Կոնֆերենցիաների լիգայի խմբային փուլի երկրորդ տուրում այսօր՝ սեպտեմբերի 30-ին, «Ալաշկերտն» ընդունում է ֆիննական ՀԻԿ-ին։ Նախքան խաղը, ArmSport-ն առաջարկում է ծանոթանալ մրցակցին։
ՀԻԿ հապավումը բացվում է այսպես՝ Հելսինգին Յալկապալլոկլուբի, ինչը թարգմանաբար նշանակում է Հելսինկիի ֆուտբոլային ակումբ։ Այն ստեղծվել է 1907 թվականին ու ինչպես հիմա, այնպես էլ պատմության գրեթե ողջ ընթացքում, հանդես է եկել Ֆինլանդիայի առաջնության Բարձրագույն խմբում։
ՀԻԿ-ի տնային մարզադաշտը «Բոլտ Արենան» է, որը տեղավորում է 10770 հանդիսական։ Այնտեղ թիմը հանդես է գալիս 2000 թվականից։
ՀԻԿ-ը համարվում է Ֆինլանդիայի ամենամեծ և ամենահաջողակ ակումբը, որը 30 անգամ նվաճել է երկրի չեմպիոնությունը, 14 անգամ Գավաթը և 5 անգամ Լիգայի Գավաթը։ Շատ հաջողակ ֆինն ֆուտբոլիստներ են հանդես եկել այս թիմում նախքան արտասահման տեղափոխվելը։
Այն ֆիննական միակ ակումբն է, որը մասնակցել է Չեմպիոնների լիգայի խմբային փուլին։ 1998-ին նրանք փլեյ-օֆֆում նվազագույն հաշվով հաղթել են ֆրանսիական «Մեցին»։ ՀԻԿ-ը մասնակցել է նաև Եվրոպա լիգային՝ 2014/15 մրցաշրջանի փլեյ-օֆֆի ընդհանուր դիմակայությունում 5-4 հաշվով հաղթելով Վիենայի «Ռապիդին»։
Եվրոպական մրցասպարեզում ՀԻԿ-ի ամենախոշոր հաղթանակը եղել է 2011/12 մրցաշրջանում Ուելսի չեմպիոն «Բանգոր Սիթիի» նկատմամբ․ ֆիններն ընդհանուր դիմակայությունում հաղթել են 13-0 հաշվով՝ տնային խաղում մրցակցի դարպասն ուղարկելով 10 անպատասխան գնդակ։
Ակումբի ավանդական գույները երկար ժամանակ է կապույտն ու սպիտակն են։ Ֆուտբոլիստները հագնում են կապույտ-սպիտակ գծավոր մարզաշապիկ, կապույտ կիսավարտիքներ ու գուլպաներ։
Մինչ Կոնֆերենցիաների լիգայի խմբային փուլ հասնելը ՀԻԿ-ը Չեմպիոնների լիգայի առաջին որակավորման փուլի ընդհանուր դիմակայությունում 7-1 հաշվով հաղթել է Պոդգորիցայի «Բուդուչնոստին» (տանը՝ 3-1, արտագնա՝ 4-0): ՉԼ երկրորդ որակավորման փուլում ֆինները տանը նախ 2-2 խաղացին «Մալմյոյի» հետ, ապա հյուրընկալվելիս 1-2 հաշվով պարտություն կրեցին։ Արդյունքում, ընդհանուր դիմակայության 3-4 հաշվով պարտությամբ ՀԻԿ-ը հայտնվեց Եվրոպա լիգայի երրորդ որակավորման փուլում։ Այստեղ ՀԻԿ-ին սպասում էր Բաքվի «Նևթչին»։ Ֆինլանդիայի չեմպիոնը տանը 3 անպատասխան գնդակ ուղարկեց ադրբեջանական թիմի դարպասը, իսկ Բաքվում 2-2 ավարտեց հանդիպումն ու 5-2 հաշվով հաղթանակով դուրս եկավ փլեյ-օֆֆ։
Փլեյ-օֆֆում ֆինների մրցակիցը թուրքական «Ֆեներբահչեն» էր, որի արգելքը հաղթահարել չեղավ։ ՀԻԿ-ը սեփական հարկի տակ պարտվեց 2-5, իսկ մրցակցի հարկի տակ նվազագույն հաշվով ու լքեց պայքարը։
Այսպիսով, ՀԻԿ-ը մրցելույթները շարունակում է Կոնֆերենցիաների լիգայի խմբային փուլում, որտեղ տեղ է գտել A խմբում՝ դառնալով «Ալաշկերտի», ԼԱՍԿ-ի ու «Մաքքաբիի» մրցակիցը։
Ֆինները Հայաստանի չեմպիոնին այսօր կհյուրընկալվեն Վազգեն Սարգսյանի անվան «Հանրապետական» մարզադաշտում։ Խաղի սկիզբը 20:45-ին է։
Ստելլա Բաբլոյան
