Լաս Վեգասի Meta Apex արենայում կայացած UFC Vegas 122 (UFC Fight Night 290) մրցաշարում հայկական արմատներով մարտիկ Լեոն Շահբազյանը (12-6 MMA, 0-2 UFC) կրեց իր երկրորդ անընդմեջ պարտությունը աշխարհի ուժեղագույն պրոմոուշենում։ Paramount+-ով հեռարձակվող մրցաշարի նախնական քարտում Շահբազյանը զիջեց ամերիկացի վետերան Նիկո Փրայսին (17-11 MMA, 9-11 UFC):
35-ամյա Փրայսը, ով մայիսին Մայքլ Կիեզայից կրած պարտությունից հետո հայտարարել էր կարիերան ավարտելու մասին, ընդունել էր UFC-ի մեթչմեյքեր Շոն Շելբիի առաջարկը՝ օկտագոն վերադառնալու և սպորտից հաղթանակով հեռանալու համար: Այս մենամարտում Փրայսը պետք է ընդհատեր իր չորս անընդմեջ պարտությունների շարքը, մինչդեռ Շահբազյանը փնտրում էր իր առաջին հաղթանակը UFC-ում:
Մենամարտի հենց առաջին վայրկյաններից Փրայսը մեծ ճնշում գործադրեց մրցակցի վրա: Շահբազյանը հայտնվեց պարտերում և, թեև սկզբում կարողանում էր պաշտպանվել ու փորձում էր ցավեցնող հնարք կիրառել, Փրայսը հեշտությամբ չեզոքացրեց այդ փորձերը: Վերևից աշխատող ամերիկացին սկսեց ծանր հարվածների տարափ տեղալ, ինչի արդյունքում մրցավարը ստիպված եղավ դադարեցնել մենամարտը առաջին ռաունդի 1-ին րոպեի 58-րդ վայրկյանին՝ գրանցելով տեխնիկական նոկաուտ:
Հիշեցնենք, որ Շահբազյանի նորամուտը UFC նույնպես անհաջող էր ստացվել։ 2026 թվականի հունիսի 20-ին նա առաջին ռաունդի ընդամենը 23-րդ վայրկյանին պարտվել էր վրացի Լևան Չոխելիին։ Այսպիսով, հայկական արմատներով մարտիկի պրոֆեսիոնալ ռեկորդը դարձավ 12 հաղթանակ և 6 պարտություն:
Ինչ վերաբերում է հաղթողին, ապա Փրայսը օկտագոնում իր հաղթանակը հուզմունքով նշեց կնոջ և դստեր հետ: Թեև մենամարտը դիտարկվում էր որպես նրա հրաժեշտի ելույթ, «Հիբրիդը» վերջնականապես չհաստատեց կարիերան ավարտելու լուրը:
«Հե՛յ, եթե զանգեք ինձ, ես գուցե պատասխանեմ,- Մայքլ Բիսպինգին տված հետմրցումային հարցազրույցում կատակել է Փրայսը:- Աչքով եմ անում քեզ, Շե՛լբի: Դուք գուցե ինձ նորից տեսնեք, երբեք չես իմանա»։
Getting started QUICK 👀
[ #UFCVegas122 | LIVE NOW on @ParamountPlus ] https://t.co/8KBb5WqICP
— UFC (@ufc) October 10, 2026
