Օրեր առաջ Հայաստանից հեռացավ Հայաստանի բարձրագույն խմբի առաջնություններում հանդես եկած երբևէ ամենաաստղային ֆուտբոլիստը՝ Յոան Գուֆրանը։
Գուֆրանը «Արարատ-Արմենիա» էր տեղափոխվել 2020 թվականի փետրվարին, 33 տարեկան հասակում։ Բացի պատկառելի տարիքից, վերջինս խաղային պրակտիկայից զուրկ էր ուղիղ մեկուկես տարի, քանի որ, հեռանալով թուրքական «Գյոզթեփեից», մնացել էր առանց ակումբի։ «Արարատ-Արմենիան», կարելի է ասել, ֆրանսիացի հանրահայտ ֆուտբոլիստի համար հրաշալի հարթակ էր՝ ֆուտբոլիստի կարիերան վերածնելու տեսանկյունից։ Այդ մասին Գուֆրանը հետագայում անձամբ էր նշել։
Գուֆրանի համար որոշակի ժամանակ պահանջվեց, մինչև նա կհասներ նվազագույն օպտիմալ մարզավիճակի։ Իհարկե, վստահաբար, մինչև Հայաստանից հեռանալը նա այդպես էլ չունեցավ այն մարզավիճակը, որով աչքի էր ընկնում «Նյուքասլի» և «Բորդոյի» նման ակումբներում։ Բայց անգամ այդ պարագայում ֆրանսիացին իր հսկայական փորձով շատ բան տվեց իր թիմին և առհասարակ հայկական ֆուտբոլին։ Եթե Գուֆրանի նման ֆուտբոլիստը եկել է Հայաստան՝ թեկուզ կարիերան վերսկսելու, ապա կգտնվեն նաև այլ աստղային և փորձառու ֆուտբոլիստներ, որոնք ևս չէն հրաժարվի այդ տարբերակից, պարզապես պետք է ցանկանալ և աշխատել այդ ուղղությամբ։ Չնայած այն հանգամանքին, որ Գուֆրանի տրանսֆերի դիմաց «Արարատ-Արմենիան» գումար չի վճարել որևէ ակումբի, այնուամենայնիվ գրեթե մեկ տարի հսկայական աշխատանք է կատարվել, ընդհուպ վիդեոհոլովակի միջոցով քաղաքին ծանոթացնելը, մինչև վերջինս կտար իր համաձայնությունը։
Անգամ ղազախական «Կայրաթի» պես հարուստ բյուջե ունեցող ակումը չի կարող իրեն թույլ տալ որևէ ֆուտբոլիստի տրանսֆերի դիմաց վճարել մեկ միլիոն եվրո և հրավիրել իր թիմ, բայց կարելի է նման բարձրակարգ խաղացողների հրավիրել ֆուտբոլիստներ գտնել այն ցուցակից, որոնք տարբեր պատճառներով մնացել են առանց ակումբ, և նրանց համար ստեղծել այնպիսի պայմաններ, որ վերջիններս պատճառ չունենան մերժելու առաջարկը։ Հենց նման ճանապարհով «Կայրաթում» խաղացին այնպիսի հանրահայտ և բարձրակարգ ֆուտբոլիստներ, ինչպիսիք են Անդրեյ Արշավինը, Անատոլի Տիմոշչուկը և Վագներ Լավը, իսկ «Տոբոլում»՝ Զորան Տոշիչը։ Այո, կասեք, որ նրանք միայն իրենց կարիերայի մայրամուտում հանդես եկան Ղազախստանում, բայց հաստատապես անգամ այդ դեպքում նրանք էապես օգտակար եղան ղազախական ակումբներին։
Հայկական ակումբներին նման ֆուտբոլիստները նախևառաջ կբերեն, բացի այդ եվրոպական ֆուտբոլի «հարուստ» ճանապարհով անցած և իր անվամբ հետք թողած որևէ աստղային լեգեոներ, որը, թեկուզ իր կարիերայի վերջին տարիներն է անցկացնում, ակումբի ֆուտբոլիստներին իր ներկայությամբ հատուկ զգաստանալու առիթ է տալիս․․․
Սա մեկն է այն պատճառներից, թե ինչ կարող են տալ այդպիսի ֆուտբոլիստները հայկական ակումբներին։ Բայց երկար ծավալվել այս թեմայով այնքան էլ նպատակահարմար չէ։ Միայն մեկ փաստ է, մեղմ ասած, զարմանք առաջացնում․ ինչու՞ հրավիրել 10-15 լեգեոներ, որոնց առկայությամբ չեն լուծվելու ամենատարրական խնդիրներ, եթե կարելի է հրավիրել նման 2-3 լեգեոներ, և այդ խաղացողները կբարձրացնեն թե՛ ակումբի իմիջը, թե՛ խաղամակարդակը։ Միգուցե այս ամենի մասին շատ ավելի լավ են պատկերացնում ակումբների սեփականատերերը, պարզապես նպատակներն են այլ․․․
Շուտով կբացվի ձմեռային տրանսֆերային պատուհանը, և քիչ չեն այն ֆուտբոլիստները, որոնք որոշակի հետք են թողել համաշխարհային ֆուտբոլում և այսօր տարբեր պատճառներով մնացել են առանց ակումբի։ Այդ ֆուտբոլիստների ցանկից ընտրել եմ ամենախելամիտ տարբերակները, որոնց հետ ճիշտ բանակցելու դեպքում ոմանց կարելի է տեսնել մեր ներքին առաջնությունում․
9․ 🇺🇦 Անդրեյ Բլիզնիչենկո (27 տարեկան, տրանսֆերային արժեքը՝ 440 հազար եվրո)
Ուկրաինացի աջ եզրային վինգերն իր կարիերայի ընթացքում հանդես է եկել երեք ակումբներում՝ Դնեպրոպետրովսկի «Դնեպր», թուրքական Սուպերլիգան ներկայացնող «Կարաբյուկսփոր» և մոլդովական «Շերիֆ»։ Հենց Տիրասպոլը ներկայացնող ակումբում է Բլիզնիչենկոն խաղացել վերջին երկու տարիներին, որտեղից էլ հեռացել է անցած օգոստոսին։ 2015 թվականին վիգերի տրանսֆերային արժեքը կազմել է մեկ միլիոն եվրո։ 27-ամյա ֆուտբոլիստը 17 հանդիպման է մասնակցել Ուկրաինայի երիտասարդական հավաքականում։
8. 🇫🇷 Վիլյամ Վանկյոր (32 տարեկան, տրանսֆերային արժեքը՝ 400 հազար եվրո)
Ֆրանսիացի հենակետային կիսապաշտպանը հանդես է եկել այնպիսի ակումբներում, ինչպիսիք են «Մոնակոն», «Ռոման», «Թուլուզը», «Մարսելը», «Նանտը», Մոսկվայի «Դինամոն» և բելգիական «Ստանդարտը»։ 2015 թվականին կիսապաշտպանի տրանսֆերային արժեքը կազմել է 7,5 միլիոն եվրո։ Վանկյորի վերջին ակումբը եղել է թուրքական «Անթալյասփորը», որտեղից վերջինս հեռացել է 2020 թվականի օգոստոսին և մինչ օրս ակումբ չունի։ Նկատենք՝ որքան նմանություն կա Վանկյորի և Գուֆրանի միջև․ երկուսն էլ ֆրանսիացի են, Գուֆրանն էլ մինչև Հայաստան տեղափոխվելը հանդես էր եկել թուրքական ակումբում և մեկուկես տարի ֆուտբոլ չէր խաղացել։
7․ 🇨🇮 Լասինա Տրաորե (31 տարեկան, տրանսֆերային արժեքը՝ 425 հազար եվրո)
Կոտ դ’իվուարցի հարձակվողի կարիերայի գագաթնակետը եղել է ֆրանսիական «Մոնակոյում» հանդես գալը։ Հարձակվողը երկու հանդիպման է մասնակցել նաև անգլիական «Էվերթոնում»։ Բացի նշված աշխարհահռչակ ակումբներից, Տրաորեն խաղացել է Մոսկվայի ԲԿՄԱ-ում, «Կուբանում», «Անժիում», ռումինական «Կլուժում», թուրքական Սուպերլիգայում։ 31-ամյա ֆուտբոլիստը, ում տրանսֆերային արժեքը 2013 թվականին կազմել է 16 միլիոն եվրո, Կոտ դ’ Իվուարի ազգային հավաքականում անցկացրել է 13 հանդիպում և խփել չորս գոլ։ Տրաորեն 2021 թվականի փետրվարից ունի ազատ գործակալի կարգավիճակ։
6․ 🇨🇮 Սեյդու Դումբիա (33 տարեկան, տրանսֆերային արժեքը՝ 450 հազար եվրո)
Հերթական իվուարցի հարձակվողը, որը կարող է ուժեղացնել հայկական ցանկացած ակումբ։ Դումբիան կարիերայի ընթացքում խաղացել է իտալական «Ռոմայում», անգլիական «Նյուքասլում», ինչպես նաև Մոսկվայի ԲԿՄԱ-ում, շվեյցարական «Յանգ Բոյսում», «Բազելում», պորտուգալական «Սպորտինգում»։ 2014 թվականին հարձակվողի տրանսֆերային արժեքը կազմել է 25 միլիոն եվրո։ 33-ամյա ֆուտբոլիստը իր երկրի ազգային հավաքականում մասնակցել է 37 հանդիպման՝ դառնալով ինը գոլի հեղինակ։ Դումբիայի վերջին ակումբը եղել է՝ ուշադրություն․․․ Մալթան ներկայացնող «Համրուն Սպարտանսը», որտեղից հեռացել է 2021 թվականի ամռանը։
5․ 🇪🇨 Ժոաո Պլատա (29 տարեկան, տրանսֆերային արժեքը՝ 500 հազար եվրո)
Էկվադորցի հարձակվողը երբեք Եվրոպայում հանդես չի եկել։ Պլատան կարիերայի զգալի մասն անցկացրել է MLS-ում։ Ֆուտբոլիստը 200-ից ավելի հանդիպման է մասնակցել «Ռեալ Սոլթ Լեյքում»՝ լինելով նաև Յուրա Մովսիսյանի թիմակիցը։ Էկվադորի հավաքականում անցկացրել է հինգ հանդիպում և խփել երկու գոլ։ 2016 թվականին հարձակվողի տրանսֆերային արժեքը կազմել է մեկուկես միլիոն եվրո։ Պլատայի վերջին ակումբը մեքսիկական «Դեպորտիվոն» էր, որտեղից հեռացել է անցած ամռանը։
4․ 🇬🇶 Էմիլիո Նսուե (32 տարեկան, տրանսֆերային արժեքը՝ 500 հազար եվրո)
32-ամյա Նսուեն 150-ից ավելի հանդիպման է մասնակցել իսպանական «Մալյորկայի» կազմում։ Բացի այդ ակումբից ելույթ է ունեցել նաև անգլիական «Բիրմինգհեմում», «Միդլսբրոյում», իսպանական «Ռեալ Սոսյեդադում», Կիպրոսի «Ապոելում»։ Նսուեն ութ հանդիպման է մասնակցել Իսպանիայի երիտասարդական հավաքականում, սակայն ավելի ուշ ընտրել է Հասարակածային Գվինեայի ազգային հավաքականը, որի կազմում 25 խաղում դարձել է 13 գոլի հեղինակ։ Այսօր էլ այդ երկրի ազգային թիմի ավագն է հանդիսանում։ 2011 թվականին կիսապաշտպանի տրանսֆերային արժեքը կազմել է 3,5 միլիոն եվրո։ Նսուեի վերջին ակումբը եղել է «Ապոելը», որտեղից հեռացել է անցած ամռանը։
3․ 🇧🇷 Լեոնարդո (29 տարեկան, տրանսֆերային արժեքը՝ 500 հազար եվրո)
29-ամյա կիսապաշտպանը կարիերայի ընթացքում հանդես է եկել Բելգրադի «Պարտիզանում», Մախաչկալայի «Անժիում», իսկ վերջին տարիներին ելույթ էր ունենում Սաուդյան Արաբիայի և ԱՄԷ-ի ակումբներում։ 2019 թվականին Լեոնարդոյի տրանսֆերային արժեքը կազմում էր չորս միլիոն եվրո։ Այս ֆուտբոլիստը ցանկի լավագույն և ամենահնարավոր տարբերակներից մեկն է, որի տրանսֆերը հնարավոր կլիներ իրականացնել հայկական որևէ ակումբի կողմից։ Արաբական երկրներում ֆուտբոլիստը վստահաբար վերջին տարիներին հասցրած կլինի գումարի տեսքով ամուր պաշար հավաքել, և վատ չէր լինի գնալ նոր մարտահրավերի հետևից, ինչպես ժամանակին արեց բոլորիս միակ վառ օրինակը՝ Գուֆրանը։ Լեոնարդոն ազատ գործակալի կարգավիճակ ունի 2021 թվականի փետրվարից։
2․ 🇳🇱 Լուսիանո Նարսինղ (31 տարեկան, տրանսֆերային արժեքը՝ 600 հազար եվրո)
Թերևս ամենահնարավոր տարբերակը կարող է լինել Լուսիանոյի տեղափոխությունը հայկական ակումբներից մեկը, իսկ եթե ավելի կոնկրետ, այդ ակումբը կարող է լինել «Արարատ-Արմենիան»։ Պատճառը դուք էլ հասկացաք․ նրա ավագ եղբայրը՝ Ֆուրջելը, արդեն երկուսուկես տարի հանդես է գալիս երևանյան ակումբում։ Կրտսեր Նարսինղը 19 հանդիպման է մասնակցել Նիդեռլանդների ազգային հավաքականում, որոնցում դարձել է չորս գոլի հեղինակ։ Լուսիանոյի վերջին ակումբը եղել է «Ֆեյենորդը», որտեղից հեռացել է անցած ամռանը։
1․ 🇷🇸 Բրանիսլավ Իվանովիչ (37 տարեկան, տրանսֆերային արժեքը՝ 500 հազար եվրո)
Շարքի առաջին մասի ամենաաստղային և թերևս ամենաքիչ հավանական տարբերակը, որը կարող է թեկուզ այս տարիքում հանդես գալ հայկական որևէ ակումբում։ Իվանովիչին ծանոթացնելու կարիք ընդհանրապես չկա, նրա փառահեղ կարիերային ծանոթ է ցանկացած ֆուտբոլասեր։ Պարզապես խոստովանենք, որ հրաշալի կլիներ նրա մակարդակի ֆուտբոլիստին տեսնել մեր ներքին առաջնությունում։
Շարունակելի․․․
Սուրեն Մելիքսեթյան
