«Նոայի» գլխավոր մարզիչ Սանդրո Պերկովիչը Կոնֆերենցիաների լիգայի որակավորման երկրորդ փուլի՝ մոլդովական «Զիմբրուի» դեմ կայանալիք հանդիպումից առաջ կիսվել է իր սպասումներով և պատասխանել լրագրողների հարցերին։
Խոսելով նախապատրաստական շրջանի մասին՝ Պերկովիչը նշել է.
«Փորձել ենք մրցաշրջանի մեկնարկից առաջ ընկած ժամանակահատվածն օգտագործել հնարավորինս արդյունավետ, և բարեբախտաբար, կարողացանք խուսափել վնասվածքներից։ Մենք շատ էինք ցանկանում ստուգողական հանդիպումներ անցկացնել ուժեղ մրցակիցների հետ, և այդ խաղերից յուրաքանչյուրն օգնեց մեզ ավելի լավը դառնալ թե՛ ֆիզիկապես, թե՛ տակտիկապես, և թե՛ հոգեբանորեն։ Ես շատ գոհ եմ կատարված աշխատանքից»։
– Ունի՞ արդյոք թիմը ներուժ՝ կրկին հասնելու Կոնֆերենցիաների լիգայի խմբային փուլ:
– Իհարկե, մենք ունենք այդ պոտենցիալը և պայքարելու ենք դրա համար մինչև վերջին վայրկյանը։ Բայց, անկեղծ ասած, այժմ ես կենտրոնացած եմ միայն վաղվա խաղի վրա և շատ հեռուն չեմ նայում։ Վաղվա հանդիպումն ամենակարևորն է մեզ համար։
– «Նոան» գերազանցում է «Զիմբրուին» բյուջեով, տրանսֆերային արժեքով և աշխատավարձերով՝ գործնականում բոլոր առումներով: Մանրամասն վերլուծե՞լ եք մրցակցին, թե՞ առավելապես կենտրոնանալու եք ձեր խաղային պլանի վրա:
– Նախորդ մրցաշրջանում մենք կարողացանք հաղթել «ԱԶ Ալկմարին», և ես նույնիսկ չեմ կարող պատկերացնել, թե որքան մեծ էր նրանց բյուջեն՝ մերի համեմատ։ Այո, մենք դիտել ենք «Զիմբրուի» անցկացրած 4 հանդիպումները և խորը վերլուծություն ենք կատարել։ Ես հարգում եմ այս թիմին. նրանք ունեն փորձ և որակ, ուստի մենք նախապատրաստվում ենք շատ լրջորեն։ Սպասում ենք բարդ հանդիպման: Պետք է լիովին կենտրոնացած լինենք խաղի առաջին իսկ վայրկյանից։
– Ձեր կարծիքով, ո՞վ է «Զիմբրուի» լավագույն ֆուտբոլիստը:
– Այնտեղ շատ լավ ֆուտբոլիստներ կան, բայց ինձ համար թիմային խաղն ավելի կարևոր է, քան ֆուտբոլիստների անհատական ցուցանիշներն ու վարպետությունը։ Ես հենց այդ տրամաբանությամբ եմ նախապատրաստում իմ թիմին։
– Ամեն դեպքում, այս դիմակայությունում «Նոան» ֆավորիտ է: Կա՞ արդյոք որևէ հանգամանք, որը կարող է դա փոխել:
– Ինձ համար «Զիմբրուն» իսկապես լավ թիմ է՝ հիանալի խաղացողներով, որոնք ունեն բարձր անհատական որակներ: Անկեղծ ասած, հիմա չեմ մտածում այն մասին, թե ով է ֆավորիտը: Մենք պետք է խաղադաշտում՝ այդ 90 րոպեների ընթացքում ապացուցենք, թե ինչի ենք ընդունակ։
«Զիմբրուն» ունի մեկ առավելություն. նրանք արդեն 4 պաշտոնական հանդիպում են անցկացրել, մինչդեռ մեզ համար վաղվա խաղն առաջինն է լինելու։ Նման հանդիպումները երբեմն կարող են շատ բարդ ստացվել, բայց մենք փորձում ենք կանխատեսել բոլոր հնարավոր դժվարությունները, որոնք կարող են առաջանալ դաշտում։
Հանդիպումը կկայանա այսօր՝ հուլիսի 23-ին, Երևանի ժամանակով 21։00-ին։
