Մի քանի օր առաջ ներկայացրել էինք ազատ գործակալի կարգավիճակ ունեցող ֆուտբոլիստների, որոնցից յուրաքանչյուրն իր անցած ճանապարհով և կուտակած փորձով կարող է ուժեղացնել ցանկացած հայկական ակումբ։
Եթե դեռ չեք հասցրել ծանոթանալ այդ խաղացողներն, կարող եք նրանց հետ ծանոթանալ այստեղ։
Իսկ այժմ ներկայացնենք շարքի՝ խոստացված երկրորդ մասը․
1․ 🇨🇮 Սեդրիկ Գոգուա (27 տարեկան, տրանսֆերային արժեքը՝ 500 հազար եվրո)
Իվուարցի պաշտպանը հայրենիքից Եվրոպա է տեղափոխվել 2016 թվականին՝ հանդես գալով ֆիննական ՀԻԿ-ում, այնուհետև փոխել է մի քանի ակումբներ՝ Բելգրադի «Պարտիզան», լատվիական «Ռիգա» և «Դաուգավա», ղազախական «Կայրաթ», ռուսական «ԲՄԱ-Էներգիա», «Տամբով» և «Ռոտոր»։
2020 թվականի օգոստոսին Գոգուան տեղափոխվեց ռուսական լավագույն թիմերից մեկը՝ Մոսկվայի ԲԿՄԱ, սակայն վերջինիս կազմում չկարողացավ ամրապնդվել՝ մինչ օրս բանակայինների կազմում մասնակցելով ընդամենը հինգ հանդիպման։ Պաշտպանն օրերս խզեց պայմանագիրը ԲԿՄԱ-ի հետ և այս պահին ունի ազատ գործակալի կարգավիճակ։
2․ 🇳🇱 Էլջերո Էլիա (34 տարեկան, տրանսֆերային արժեքը՝ 400 հազար եվրո)
Էլիան շարքի ամենաաստղային խաղացողներից մեկն է, որը 2010 թվականին Նիդեռլանդների հավաքականի կազմում դարձել է աշխարհի փոխչեմպիոն։ Այդ ժամանակ եզրային վինգերը խաղում էր գերմանական «Համբուրգում»։ Աշխարհի առաջնությունից հետո ֆուտբոլիստն ուժերը փորձեց նաև «Վերդերում» և Թուրինի «Յուվենտուսում», բայց այդպես էլ չկարողացավ այդ ակումբների համար դառնալ առանցքային խաղացող։
Հետագայում Էլիան հանդես եկավ անգլիական «Սաութհեմփթոնի», թուրքական «Բաշակշեհիրի», հոլանդական «Ֆեյենորդի» և «Ուտրեխտի» կազմում։ 34-ամյա ֆուտբոլիստը «Ուտրեխտից» հեռացել է 2021 թվականի ամռանը և մինչ օրս առանց ակումբի է։
3․ 🇵🇹 Ֆաբիո Կոենտրաու (33 տարեկան, տրանսֆերային արժեքը՝ 400 հազար եվրո)
Եվս մեկ աստղային ֆուտբոլիստ, ով մնացել է առանց ակումբի։ Կոենտրաուի մասին երկար-բարակ խոսել պետք չէ։ Միայն այն փաստը, որ պաշտպանը 106 հանդիպման է մասնակցել Մադրիդի «Ռեալում» և 52 հանդիպում՝ Պորտուգալիայի ազգային հավաքականում, նրա մասին տալիս է անհրաժեշտ բոլոր տեղեկությունները։ Ֆուտբոլիստի վերջին ակումբը եղել է իր հարազատ «Ռիո Ավեն», որտեղից հեռացել է անցած ամռանը։
4․ 🇨🇮 Սալոմոն Կալու (36 տարեկան, տրանսֆերային արժեքը՝ 400 հազար եվրո)
Կալուի կարիերայի գագաթնակետը եղել է Լոնդոնի «Չելսիում» հանդես գալը։ Անգլիական գրանդի կազմում իվուարցի հարձակվողը 2011/12 մրցաշրջանում նվաճել է Չեմպիոնների Լիգայի գավաթը, այնուհետև տեղափոխվել ֆրասիական «Լիլլ»։
2020 թվականի հուլիսին գերմանական «Հերտայում» չորս մրցաշրջան անցկացնելուց հետո Կալուն տեղափոխվեց բրազիլական «Բոտոֆագո», որտեղ խաղաց ինը ամիս և 2021 թվականի ամռանը հեռացավ Բրազիլիայից։ Կոտ դ՛ Իվուարի ազգայի հավաքականում 97 խաղ անցկացրած և 28 գոլ խփած հարձակվողը սպասում է նոր առաջարկների։
5․ 🇲🇦 Մանուել Դա Կոշտա (35 տարեկան, տրանսֆերային արժեքը՝ 450 հազար եվրո)
Ազգությամբ պորտուգալացի Դա Կոշտան կարիերայի ընթացքում հանդես է եկել ֆրանսիական «Նանսիում», հոլանդական ՊՍՎ-ում, իտալական «Ֆիորենտինայում» և «Սամպդորիայում», Լոնդոնի «Վեսթ Հեմում», հունական «Օլիմպիակոսում», Մոսկվայի «Լոկոմոտիվում» և մի շարք այլ ակումբներում։
Անցնելով Պորտուգալիայի տարբեր տարիքային հավաքականներով՝ 2014 թվականին պաշտպանն ընտրել է Մարոկկոյի ազգային հավաքականում հանդես գալու հրավերը, քանի որ նրա մայրը ծնունդով այդ երկրից է։ Աֆրիկյան երկրի ազգային թիմում Դա Կոշտան անցկացրել է 31 գոլ և խփել մեկ գոլ։
Ֆուտբոլիստի վերջին ակումբը եղել է թուրքական «Էրզրումսփորը», որտեղից վերջինս հեռացել է 2021 թվականի ապրիլին։
6․ 🇸🇳 Պապիս Դեմբա Սիսե (36 տարեկան, տրանսֆերային արժեքը՝ 450 հազար եվրո)
Սենեգալցի հարձակվողը հայտնի է գերմանական «Ֆրայբուրգում» և անգլիական «Նյուքասլում» ունեցած ելույթներով։ Սենեգալի հավաքականում Սիսեն մասնակցել է 37 հանդիպման՝ դառնալով 17 գոլի հեղինակ։ Վերջին ակումբը եղել է թուրքական «Ֆեներբախչեն», որտեղից հեռացել է անցած ամռանը։
7․ 🇲🇦 Նաբիլ Էլ Զհար (35 տարեկան, տրանսֆերային արժեքը՝ 500 հազար եվրո)
Մարոկկոյի ազգային հավաքականում 10 հանդիպում անցկացրած և 2 գոլ խփած վիգերը 32 հանդիպման է մասնակցել «Լիվերպուլի» կազմում։ Մարոկկացին 200-ից ավելի հանդիպում է անցկացրել Իսպանիայի Լա Լիգայում՝ պաշտպանելով «Լևանտեի», «Լեգանեսի» և «Լաս Պալմասի» գույները։
Վերջին երկու մրցաշրջանները ֆուտբոլիստն անցկացրել է կատարյան «Ալ-Ահլի» ակումբում, որտեղից հեռացել է անցած ամռանը։
8․ 🇷🇸 Պետար Շկուլետիչ (31 տարեկան, տրանսֆերային արժեքը՝ 500 հազար եվրո)
31-ամյա հարձակվողը Սերբիայի հավաքականի կազմում մասնակցել է վեց հանդիպման և խփել մեկ գոլ։
Ակումբային կարիերայի գագաթնակետը եղել է ֆրանսիական «Մոնպելյեում» հանդես գալը։ Հոկտեմբեր ամսվա վերջից Շկուլետիչն ունի ազատ գործակալի կարգավիճակ։
9. 🇷🇺 Ռոման Նոյշտեդտեր (33 տարեկան, տրանսֆերային արժեքը՝ 600 հազար եվրո)
33-ամյա կիսապաշտպանը ժամանակին երկու հանդիպման է մասնակցել Գերմանիայի ազգային հավաքականում, սակայն, քանի որ ունի նաև ռուսական արմատներ, ՖԻՖԱ-ն նրան թույլատրել է հանդես գալ Ռուսաստանի հավաքականում, որի կազմում մասնակցել է 13 հանդիպման և դարձել մեկ գոլի հեղինակ։ Ֆուտբոլիստի վերջին ակումբը եղել է Մոսկվայի «Դինամոն», որտեղից հեռացել է 2021 թվականի ամռանը։
Սուրեն Մելիքսեթյան
