Ձմեռային տրանսֆերային պատուհանի ընթացքում հայկական ակումբներն ունենում են ինչպես համալրումներ, այնպես էլ հեռացողներ։
VBET ՀՊԼ-ից հեռացած մի շարք ֆուտբոլիստներ արդեն իսկ գտել են նոր ակումբներ։
«Ալաշկերտից» հեռացած բրազիլացի հարձակվող Մաթեուս Ալեսանդրոն կարիերան կշարունակի հայրենիքում։ Ֆուտբոլիստի նոր ակումբն է «Բոավիշտան»։
Հայաստանի չեմպիոնի կազմից հեռացել է նաև սերբ պաշտպան Միհայլո Յովանովիչը։ 32-ամյա պաշտպանը կարիերան կշարունակի Սամարղանդի «Դինամոյում», որի նորեկներից մեկը «Ալաշկերտում» նրա նախկին խաղընկեր Ալեքսանդր Գլիշիչն է։
Երկու լեգեոներ մեր առաջնությունից տեղափոխվել է Ֆինլանդիա։ «Նոայից» հեռացած Էդուարդս Էմսիսը տեղափոխվել է «Լահտի»։
Չարենցավանի «Վանի» բրազիլացի նախկին ֆուտբոլիստ Բրունո Միգելը ելույթները կշարունակի «Էկենես» ակումբում։
«Ուրարտուի» նախկին կիսապաշտպան Լիվիո Միլտսը տեղափոխվել է Կիպրոս։ 24-ամյա բելգիացու նոր ակումբն է ՊԱԵԵԿ-ը, որի կազմում վերջինս հասցրել է անցկացնել երեք հանդիպում։
«Վանից» հեռացած ևս երկու լեգեոներ վերադարձել է հայրենիք։ Ղրղըզ հարձակվող Էրնիստ Բատիրկանովը տեղափոխվել է «Աբդիշ-Ատա Կանտ» ակումբ։
Բրազիլացի 25-ամյա Լուիս Մենեզեսը կարիերան կշարունակի «Բրազիլ» ակումբում։
«Փյունիկից» հեռացած երկու լեգեոներ ևս վերադարձել է հայրենիք։ Բոսնիացի կիսապաշտպան Ադնան Շեչերովիչը տեղափոխվել է «Սարաևո»։
Վենեսուելացի հարձակվող Խոսե Բալցան էլ ելույթները կշարունակի «Կարաբոբո» ակումբում։
«Սևանի» բրազիլացի նախկին հարձակվող Կլաուդիր Մարինի Ջունիորը տեղափոխվել է Քուվեյթը ներկայացնող «Ալ-Յարմուկ»։
Սերբ կիսապաշտպան Կոստա Ալեքսիչը կարիերան կշարունակի Հունաստանի երկրորդ Սուպերլիգայում՝ մասնավորապես «Իրակլիս» ակումբում։
