Երևանի Կարեն Դեմիրճյանի անվան մարզահամերգային համալիրում այսօր կայացավ բռնցքամարտի Եվրոպայի առաջնության բացման հանդիսավոր արարողությունը:
Երևանում կայանալիք առաջնությանը 39 երկրի շուրջ 250 բռնցքամարտիկ կմասնակցի: Բացման անչափ գեղեցիկ արարողության ժամանակ նախ ներկայացվեցին բոլոր երկրները: Հայաստանի դրոշակակիրը բռնցքամարտիկ Նարեկ Մանասյանն էր:
Այնուհետև հյուրերին ողջունեցին առաջնության կազմկոմիտեի նախագահ Արայիկ Հարությունյանը, Հայաստանի բռնցքամարտի ֆեդերացիայի նախագահ Հովհաննես Հովսեփյանը, ԱԻԲԱ-ի նախագահ Ումար Կրեմլյովը, բռնցքամարտի եվրոպական կոնֆեդերացիայի նախագահ Իոաննիս Ֆիլիպատոսը, ինչպես նաև ՀՀ փոխվարչապետ Համբարձում Մաթևոսյանը:
Առաջնության կազմոմիտեի նախագահ Արայիկ Հարությունյանը, ողջունելով ներկաներին, նախ շնորհավորեց բոլորիս` մարզական այս մեծամասշտաբ իրադարձության կայացման համար: Նա ընդգծեց` այս քայլով ցանկանում են մեր երկրում խթանել ինչպես բռնցքամարտի, այլև մասսայական սպորտի զարգացումը. «Երբ ստացանք առաջնությունը մեր երկրում անցկացնելու հնարավորությունը, ջանք ու եռանդ չխնայեցինք այն լավագույնս կազմակերպելու համար: Այդ նպատակին հասնելու համար Հայաստանում մեծ ներդրումներ են կատարվում մարզական ենթակառուցվածքներում: Այս մրցաշարի կազմակերպումն ու առաջնությունն անցկացնելու իրավունք ստանալը խթանեց ենթակառուցվածքների զարգացումը»:
Հարությունյանը նաև հաջողություն մաղթեց Հայաստանի հավաքականի բռնցքամարտիկներին, իսկ երկրպագուներին էլ կոչ արեց աջակցել մեր թիմին տրիբունաներից և վայելել մարզական այս տոնը. «Հայաստանի հավաքականի սիրելի մարզիկներ, մենք ուշի ուշով հետևելու ենք ձեր ելույթներին: Աջակցելու ենք տրիբունաներում: Սպասելու ենք մեծ հաղթանակների: Այսօր Հայաստանին այդ մեծ հաղթանակները շատ են պետք»:
Այնուհետև, տեղի ունեցավ մարզիկների և մրցավարների երդման արարողությունը: Մարզիկների անունից երդման տեքստը կարդաց Տոկիոյի Օլիմպիական խաղերի բրոնզե մեդալակիր Հովհաննես Բաչկովը, իսկ մրցավարների անունից` Մեծ Բրիտանիայի ներկայացուցիչը:
Հիշեցնենք՝ Եվրոպայի բռնցքամարտի առաջնությունը կկայանա մայիսի 22-30-ը: Այն կընդունի Կարեն Դեմիրճյանի անվան մարզահամերգային համալիրը: Եվրոպայի առաջնության ընդհանուր մրցանակային ֆոնդը կազմում է 260 հազար դոլար: Հայաստանը ներկայացուցիչներ կունենա բոլոր 13 քաշային կարգերում: Մեր երկրի մարզական պատիվը կպաշտպանեն Բարեղամ Հարությունյանը (48 կգ), Արթուր Հովհաննիսյանը (51 կգ), Ջանիկ Սահակյանը (54 կգ), Արթուր Բազեյանը (57 կգ), Կարեն Տոնականյանը (60 կգ), Հովհաննես Բաչկովը (63,5 կգ), Գուրգեն Մադոյանը (67 կգ), Նարեկ Զախարյանը (71 կգ), Վախթանգ Հարությունյանը (75 կգ), Համբարձում Հակոբյանը (80 կգ), Ռաֆայել Հովհաննիսյանը (86 կգ), Նարեկ Մանասյանը (92 կգ) և գերծանր քաշային Դավիթ Չալոյանը: