Հայաստանի ձյուդոյի ֆեդերացիայի նախագահ Վարդան Ոսկանյանը Ավստրիայի մայրաքաղաք Վիեննայում մասնակցել է Եվրոպայի ձյուդոյի միության արտահերթ կոնգրեսին, որի օրակարգում ԵՁՄ նախագահի ընտրությունն էր Սերգեյ Սոլովեյչիկի հրաժարականից հետո։
Կոնգրեսին ներկա էին եվրոպական ազգային 49 ֆեդերացիաների ներկայացուցիչներ, հյուրեր այլ երկրներից, ինչպես նաև ՁՄՖ նախագահ Մարիուս Վիզերը՝ որպես պատվավոր հյուր: ԵՁՄ նախագահի համար իր թեկնածությունն էր ներկայացրել միայն Հունգարիայի ձյուդոյի ասոցիացիայի նախագահ դոկտոր Լասլո Տոտը, որն էլ ընտրվեց միաձայն։ Նրա պաշտոնավարման ժամկետը կավարտվի 2024 թվականի դեկտեմբերին։ ԵՁՄ գլխավոր քարտուղար ընտրվեց Մարտին Պոյգերը։
Իր ելույթում Լասլո Տոտն ասել է. «Մեծ պատիվ է լինել ԵՁՄ-ի տասնմեկերորդ նախագահը, ես խորապես հավատում եմ, որ մենք հավաքում ենք եվրոպական ձյուդոյի լավագույն թիմը, որպեսզի ապահովենք մեր ազգային ֆեդերացիաների հաջողությունները։ Ներկայում Եվրոպայի Ձյուդոյի Միությունը ունի հինգ օլիմպիական և ութ աշխարհի չեմպիոն: Մենք ցանկանում ենք ամրապնդել այս ամուր դիրքերը գալիք առաջատար իրադարձություններում: Մենք բոլորս անհամբեր սպասում ենք 2024 թվականի Օլիմպիական խաղերին Փարիզում, որոնք անկասկած, առանձնահատուկ կլինեն»։
ԵՁՄ նորընտիր նախագահ, 62-ամյա սպորտային դիվանագետ, ձյուդոյի 7-րդ դան Լասլո Տոտը Հունգարիայի ձյուդոյի ասոցիացիայի ղեկավարն է եղել ավելի քան 24 տարի, ԵՁՄ-ի գլխավոր գանձապահ և գործադիր կոմիտեի անդամ՝ 2002 թվականից:
