ավելի շատ ներկայացնել մեր եռագույնը»,-նշում է բռնցքամարտիկը:
Իր նախորդ մենամարտում Գուլամիրյանը ռինգին մոտեցավ զինվորական համազգեստով, իսկ հաղթանակը նվիրեց հերոս մայրերին:
«Բոլորս պարտական ենք միշտ մեր հերոս մայրերին և բոլոր նրանց, ովքեր իրենց կյանքը տվեցին հայրենիքի համար: Ես հպարտ եմ մեր ազգով»,-ասում է Գուլամիրյանը:
Ֆրանսահայ բռնցքամարտիկը հաջորդ մենամարտն անցկացնելու է ապրիլի սկզբին, այլ մանրամասներ այս պահին դեռ հայտնի չեն:
Երվանդ ՀԱԿՈԲՅԱՆ