«Նոա»-ի նորանշանակ ավագ մարզիչ Գրիգորի Միխալյուկը ակումբի մամուլի ծառայության հետ զրույցում խոսել է իր մարզչական կարիերայի ու դավանած ֆուտբոլային փիլիսոփայության, նորացված ակումբի առջև դրված խնդիրների ու նպատակների, տրանսֆերային քաղաքականության, ՈւԵՖԱ-ի Կոնֆերենցիաների գավաթի որակավորման փուլում «Նոա»-ին բաժին հասած մրցակցի մասին:
«Բավականին անսպասելի առաջարկ ստացա ակումբից: Այն բանից հետո, երբ մենք Սանկտ-Պետերբուրգի «Զվեզդա»-ի հետ բավական հաջող մրցաշրջան անցկացրինք, և ես ծանրութեթև արեցի, գնահատեցի…որովhետև, այո, սա այլ երկիր է, այլ մտածելակերպ և պետք է կարողանաս ընդունել մարտահրավերը, կարծում եմ, սա չափազանց հետաքրքիր մարտահրավեր կլինի և ֆուտբոլիստների, և ինձ համար»։
-Ձեր առաջին տպավորությունները «Նոա»-ից, ինչը՞ հավանեցիք և ինչը՞, հակառակը՝ դուր չեկավ:
-Իրականում ամեն ինչ դուր է գալիս. հոյակապ բազա/ակադեմիա, ֆուտբոլային և դրանից դուրս առօրյա կյանքի հետ կապված ամենը շատ բարձր մակարդակով է կազմակերպված: Ինչ վերաբերում է ֆուտբոլիստներին, այո, որոշ առանցքային ֆուտբոլիստներ լքեցին թիմը, բայց թիմի հիմնական առանցքը պահպանվել է, և այդ կորիզին կմիանան մի շարք երիտասարդ նպատակասլաց ֆուտբոլիստներ, որոնց հետ հնարավոր կլինի աճել: Առայժմ ամեն ինչ հոյակապ է:
-Բոլորը ցանկանում են իմանալ ՝ ով է «Նոա»-ի նոր մարզիչը։ Նաև՝ ո՞րն է Ձեր ֆուտբոլային փիլիսոփայությունը։
-Ինքս Սանկտ Պետերբուրգից եմ, մարզչական կարիերաս սկսել եմ բավական երիտասարդ՝ 22 տարեկանից մարզում եմ, արդեն հաջորդ տարվանից ՖՆԼ-ի՝ Ռուսաստանի Առաջին դիվիզիոնի թիմի գլխավոր մարզչի պաշտոնակատարն էի, ունեմ նաև Ռուսաստանի ուժով երրորդ լիգայում՝ ՊՖԼ-ում (Պրոֆեսիոնալ ֆուտբոլային լիգա) ինչպես գլխավոր մարզչի, այնպես էլ օգնականի աշխատանքի փորձ։ Ինչ վերաբերում է ֆուտբոլային փիլիսիսոփայությանը, ապա ես ֆուտբոլիստներց պահանջում եմ ավելի շատ տիրել գնդակին, սակայն ոչ որպես ինքնանպատակ, այլ՝ գրոհ անցկանցնելու, այն տրամաբանական ավարտին հասցնելու համար: Նաև, գնդակը կորցնելու դեպքում ակտիվ պրեսինգ իրականացնենք, գնդակն արագ վերադարձնենք։ Որ խաղը մենք վերահսկենք:
-Ակումբը օրերս հայտարարեց զարգացման նոր ուղու մասին: Ըստ Ձեզ, ինչպիսի՞ն է լինելու այդ նորացված «Նոա»-ն:
-Այստեղ շատ կարևոր է, որ ամբողջությամբ երիտասարդ թիմ չլինի, քանի որ ամեն դեպքում պետք են խաղացողներ, որոնք կկարողանան կառավարել և հուշել երիտասարդ ֆուտբոլիստներին, համարում եմ, որ փորձառուների և երիտասարդների համաձուլումը կարող է լավ արդյունքներ տալ: Լուրջ համալրում էր Ալեքսանդր Կարապետյանի միանալը, որի փորձն ու խաղը կոգեշնչեն և ցույց կտան երիտասարդ ֆուտբոլիստներին, թե ինչպես աճել: Եթե մեզ հաջողվի հստակ 3-4 համալրում անել և պահպանել թիմի այն կորիզը, որը հիմա ունենք, ապա, որքան էլ դա ամպագոռգոռ չհնչի, ի զորու ենք պայքարել նույն դիրքերի համար:
– Ո՞ր դիրքերը, ըստ Ձեզ, առաջին հերթին պետք է ամրապնդվեն։
-Ասելով թիրախային ձեռքբերումների մասին, առաջին հերթին, բնականաբար, նկատի ունեմ դարպասապահին: Բացի այդ, ցանկալի կլիներ համարլրել թիմը նոր կենտրոնական պաշտպանով, քանի որ դժվար կլինի մեր երկու փորձառու կենտրոնական պաշտպանների հետ խաղալ ողջ մրցաշրջանը առանց ռոտացիաների: Ցանկալի կլիներ նաև մեկ ձախլիկ ձախ պաշտպան ունենալ թիմում, հասկանում եմ, որ դժվար է, բայց կարելի է գտնել նման խաղացող ինչպես այս հիասքանչ երկրում, այնպես էլ՝ դրա սահմաններից դուրս: Եվ, ամենայն հավանականությամբ, պաշտպանական ոճի կիսապաշտպան: Մնացած դիրքերը, հարձակումը մեզ մոտ շատ ուժեղ է, ուղղակի ժամանակ է պետք նրանց մոտ լավ փոխըմբռնում ձևավորվի:
— Հուլիսի 8-ին Երևանում կայանալու է Կոնֆերենցիաների գավաթի որակավորման առաջին փուլի «Նոո»-«ԿուՊՍ» հանդիպումը: Հասցրե՞լ եք արդեն ուսումնասիրել մրցակցին։
— Մենք արդեն վերլուծել ենք մրցակցի մի քանի խաղեր, հունիսի 30-ին կնայենք առաջնությունում նրանց հերթական խաղը: Հիմա մեզ համար կարևոր է հասկանալ հենց գնդակով խաղի կառուցումը: Մրցակիցը ուժեղ է, հիմա լավ հաջող հատված է անցկացնում՝ 9-ը խաղերից 7-ում հաղթել է, առաջնությունում 3-րդ տեղում է, շատ արժանի արդյունք է: «ԿուՊՍ»-ը նաև Ֆինլանդիայի գավաթակիրն է, կարծում եմ՝ շատ հետաքրքիր խաղ է բոլորիս սպասում: Իհարկե, տրամադրված ենք հաղթել և անցնել հաջորդ փուլ: Անցած տարի դա չհաջողվեց՝ «Նոա»-ին շատ ծանր մրցակից բաժին հասավ, իսկ այս տարի բոլոր ջանքերը կգործադրենք, որ հնարավորինս երկար ճանապարհ անցնենք Կոնֆերենցիաների գավաթում:
-Հայաստանի Պրեմիեր լիգային անդրադառնանք: Հասցրե՞լ եք հետևել հայկական թիմերի խաղին, գնահատե՞լ եք առաջնության մակարդակը։
-Ձմռանը «Վան» ակումբ էին տեղափոխվել իմ գործընկերները և ես հետևում էի նրանց ելույթներին, ինձ հետաքրքիր էր՝ ինչպես են նրանք խաղը կառուցելու: Ընդհանրապես, համարում եմ, որ Հայաստանում շատ ուժեղ մարզիչներ կան, ոչ միայն անունով, այլև այն սխեմաներով և կառուցվածքներով, որոնք փորձում են ներմուծել: Կարծում եմ, որ այս տարի առաջնությունը շատ հետաքրքիր է լինելու, քանի որ կա 5-6 ուժեղ թիմ, որոնք հավասար պայքար են մղելու: Ակնհայտ է, որ առաջնություն հանդես եկող ֆուտբոլիստները աչքի են ընկնում անհատական որակներով, տեխնիկապես լավ պատրաստված են, յուրաքանչյուր խաղում բավականին բարձր արագություններ են, միակ բանը որ առայժմ փոքր-ինչ պակասում է՝ «տակտիկական հանգստությունն» է:
— Եվ վերջում, Ձեր ուղերձը երկրպագուներին:
— Շատ կուզենայի, որ երկրպագուները մարզադաշտ գալուց հաճույք ստանային խաղից, որովհետև առաջին հերթին մենք խաղում ենք իրենց համար: Եթե մեզ հաջողվի լիքը մարզադաշտեր հավաքել, ֆուտբոլասերները գան, ակտիվորեն երկրպագեն, դրական հույզեր ունենան՝ դա հենց այն է, ինչին մենք ձգտում ենք: Անկեղծ աջակցություն երկրպագուներից, մենք էլ ամբողջությամբ կտրվենք խաղին և ամեն ինչ կանենք դրական արդյունքի հասնելու համար։