Դանիայի հավաքականի կիսապաշտպան Քրիստիան Էրիկսենը կիսվել է իր հույզերով Հոլանդիայի հավաքականի հետ խաղում խփած գոլից հետո։
«Ես ինձ շատ ողջունելի հյուր էի զգում: Ես նախկինում այստեղ խաղացել եմ երկար տարիներ, այնպես որ, իհարկե, երկրպագուներն ինձ ճանաչում են, բայց դա շատ ջերմ ընդունելություն էր: Հիանալի է, որ գնդակը դիպավ ինձ, և ես կարողացա գոլով ավարտել գրոհը։ Այս կերպ միջազգային ֆուտբոլ վերադառնալը իդեալական է: Անհամբերությամբ սպասում եմ Կատարում կայանալիք աշխարհի առաջնությանը, բայց առջևում դեռ շատ հանդիպումներ կան, և ես կենտրոնացած եմ դրանց վրա»,- Էրիկսենի խոսքերն է մեջբերում Sky Sports-ը:
Հիշեցնենք, որ 2021 թվականի ամռանը Ֆինլանդիայի հետ Եվրոպայի առաջնության խաղում (0:1) Դանիայի հավաքականի կիսապաշտպանը սրտի կանգ էր ստացել։ Էրիկսենը անգլիական «Բրենտֆորդի» կազմում 2022 թվականի փետրվարի վերջին վերականգնումից հետո առաջին անգամ կարողացավ մասնակցել պաշտոնական հանդիպման։
