Ֆուտբոլի աշխարհի 2022 թվականի առաջնության մեկնարկին հաշված օրեր են մնացել։ Նոյեմբերի 20-ից դեկտեմբերի 18-ը Կատարում կանցկացվի ԱԱ 2022-ը։
Armsport-ը շարունակում է ձեզ ծանոթացնել մրցաշարի խմբերի և մասնակից հավաքականների հետ։ Հերթը D խմբինն է, որտեղ ընդգրկվել են Ֆրանսիայի, Դանիայի, Ավստրալիայի և Թունիսի հավաքականները։
Խաղացանկը
1-ին տուր
Նոյեմբերի 22, Դանիա — Թունիս, 17։00
Նոյեմբերի 22, Ֆրանսիա — Ավստրալիա, 23։00
2-րդ տուր
Նոյեմբերի 26, Թունիս — Ավստրալիա, 14։00
Նոյեմբերի 26, Ֆրանսիա — Դանիա, 20։00
3-րդ տուր
Նոյեմբերի 30, Ավստրալիա — Դանիա, 19։00
Նոյեմբերի 30, Թունիս — Ֆրանսիա, 19։00
Հայտացուցակները
Ֆրանսիայի հավաքականի հայտացուցակը
Դանիայի հավաքականի հայտացուցակը
Ավստրալիայի հավաքականի հայտացուցակը
Թունիսի հավաքականի հայտացուցակը դեռ չի հրապարակվել
Ֆավորիտները՝ Դանիա և Ֆրանսիա
Այստեղ ամեն ինչ այդքան էլ միանշանակ չէ։ Ի՞նչ եք կարծում՝ ե՞րբ է վերջին անգամ Ֆրանսիայի հավաքականը հաղթել Դանիային։ Կարիք չկա Google-ին «նեղություն» տալ։ Դա եղել է 2015 թվականին՝ ընկերական խաղում։ Դրանից հետո այս հավաքականների միջև 3 խաղ է կայացել։ 2018 թվականի աշխարհի առաջնությունում գրանցվել է գոլազուրկ ոչ-ոքի, իսկ ընթացիկ տարվա Ազգերի լիգայի խաղարկությունում դանիացիները 2 հաղթանակ են տարել՝ 2։0 և 2։1։
Պատահականություն է, կարող եք ասել դուք, բայց․․․ դիտարկենք այս հավաքականների ելույթները վերջին խոշոր մրցաշարում՝ ԵՎՐՈ 2020-ում։ Ֆրանսիան խայտառակվեց 1/8 եզրափակչում, իսկ Դանիան հասավ մինչև կիսաեզրափակիչ։ Եվ ով գիտե, թե ինչ արդյունք կարող էր գրանցել Դանիայի հավաքականը, եթե չլիներ Քրիստիան Էրիկսենի հետ կապված իրավիճակը։ Էրիկսենի մոտ սրտի կանգ գրանցվեց առաջին տուրի Ֆինլանդիայի հետ խաղում։ Թիմը պարտվեց, բայց կարողացավ ուժ հավաքել և հասնել մինչև կիսաեզրափակիչ։
Հիմա, Քրիստիան Էրիկսենի մոտ ամեն ինչ կարգին է։ Նա փայլուն խաղ է ցուցադրում «Մանչեսթեր Յունայթեդի» կազմում և ընդգրկված է Դանիայի հավաքականի՝ ԱԱ 2022-ի համար նախատեսված հայտացուցակում։
Համաձայնեք` գեղեցիկ պատմություն կլինի, եթե դանիացիներն արդեն Էրիկսենի հետ կարողանան պատմական նվաճման հասնել այս մրցաշարում։
Բայց էլ ավելի պատմական նվաճում կարող է գրանցել Դիդյե Դեշամի գլխավորած հավաքականը։ Ֆրանսիացիները, որոնք աշխարհի գործող չեմպիոններն են, կարող են պաշտպանել տիտղոսը և կրկնել Բրազիլիայի հավաքականի ավելի քան 60 տարի առաջ գրանցած ցուցանիշը։ Բրազիլիայի հավաքականը աշխարհի չեմպիոն է դարձել 1958-ին և պաշտպանել տիտղոսը 1962 թվականին։
Եզրակացությունը կարող է լինել մեկը՝ չնայած Ֆրանսիայի հավաքականը լի է աստղերով, միևնույնն է, այս հավաքականին բացարձակ ֆավորիտ համարելը սխալ կլինի, քանի որ Դանիայի հավաքականն արդեն ապացուցել է, որ կարող է դիմակայել Ֆրանսիայի նման հզոր թիմին։
Թունիսի հավաքական
Թունիսի այս կազմը տարբերվում է այն թիմից, որը մասնակցում էր նախորդ Մունդիալին։ Հիմա այս համեստ հավաքականը լավ մարզավիճակում է և գովասանքների է արժանացել վերջին ընկերական խաղերում մի շարք տպավորիչ ելույթների համար: Այնուամենայնիվ, խմբից դուրս գալը հրաշք կլինի, քանի որ Թունիսի հավաքականի ճանապարհին կանգնած են աշխարհի չեմպիոն Ֆրանսիան, Դանիան և Ավստրալիան։
Թունիսի հավաքականի գլխավոր մարզիչ Ջալել Կադրին աչքի է ընկնում հարձակողական ֆուտբոլի հանդեպ սիրով։ Բայց նրա ամենամեծ առավելությունն այն է, որ շուրջ 20 տարի աշխատել է Թունիսի և արաբական մի քանի լիգաներում։ 2013 թվականին դարձել է Թունիսի հավաքականի գլխավոր մարզիչ Նաբիլ Մալուլի օգնականը։ Տարիներ անց՝ 2021 թվականին նորից ստանձնել է այդ պաշտոնը, որից հետո հաստատվել է որպես գլխավոր մարզիչ, երբ մի քանի հաջող հանդիպում է անցկացրել։
Սա Թունիսի համար վեցերորդ աշխարհի առաջնությունն է լինելու։ Այս հավաքականի առաջին ելույթը մրցաշարում տեղի է ունեցել 1978 թվականին, երբ Թունիսը դարձել է աֆրիկյան առաջին թիմը, որը հաղթել է Մունդիալի խաղում։ Պատմական հաղթանակը գրանցվել է Մեքսիկայի հետ խաղում (3։1): Չնայած այդ հաղթանակին, Թունիսը հաջորդ խաղում պարտվեց Լեհաստանին, իսկ Գերմանիայի հետ ոչ-ոքիից հետո լքեց պայքարը։
Թունիսը 2018 թվականին Ռուսաստանում կայացած աշխարհի առաջնության իր խմբում պարտվեց Անգլիային և Բելգիային, հաղթեց Պանամային, սակայն դուրս չեկավ փլեյ-օֆֆ։ Այնուամենայնիվ, այս համեստ հավաքականը կարողացավ գոլ խփել բոլոր 3 խաղերում։
Գլխավոր աստղերից են «Մոնպելյեի» հարձակվող Վահբի Խազրին և «Քյոլնի» կիսապաշտպան Էլես Շկրին, որը Հայաստանի ազգային հավաքականի հարձակվող Սարգիս Ադամյանի թիմակիցն է գերմանական ակումբում։
Յուսեֆ Մսակնին էլ ամենափորձառու ֆուտբոլիստն է, որը 87 հանդիպում է անցկացրել Թունիսի հավաքականի կազմում։
Ավստրալիայի հավաքական
Երբ Ավստրալիան որակավորվեց Գերմանիայում անցկացվող ԱԱ 2006-ին, դա ընդամենը 2-րդ Մունդիալն էր հավաքականի պատմության մեջ և առաջինը 30 տարվա ընթացքում: Այժմ, երբ այս հավաքականը պետք է մասնակցի հինգերորդ անընդմեջ մրցաշարին, կարելի է ասել, որ Ավստրալիայի հավաքականի ոսկե դարաշրջանը շարունակվում է։
Բայց, իրականում մեծ հույս կամ ոգևորություն չկա Կատար մեկնող թիմից: Ավստրալիայի երկրպագուներից շատերը ընթացիկ տարվա սկզբին չէին սպասում, որ իրենց երկրի հավաքականը կմասնակցի ԱԱ 2022-ին, և շատերն այդ շրջանում նույնիսկ կոչ էին անում հեռացնել թիմի մարզչին։
Այնուամենայնիվ, Գրեհեմ Առնոլդն ու իր գլխավորած հավաքականը հունիսին Դոհայում կայացած փլեյ-օֆֆում Պերուի նկատմամբ դժվարին հաղթանակի շնորհիվ Մունդիալին մասնակցելու իրավունք ստացան։
Այնուամենայնիվ, աշխարհի վերջին 2 առաջնություններում անցկացրած 6 խաղերում Ավստրալիայի հավաքականը ոչ մի հաղթանակ չի տարել։ Հաշվի առնելով այս փաստը, պետք է ավստրալացիներից մեծ ակնկալիքներ չունենալ։
Ի՞նչ սպասել այս խմբից
Սա թերևս այն խումբն է, որտեղ մինչև վերջին պահը կարող է իրավիճակ փոխվել։ Խմբում հավասար միավորների դեպքում հաշվի է առնվելու խփած և բաց թողած գոլերի տարբերությունը։ Հաշվի առնելով այս հանգամանքը, խմբի վերջնական տեսքը կարող է փոփոխվել նույնիսկ վերջին տուրի խաղերում խփած մեկ գոլից։
Եթե խոշոր անանակնալ ու սենսացիաներ չլինեն, ապա Ֆրանսիան ու Դանիան կանցնեն հաջորդ փուլ։
Միհրան Ալեքսանյան
