Հայաստանի հավաքականի պաշտպան Ժիրայր Մարգարյանը ձմռանն էր «Արարատից» տեղափոխվել ուկրաինական «Վերես»։ Նոր ակումբի կազմում 24-ամյա ֆուտբոլիստը պատրաստվում էր մրցաշրջանի երկրորդ հատվածին և մի շարք հաջող հանդիպումներ անցկացրեց, սակայն չհասցրեց պաշտոնական հանդիպումների մասնակցել, քանի որ երկրում սկսված պատերազմի պատճառով ստիպված էր հեռանալ Ուկրաինայից։
Ժիրայր Մարգարյանն արդեն Հայաստանում է և համալրել է «Ուրարտուի» շարքերը։ Հիշեցնենք, որ ՖԻՖԱ-ն Ուկրաինայում հանդես եկող ֆուտբոլիստներին մինչև հունիսի 30-ը իրավունք է տվել ներկայացնել այլ ակումբ, որպեսզի վերջիններս կարողանան մարզավիճակ պահել։
ArmSport-ը զրուցել է Ժիրայրի հետ՝ Ուկրաինայից տեղափոխության, «Վերեսի» և առաջիկա պլանների մասին։
-Ժիրայր, մինչ ֆուտբոլային հարցերին անցնելը նախ ուզում ենք իմանալ՝ ինչպես կարողացար տեղափոխվել Լեհաստան։ Հայաստանի դեսպանատունը կամ ՀՖՖ-ն օգնե՞լ են այդ հարցում, թե՞ ամբողջովին սեփական նախաձեռնությամբ և միջոցներով ես հեռացել։
-Ես անձամբ կապվեցի ֆեդերացիայի ղեկավարության հետ և պարոն Մելիքբեկյանին տեղեկացրի իրավիճակի մասին։ ՀՖՖ նախագահն իր հերթին կապվեց Լեհաստանում Հայաստանի դեսպանի հետ, և դեսպանի օգնությամբ կազմակերպեցին իմ վերադարձը Հայաստան։
Անչափ շնորհակալ եմ պարոն Մելիքբեկյանին, դեսպան Սամվել Մկրտչյանին և Լեհաստանի հայ համայնքին, մասնավորապես Արտյոմ Պետրոսյանին։
-Իսկ ինչպե՞ս առաջացավ «Վերես» տեղափոխվելու տարբերակը։ Ունեի՞ր առաջարկներ այլ ակումբներից։
-Ակումբը հետաքրքրված էր իմ ծառայություններով և կապ հաստատեց ինձ հետ։ Ունեի այլ առաջարկներ ևս, սակայն ընդունեցի «Վերեսի» առաջարկը։
-Մի շարք ստուգողական հանդիպումների մասնակցեցիր և կարողացար նաև արդյունավետ գործողություններով աչքի ընկնել։ Ամբողջությամբ հարմարվե՞լ էիր նոր թիմին, մարզչի առաջադրանքներին։
-Սկզբում կային որոշ դժվարություններ, սակայն մարզումների և ընկերական խաղերի շնորհիվ հարմարվեցի թե՛ մարզչի առաջադրանքներին, թե՛ թիմին։
-Չնայած չհասցրիր նորամուտդ նշել Ուկրաինայի Պրեմիեր Լիգայում, այնուամենայնիվ, եթե համեմատական տանենք «Վերեսի» և հայկական ակումբների միջև, կա՞ն Հայաստանում այնպիսի ակումբներ, որոնք խաղամակարդակով չեն զիջում, միգուցե գերազանցում են «Վերեսին»։
-Ինձ թվում է՝ այս հարցին ավելի լավ կպատասխանեի առաջնությունում խաղեր անցկացնելուց հետո, բայց կարծում եմ, որ մեր առաջնությունում կան ակումբներ, որոնք կարող են պայքարել Ուկրաինայի Պրեմիեր Լիգայում։
-«Վերեսը» ի՞նչ դիրքորոշում ունի այն խաղացողների վերաբերյալ, որոնք ստեղծված իրավիճակում հեռացել են թիմից։
-Ակումբը կողմ էր այսպիսի որոշմանը, որպեսզի ֆուտբոլիստները կարողանային այլ թիմերում մարզավիճակ պահպանել։
-Ինչպե՞ս առաջացավ «Ուրարտու» տեղափոխվելու տարբերակը, որի սանն ես համարվում։
-Ակումբից կապվեցին ինձ հետ, զրուցեցի գլխավոր մարզչի հետ և ցանկություն հայտնեցի տեղափոխվել։
-Երբ մրցաշրջանն ավարտվի, և, Աստծո կամոք, պատերազմը ևս ավարտված լինի, վերադառնալու՞ ես ուկրաինական ակումբ, թե՞ նախատեսում ես ելույթներդ շարունակել «Ուրարտուի» կազմում։
-Հաշվի առնելով ՖԻՖԱ-ի որոշումը՝ ըստ որի, հունիսի 30-ից հետո ես կրկին համարվելու եմ «Վերեսի» ֆուտբոլիստ, ամեն ինչ լավ լինելու դեպքում կվերադառնամ։
-Հերթական անգամ հրավիրվել ես Հայաստանի ազգային հավաքական, որն օրերս երկու ստուգողական հանդիպում է անցկացնելու։ Ինչպիսի՞ ակնկալիքներ ունես առաջիկա խաղերից։
-Շատ ուրախ եմ, որ հերթական անգամ հրավեր եմ ստացել։ Խաղաժամանակ ստանալու դեպքում կանեմ ամեն ինչ, որպեսզի ինձ լավ դրսևորեմ։
Սուրեն Մելիքսեթյան