Այսօր Կարեն Դեմիրճյանի անվան մարզահամերգային համալիրում տեղի ունեցավ Երևանում կայանալիք բռնցքամարտի Եվրոպայի առաջնության վերաբերյալ մամուլի ասուլիս, որին մասնակցեցին Եվրոպայի առաջնության կազմկոմիտեի նախագահ Արայիկ Հարությունյանը, ԿԳՄՍ փոխնախարար Կարեն Գիլոյանը և Հայաստանի բռնցքամարտի ֆեդերացիայի նախագահ Հովհաննես Հովսեփյանը:
«Մեր աշխատանքների 95 տոկոսն արդեն կատարված է՝ թե՛ մարզական առումով, թե՛ բացման արարողության հետ կապված: Շատ գեղեցիկ բացման արարողություն է լինելու, որից հետո՝ գիշերը, կտեղադրվեն ռինգերն ու մայիսի 23-ից արդեն կմեկնարկեն նախնական մենամարտերը: Նախնական մենամարտերը կտևեն մինչև մայիսի 27-ը՝ երկու ռինգերի վրա: Մայիսի 28-ը կլինի հանգստի օր, մայիսի 29-ին կկայանան կիսաեզրափակիչները, իսկ 30-ին՝ եզրափակիչները:
Բոլորին կոչ եմ անում երկրպագել Հայաստանի հավաքականին, որպեսզի մեր մարզիկները հասկանան, որ տանն են մենամարտում և դրանից թևավորվեն, պետք է՝ տրիբունաներում շատ հանդիսական լինի ու ամեն կերպ փորձի աջակցել: Եկեք նպաստենք այդ հաղթանակների կայացմանը, որ հետո այդ բերկրանքը միասին ապրենք»,- ասել է ԿԳՄՍ փոխնախարար Կարեն Գիլոյանը։
Մեր հավաքականի կազմն՝ այստեղ։
Եվրոպայի բռնցքամարտի առաջնությունը կայանալու է մայիսի 21-31-ը Կարեն Դեմիրճյանի անվան մարզահամերգային համալիրում: Բացման արարողությունը կկայանա այս կիրակի՝ 21։00-ին։ Մայիսի 30-ին EUBC գործկոմի առաջին նիստը կայանալու է Հայաստանում։
