«Տամբովի» նախկին գլխավոր մարզիչ Ալեքսանդր Գրիգորյանը մեկնաբանել է Հայաստանի ազգային հավաքականը գլխավորելու վերաբերյալ շշուկները: Ավելի վաղ հաղորդվում էր, որ մասնագետը հայտնվել է նաև «Փյունիկի» ուշադրության կենտրոնում:
Ռուս մեկնաբան Վասիլի Ուտկինն ավելի վաղ հայտարարել էր, որ Գրիգորյանի նշանակումը Հայաստանի ազգային հավաքականի գլխավոր մարզչի պաշտոնում խափանվել է գործակալ Դմիտրի Սելյուկի բացասական մեկնաբանությունների պատճառով.
«Զարմացա, թե որքան շատ էին իմ մասին պատվիրված անհեթեթ հոդվածները ԶԼՄ-ներում՝ որոշ ծաղրածուների կողմից: Այն մարդկանց, ովքեր փորձում են ամեն ինչ անել, որպեսզի ես աշխատանք չունենամ, մեկ բան կասեմ՝ անօգուտ է: Ինչպես և ցանկացած մարզիչ, ես ևս զուրկ չեմ թերություններից: Անօգուտ է ինձ խանգարելը:
Ես հայտնվում եմ այնտեղ, որտեղ ոչ ոք ինձ չի սպասում: Կարող եմ մարզել որտեղ ցանկանաք, նույնիսկ կարող եմ կանանց ֆուտբոլ վերադառնալ: Փողը երբեք ինձ համար առաջնային չի եղել, ես երբեք մեծ գումարներ չեմ վաստակել: Միշտ կայացրել եմ այնպիսի որոշումներ, որոնք բխել են սրտիցս»,- Գրիգորյանի խոսքերն է փոխանցում «Матч ТВ»-ն:
Նշենք՝ Գրիգորյանն ընթացիկ մրցաշրջանում է հեռացել «Տամբովից»: