Ֆուտբոլի աշխարհի 2022 թվականի առաջնության մեկնարկը մոտ է։ Նոյեմբերի 20-ից դեկտեմբերի 18-ը Կատարում կանցկացվի ԱԱ 2022-ը։
Armsport-ը վերջին օրերի ընթացքում ձեզ ծանոթացրել է մրցաշարի խմբերին։ Հերթը վերջին՝ H խմբինն է, որտեղ ընդգրկվել են Պորտուգալիայի, Գանայի, Ուրուգվայի և Հարավային Կորեայի հավաքականները։
Մյուս խմբերի վերաբերյալ Armsport-ի հրապարակումներին կարող եք ծանոթանալ ստորև․
A խումբ․ Մայրցամաքային չեմպիոնները, Նարնջագույններն ու երիտասարդ էկվադորցիները
B խումբ, երբ խառնվում են ֆուտբոլն ու քաղաքականությունը
D խումբ․ ֆրանսիացիները՝ 60 տարվա ռեկորդի, Դանիան՝ սենսացիայի հետևից
E Խումբ․ «Թոշակառուներն» ու աշխարհի երկու չեմպիոնները, ո՞ւմ խաղաքարտերը կխառնեն սամուրայները
G խումբ․ Մրցաշարի «գլխավոր ֆավորիտ» Կամերունն ու «Հին ծանոթների ակումբը»
H խմբի խաղացանկը
1-ին տուր
Նոյեմբերի 24, Ուրուգվայ – Հվ․ Կորեա, 17։00
Նոյեմբերի 24, Պորտուգալիա – Գանա, 20։00
2-րդ տուր
Նոյեմբերի 28, Հվ․ Կորեա – Գանա, 17:00
Նոյեմբերի 28, Պորտուգալիա – Ուրուգվայ, 23։00
3-րդ տուր
Դեկտեմբերի 2, Գանա – Ուրուգվայ, 19։00
Դեկտեմբերի 2, Հվ․ Կորեա – Պորտուգալիա, 19։00
Հայտացուցակները
ԱԱ-2022․ Պորտուգալիայի հավաքականի վերջնական հայտացուցակը
ԱԱ-2022․ Ուրուգվայի հավաքականի վերջնական հայտացուցակը
ԱԱ-2022․ Հարավային Կորեայի հավաքականի վերջնական հայտացուցակը
ԱԱ-2022․ Գանայի հավաքականի վերջնական հայտացուցակը
Պորտուգալիայի հավաքական
Պորտուգալիայի հավաքականը շատ լավ բալանսավորված է։ Թիմում տոն են տալիս ինչպես վետերանները, այնպես էլ երիտասարդները։ Բայց, եթե առանձնացնենք թիմի գլխավոր աստղ Կրիշտիանու Ռոնալդուին և ամենատարեց ֆուտբոլիստ Պեպեին, ապա ընդհանուր առմամբ, բավականին երիտասարդ կոլեկտիվ է հավաքել թիմի գլխավոր մարզիչ Ֆեռնանդու Սանթուշը։
Ամենակարևորն այն է, որ այս հավաքականի մի շարք ֆուտբոլիստներ գիտեն, թե ինչպես տիտղոսներ նվաճել ոչ միայն ակումբային, այլ նաև միջազգային մակարդակով։ Պորտուգալացիները 2016 թվականին դարձել են Եվրոպայի չեմպիոն, իսկ 2019 թվականին նվաճել Ազգերի լիգայի գավաթը։
Վերջին օրերին պորտուգալացիների ճամբարում իրավիճակը կարծես թե պայթյունավտանգ է։ Կրիշտիանու Ռոնալդուի՝ ՄՅՈւ-ի վերաբերյալ լայնածավալ հարցազրույցից հետո պարբերաբար տեղեկություններ և կադրեր են հրապարակվում, որ հավաքականի ճամբարում նույնիսկ Ռոնալդուի թիմակիցները մեծ ոգևորությամբ չեն ընդունել ֆուտբոլիստի խոսքերը։
Ինչևէ, Ռոնալդուն Պորտուգալիայի հավաքականի գլխավոր աստղն է և նա անպայման լինելու է Սանթուշի թիմի առաջատարը։ Ֆելիշ, Ֆեռնանդեշ, Բերնարդու Սիլվա, Լեաու․․․ այս ֆուտբոլիստները Ռոնալդուի հետ միասին փորձելու են ոչ միայն դուրս գալ խմբից, այլ առավելագույնս առաջ գնալ։ Բայց արդյո՞ք դա հեշտ կլինի անել այսպիսի խմբում։ Ուրուգվայ, Գանա, Հվ․ Կորեա․․ այս հավաքականները գուցե իրենց լավագույն ժամանակները չեն ապրում, բայց միանշանակ, խնդիրներ են ստեղծելու խմբի ֆավորիտ համարվող պորտուգալացիների համար։
Կրիշտիանու Ռոնալդուի համար սա լինելու է 5-րդ Մունդիալը, բայց ոչ վերջին խոշոր մրցաշարը հավաքականի կազմում։ 37-ամյա ֆուտբոլիստն ավելի վաղ նշել էր, որ ցանկանում է մասնակցել նաև Եվրո 2024-ին։
Գանայի հավաքական
Գանացիները վերադառնում են Մունդիալ։ ԱԱ 2018-ը բաց թողնելուց հետո նրանց թիմը ոլորապտույտ ճանապարհներ անցավ՝ Կատար 2022-ի ուղեգիր նվաճելու համար։
Այս տարվա սկզբին Աֆրիկայի ազգերի գավաթի խաղարկությունից դուրս մնալուց հետո Գանայի գլխավոր մարզչի պաշտոնից ազատվեց Միլովան Ռաևացը։ Վերջինիս փոխարինելու է եկել Օտտո Ադդոն: 47-ամյա ֆուտբոլիստը, որը մի քանի տարի խաղացել է Բունդեսլիգայում, այդ թվում՝ Դորտմունդի «Բորուսիայի» կազմում, ստանձնել է իր երկրի հավաքականի ղեկը, որի կազմում, ֆուտբոլիստի կարգավիճակում, անցկացրել է 15 հանդիպում։ Ադդոյի գլխավորած թիմը Կատարի Մունդիալի ուղեգիր է նվաճել արտագնա գոլերի շնորհիվ՝ ոխերիմ մրցակից Նիգերիայի հետ փլեյ-օֆֆում:
Գանայի հավաքականը H խմբում ընդգրկված է Պորտուգալիայի, Հարավային Կորեայի և Ուրուգվայի հետ: Ուրուգվայցիների հետ նորից հանդիպելը կամ ճակատագրի հեգնանք է, կամ էլ վրեժ լուծելու հնարավորություն։
Աշխարհի առաջնությունները հարուստ են խելահեղ պատմություններով և դրանցից մեկը՝ ԱԱ 2010-ի քառորդ եզրափակչի Ուրուգվայ — Գանա հանդիպումն է։
45-րդ րոպեին գանացիների կիսապաշտպան Սալի Մունտարիի գոլին 55-րդ րոպեին պատասխանեց Դիեգո Ֆոռլանը։ Հիմնական ժամանակն ավարտվեց ոչ-ոքի, և լրացուցիչ ժամանակի վերջին վայրկյաններին Ուրուգվայի հավաքականի հարձակվող Լուիս Սուարեսը սեփական տուգանային հրապարակում, դարպասային գծի վրա լինելով, ձեռքով հետ մղեց մրցակցի հարվածը՝ թույլ չտալով, որ գնդակը հայտնվի դարպասում։ Այդ պահից էլ սկսեց իսկական դրաման։ Մունդիալի քառորդ եզրափակիչ, 120-րդ րոպե․․․ և Գանան 11 մետրանոցի իրավունք է ստանում։ Գնդակին մոտենում է Ասամոա Գյանը։ Հարված․․․ և գնդակն անդրադառնում է ուղղահայաց դարպասաձողից ու չի հայտնվում դարպասում։ Սկսում է հետխաղային 11 մետրանոց հարվածաշարը։ Ուրուգվայի հավաքականի դարպասապահ Ֆերնանդո Մուսլերան 2 սեյվ է կատարում, եզրափակիչ հարվածի ժամանակ հաշիվը 3։2 է, և Սեբաստյան Աբրեուի ճշգրիտ հարվածը կարող է կիսաեզրափակչի ուղեգիր պարգևել ուրուգվայցիներին։ Եվ ինչպես հոլիվուդյան ֆիլմերի լարված պահերին է լինում, գլխավոր հերոսն ինչ-որ անհասկանալի սառնասրտությամբ փոխում է իրավիճակը։ Նույնը կարելի է ասել Սեբաստյան Աբրեուի մասին։ Ֆուտբոլիստ, որն այնքան էր լարվում և չէր կարողանում դիտել թիմակիցների իրացրած 11 մետրանոցները, վերջին՝ վճռորոշ հարվածը կատարում է պանենկա ձևով և Ուրուգվային դուրս բերում ԱԱ 2010-ի կիսաեզրափակիչ։
Ամբողջ դրաման՝ մեկ տեսանյութում․
Գանան վրեժխնդիր լինելու հնարավորություն ունի, իսկ դա լուրջ պայքար կապահովի խմբում։ Այս թիմերը մրցելու են միմյանց դեմ վերջին տուրում։
Գանան շատ ուժեղ խմբում է, բայց կարող է խնդիրներ ստեղծել յուրաքանչյուրի համար: Թեև նրանց ելույթները Մունդիալի ճանապարհին, մեղմ ասած, կայուն չէին, թիմն ունի փորձառու և տաղանդավոր խաղացողների հետաքրքիր խառնուրդ, որոնք ունակ են դրական արդյունքներ գրանցել այս մրցաշարում: Որպես մարզիչ՝ Ադդոն պետք է գտնի թիմային ճիշտ բալանսն ու խաղացողներին տա այն ինքնավստահությունը, որն անհրաժեշտ է Կատարում եղանակ ստեղծելու համար։
Գանայի հավաքականի կազմում հետաքրքիր կլինի հետևել եղբայրներ՝ Ջորդան և Անդրե Այուներին, Բիլբաոյի «Աթլետիկի» հարձակվող Ինյակի Ուիլյամսին, ԱՊԼ-ից Տարիք Լեմփթիին, Դանիել Ամարթիին և Թոմաս Փարթիին։ Ուշադրության կենտրոնում կարող է լինել նաև «Այաքսի» երիտասարդ հարձակվող Մոհամեդ Կուդուսը։
Ուրուգվայի հավաքական
Ուրուգվայի հավաքականը 3 անընդմեջ Մունդիալներից հետո առաջին անգամ կներկայանա աշխարհի առաջնությանն առանց լեգենդար Օսկար Վաշինգտոն Տաբարեսի։ 2021 թվականի նոյեմբերին 74 տարեկան մասնագետը լքեց հավաքականի գլխավոր մարզչի պաշտոնը, որը զբաղեցնում էր 2006 թվականից։
ԱԱ 2022-ի ընտրական փուլի մեկնարկը ձախողված էր։ Ուրուգվայի հավաքականը կարող էր չհայտնվել Կատար 2022-ում և փոփոխություններ էին անհրաժեշտ։ Բոլիվիայի ցավալի հանդիպումից հետո (0։3 հաշվով պարտություն), որն ընտրական փուլում 4-րդ անընդմեջ պարտությունն էր, Օսկար Տաբարեսին փոխարինեց 46-ամյա Դիեգո Ալոնսոն։ Վերջինիս գլխավորությամբ Ուրուգվայի հավաքականը փայլուն արդյունք գրանցեց։ 4 անընդմեջ հաղթանակներից հետո թիմն ընտրական մրցաշարն ավարտեց 3-րդ տեղում և ԱԱ 2022-ի ուղեգիր նվաճեց։
Բնականաբար, այս հավաքականում տոն են տալիս վետերաններ Լուիս Սուարեսն ու Էդինսոն Կավանին։ Նրանց համար սա վերջին խոշոր մրցաշարն է լինելու կամ այսպես ասած՝ «Կարապի երգը»։
Թիմում մեծ դեր ունեն նաև «Ռեալի» կիսապաշտպան Ֆեդե Վալդերդեն, որն այս մրցաշրջանում ֆանտաստիկ մարզավիճակում է, ինչպես նաև «Բարսելոնայի» պաշտպան Ռոնալդ Արաուխոն։ Վերջինս երկար ժամանակ ապաքինվում էր վնասվածքից, բայց ընդգրկվել է հավաքականի հայտացուցակում։ Չմոռանանք «Լիվերպուլի» երիտասարդ հարձակվող Դարվին Նունյեսի մասին, որի համար ևս այս մրցաշարը կարող է բեկումնային լինել կարիերայում։
Ուրուգվայն այն հավաքականներից է, որ ոչ մի պարագայում չի հանձնվում։ Գանայի հետ 2010 թվականի դեպքը դրա վառ ապացույցն է։
Հարավային Կորեայի հավաքական
Հարավային Կորեայի հավաքականը չի կարողացել դուրս գալ խմբից վերջին երկու աշխարհի առաջնություններում, սակայն գերաստղ Սոն Հին Մինի առաջնորդությամբ, այս հավաքականը ձգտելու է ընդհատել անհաջող շարքը։
2002-ի Մունդիալը Ճապոնիայի հետ համատեղ ընդունելուց հետո Հարավային Կորեան կարողացել է խմբից դուրս գալ միայն ԱԱ 2010-ում։
2012 թվականի Օլիմպիական խաղերում բրոնզե մեդալ նվաճելուց հետո արդեն երկրի ազգային հավաքականը անցավ քաոսային փուլ՝ մինչև ԱԱ 2018-ը 6 մարզիչ փոխելով։ Սոն Հին Մինի նման գերաստղի հայտնվելը բավարար չէր թիմի բախտը վերականգնելու համար, քանի որ նրանք չկարողացան դուրս գալ խմբից, ինչպես Բրազիլիա 2014-ում, այնպես էլ՝ Ռուսաստանում կայացած 2018 թվականի ԱԱ-ում։
Հարավային Կորեան այն հավաքականներից է, որը պետք է հույսը դնի հիմնականում բախտի և թիմի միակ գերաստղ՝ Սոնի վրա։ «Տոտենհեմի» հարձակվողը կփորձի իր լավագույն որակները դրսևորել այս մրցաշարում։ Նրա թիմակիցների և ընդհանրապես բոլոր ֆուտբոլիստների համար աշխարհի առաջնությունը լավ շանս է ոչ միայն փառավորվելու, այլ նաև հետագա կարիերայում նոր հորիզոններ բացելու համար։
Այսպիսով նոյեմբերի 20-ից դեկտեմբերի 18-ը աշխարհի ուշադրությունը կսևեռվի ԱԱ 2022-ի վրա։ Կատարում մրցաշարն անցկացնելը բողոքի լուրջ ալիք էր բարձրացրել՝ կապված ինչպես մարդու իրավունքների, այնպես էլ շոգ եղանակային պայմանների և գրաֆիկի հետ։ Բայց հիմա այդ բոլոր խոսակցությունները կմղվեն երկրորդ պլան և բեմում կլինի ֆուտբոլը։ Հուսանք, որ ֆուտբոլային տոնը կջերմացնի մեզ խոր աշնան վերջին և ձմռան սկզբին։ Երբեք և ոչ մի խոշոր մրցաշարից առաջ հնարավոր չի եղել կռահել իրադարձությունների հստակ ընթացքը։ Դրանով էլ գեղեցիկ է ֆուտբոլը։ Պետք է պարզապես հետևել, դիտե՛լ և հաճույք ստանալ։ Armsport-ն այս ընթացքում փորձեց ձեզ ծանոթացնել խմբերին, մասնակից հավաքականներին և շարունակելու է լուսաբանել ֆուտբոլային ամենամեծ մրցաշարը։
Միհրան Ալեքսանյան