Օլիմպիական խաղերի բրոնզե մեդալակիր Արթուր Դավթյանը, որն արծաթե մեդալ նվաճեց Մյունխենում անցկացված Եվրոպայի առաջնությունում՝ հավասար միավորներ ունենալով չեմպիոն հռչակված բրիտանացի մարզիկի հետ, ասում է՝ կողմնակալ մրցավարության արդյունքում է արժանացել արծաթե մեդալին.
«Ինձ ոչինչ չխանգարեց, ես իմ ցանկերը լավ կատարեցի, պարզապես մրցավարները որոշեցին, որ ես պետք է երկրորդ տեղը զբաղեցնեմ: Այդքանը: Եղավ կողմնապահություն, որի մասին միայն ես ու մեր հավաքականի մարզիչները չէ, որ ասում ենք: Այնտեղ էլ գալիս ինձ ասում էին՝ զարմանալի չէ՞ քո այս գնահատականը: Ես իմ ցատկերը լավ կատարեցի»,- ասել է Արթուր Դավթյանն ու խոսել այն մասին՝ ինչ է պետք անել Փարիզի 2024 թվականի օլիմպիական խաղերում ավելի անխոցելի լինելու համար.
«Պետք է բարդացնեմ վարժությունս: Այնքան պետք է բարդացնենք, որ եթե ուզենան որոշ միավորներ էլ հանել, միևնույն է՝ դա ոչ մի դեր չխաղա: Պետք է մի գլուխ ուժեղ լինենք, որպեսզի չկարողանան իրենց ուզածն անել: Այս ԵԱ-ում ես իմ գործն արեցի»:
Արթուր Դավթյանը խոսել է նաև երիտասարդ մարմնամարզիկների մասնակցության մասին. «Շատ լավ մասնակցեցին տղաները, շատ ապրեն: Շատ ուրախ էինք իրենց համար: Ճիշտ է՝ չէինք կարող ֆիզիկապես ներկա լինել իրենց մրցումներին, բայց օնլայն ռեժիմով հետևում էինք: Նրանց հաղթանակները մեզ շատ ոգևորեցին: Շատ ուրախ ենք»:
Հիշեցնենք՝ Արթուր Դավթյանը ԵԱ-ի փոխչեմպիոնի տիտղոսը նվաճել է հենացատկից։ Նա երկու ցատկերի արդյունքում 14,983 միավոր է վաստակել և դարձել արծաթե մեդալակիր։ Չեմպիոնի կոչումը նվաճած բրիտանացի Ջեյք Ջերմանը նույնքան միավոր է հավաքել, բայց վարժության բարդության շնորհիվ կարողացել է շրջանցել Դավթյանին:
Երիտասարդ մարմնամարզիկներն էլ Արտակ Այդինյանի գլխավորությամբ 1 ոսկե և 2 արծաթե մեդալ են նվաճել: Եվրոպայի չեմպիոն է դարձել Էրիկ Բաղդասարյանը՝ ոսկե մեդալ նվաճելով զուգափայտից, իսկ Համլետ Մանուկյանը հռչակվել է Եվրոպայի կրկնակի փոխչեմպիոն: Մանուկյանը երկու արծաթե մեդալ է նվաճել նժույգ թափեր և օղակներ վարժություններից։