Բրազիլիայի հավաքականի հարձակվող Նեյմարը քննադատել է չիլիացի մրցավար Ռոբերտո Տոբարան, որը սպասարկել է Պերուի հետ Ամերիկայի Գավաթի կիսաեզրափակչի խաղը, և նրան մեղադրել գոռոզության մեջ:
«Մրցավարը չի կարող իրեն այդպես պահել: Այն, թե նա ինչպես էր խոսում ու նայում ֆուտբոլիստներին՝ անարգանք է բոլոր ֆուտբոլիստների նկատմամբ: Առաջին վայրկյանից, հենց ես նրան դիմեցի, նա իրեն շատ գոռոզ պահեց: Կարծում եմ՝ սա նորմալ չէ:
Երկու թիմերն էլ բողոքում էին նրանից, թե այդ մրցավարն ինչպես էր դատում խաղը: Նա կարող է սխալվել, ինչպես և մենք ՝ ֆուտբոլիստներս, բայց Ամերիկայի Գավաթի կիսաեզրափակչի մրցավարը չի կարող իրեն այդքան գոռոզ պահել»,- Նեյմարի խոսքերն է փոխանցում AmericaTV-ն:
Ամերիկայի Գավաթի երկրորդ ֆինալիստը կորոշվի Արգենտինայի և Կոլումբիայի հավաքականների միջև խաղից հետո, որը կկայանա հուլիսի 7-ին և կմեկնարկի Երևանի ժամանակով 05:00-ին: