Եվրոպայի կրկնակի չեմպիոն, մարմնամարզիկ Հարություն Մերդինյանը ամփոփել է Մյունխենում անցկացված Եվրոպայի առաջնությունն ու խոսել մեջքի ծանր վնասվածքից հետո սպորտ վերադառնալու և այլնի մասին.
«Իհարկե, դժվար է: Վնասվածքները շատ են խանգարում, հատկապես իմ տարիքում: 2016 թվականի օլիմպիական խաղերից հետո դադար էի վերցրել, բայց հետո հասկացա, որ նորից կարող եմ դուրս գալ մրցահարթակ: Ընկերներս, մարզիչներս ինձ շատ օգնեցին, հատկապես Հայկ Նազարյանը: Որոշ էլեմենտներ փոխեցինք վարժության մեջ ու որոշեցի նորից պայքարի դուրս գալ:
Նա ինձ շատ էր ոգևորում, ասում էր՝ եթե կարող ես, ինչո՞ւ չպարապես ու չփորձես հաջողության հասնել: Ուրախ եմ, որ ևս մեկ անգամ կարողացա մեր երկրի դրոշը բարձր պահել ու մեր հիմնը հնչեցնել: Սա ամենակարևոր բանն է»,- ասել է Մերդինյանը:
Մերդինյանը խոսել է նաև 38 տարեկանում Եվրոպայի առաջնության ոսկե մեդալակիր դառնալու և ավելի երիտասարդ մարզիկների հետ մրցակցության համար.
«Մեր թիմի երիտասարդ տղաները մեզ շատ ոգևորեցին: Սկզբում իրենք էին մասնակցում մրցումներին ու իրենց փորձը շատ ոգևորիչ էր մեզ համար:
Այո, մրցակիցներիս շարքում ինձնից տարիքով շատ ավելի փոքր մարզիկներ կային, ուժերով լեցուն էին, բայց ես էլ փորձ ունեմ, ավելի քիչ եմ լարվում, քան տարիքով ավելի փոքրները: Տարբերությունը դա է»:
Խոսելով Փարիզ-2024-ի հնարավոր մասնակցության մասին՝ Մերդինյանը նշել է՝ հետագայի հետ կապված ծրագրեր չի կազմում, մտածում է միայն առաջիկա մրցումների մասին:
Հիշեցնենք՝ Հայաստանի մեծահասակների հավաքականը 1 ոսկե և 1 արծաթե մեդալ է նվաճել Եվրոպայի առաջնությունում: Կարիերայում երկրորդ անգամ Եվրոպայի չեմպիոնի տիտղոսը նվաճել է 38-ամյա Հարություն Մերդինյանը՝ հավասարը չունենալով նժույգ թափեր վարժությունում։ ԵԱ-ի փոխչեմպիոնի տիտղոսն էլ նվաճել է Տոկիոյի օլիմպիական խաղերի բրոնզեմեդալակիր Արթուր Դավթյանը՝ հենացատկից:
