Կոնֆերենցիաների լիգայի որակավորման առաջին փուլի պատասխան խաղում «Ուրարտուն» սեփական մարզադաշտում ընդունել էր սլովենական «Մարիբորին» ու նվազագույն հաշվով պարտություն կրեց։ Դիմակայության ընդհանուր 0-2 հաշվով պարտությամբ մեր թիմը դուրս մնաց հետագա պայքարից։
Խաղից հետո «Ուրարտուի» գլխավոր մարզիչ Ռոբերտ Արզումանյանը ասաց հետևյալը․
«Այս խաղը նախորդից տարբերվում էր, iմեզ անպայման հաղթանակ էր պետք ու դա ավելի էր բարդացնում իրավիճակը։ Քանի որ, մանավանդ ուժեղ թիմի դեմ, այլ բան է, երբ դու խաղում ես ու խնդիրը նորից հաղթանակն է, բայց կարող ես լավ պաշտպանվել ու լավ արդյունքով վերադառնալ հաջորդ հանդիպմանը։ Եվ այլ է, երբ խաղում ես ուժեղ թիմի դեմ ու անպայման պիտի հաղթես։ Կարծում եմ՝ թիմի պատկերն ընդհանուր լավն էր, որոշակի խնդիրներ, իհարկե, ունեինք խաղի կառուցման ու եզրափակման հետ կապված։ Այդ խնդիրը մեզ մոտ առաջին անգամը չէ, բայց պիտի աշխատենք դրանց վրա, որպեսզի կարողանանք գոլեր խփել և ավելի վստահ խաղալ։ Գոհ եմ իմ տղաներից։ Սա մեծ փորձ էր թե՛ խաղացողների, թե՛ մեր երիտասարդ մարզչական շտաբի համար։ Հպարտ եմ իմ ֆուտբոլիստներով։ Շատ լավ աշխատանք կատարեցին։ Իրենց հոգնածության ֆոնին՝ մինչև վերջ պայքարեցին, փորձեցին։ Բայց պիտի ընդունենք՝ մրցակիցն ուժեղ էր։ Շնորհավորում եմ նրանց։
Պիտի նախ ձևավորվել ներքին առաջնությունում և մենք այդ ընթացքի մեջ ենք։ Եթե համեմատենք՝ ինչ կար ու ինչ կա հիմա, կարծում եմ՝ մեծ է փոփոխությունը։ Պիտի ներքին առաջնությունն էլ ուժեղ լինի։ Քանի որ մենք համոզվեցինք, որ եվրոպական միջին մակարդակի լավ թիմի դեմ էինք խաղում Նրանք նույնիսկ իրենց ընկերական խաղերն են եվրոպական թիմերի դեմ խաղում։ Մեզ մոտ այդ արագությունների հետ կապված խնդիր կա։
Խաղային սխեմայի փոփոխությունը, եթե անկեղծ լինեմ, օգուտ չտվեց մեզ։ Փորձել էի դաշտ դուրս բերել այնպիսի խաղացողների, որոնք կարծում էի՝ հավանական է, որ գոլեր կխփեն։ Պարտվել ենք, պետք է հասկանանք, որտեղ սխալվեցինք։
Այվազովը ոտքով շատ լավ է խաղում։ Կարող էր նա լարվածություն ունենալ, երկար ժամանակ չէր խաղացել, բայց խնդիրը նրանում չէր։ Շարժունակ չենք, պիտի ավելի շարժունակ լինենք»։