Հայաստանի ազգային հավաքականի գլխավոր մարզիչ Եղիշե Մելիքյանը Ղազախստանի ընտրանու դեմ կայանալիք ընկերական հանդիպումից առաջ կիսվել է իր սպասելիքներով, խոսել թիմի ներկայիս վիճակի, նորեկների ինտեգրման և առկա խնդիրների մասին:
Մասնագետի խոսքով՝ առաջիկա երկու ընկերական մրցավեճերում գլխավոր նպատակը ոչ թե զուտ հաղթանակն է, այլ աշնանը սպասվող պաշտոնական հանդիպումներին հիմնավոր նախապատրաստվելը:
«Մենք հստակ գիտակցում ենք, թե ինչ ենք փնտրում այս խաղերում: Վնասվածքների պատճառով ունենք կորուստներ, կան որոշակի փոփոխություններ: Սա իդեալական հնարավորություն է վերլուծելու մեր սխալները և շտկելու դրանք մինչև աշնանային կարևոր մրցելույթները»,- նշել է Մելիքյանը՝ հավելելով, որ թեև հաղթանակը միշտ էլ ցանկալի է, սակայն այս անցումային փուլում այն ինքնանպատակ չէ:
Անդրադառնալով մրցակցին՝ հավաքականի ղեկավարն ընդգծել է Ղազախստանի թիմի որակական աճը վերջին տարիներին: Նա հատուկ շեշտել է ֆիզիկական պատրաստվածության տարբերությունը. եթե ղազախական լիգան այժմ ընթացքի մեջ է և ֆուտբոլիստները գտնվում են տոնուսի մեջ, ապա հայկական թիմի խաղացողները հավաքին են միացել արձակուրդից հետո: Այդուհանդերձ, ընտրվել է հենց այսպիսի մրցակից, որպեսզի դաշտում ստեղծվեն իրական բարդություններ, որոնք թիմը պետք է սովորի լուծել:
Խոսելով ֆուտբոլիստների անհատական որակներից՝ Մելիքյանը հստակեցրել է, որ Բանդիկյանին դիտարկում է բացառապես պաշտպանական գործողություններում: Ինչ վերաբերում է Էդգար Սևիկյանին, մարզիչը բավականին անկեղծ գնահատական է տվել իրավիճակին.
«Ազգային թիմում երբեմն նկատվում է որակի պակաս, իսկ Սևիկյանն այդ որակն ունի: Ճիշտ է, նա այս պահին իր լավագույն մարզավիճակում չէ, բայց նրա պոտենցիալը հսկայական է, և վստահ եմ՝ ապագայում նա մեծապես կօգնի հավաքականին»:
Նորեկների ներգրավման հարցում Եղիշե Մելիքյանը հորդորել է չշտապել և զերծ մնալ կտրուկ քայլերից՝ հիշեցնելով, որ Հայաստանի առաջնությունում հաջող խաղը դեռ բավարար հիմք չէ ազգային թիմի մեկնարկային կազմում անմիջապես տեղ զբաղեցնելու համար. ամեն ինչ ցույց կտա ժամանակը:
Ասուլիսի ընթացքում շոշափվել է նաև «Ալաշկերտի» գլխավոր մարզիչ Վահե Գևորգյանի հետ ենթադրյալ կոնֆլիկտի թեման:
Մելիքյանը կտրականապես հերքել է որևէ տարաձայնության առկայությունը՝ նշելով, որ ինքն անցած ճանապարհ ունի, գիտակցում է իր կարգավիճակը և չի պատրաստվում մտնել այլ դաշտ կամ մեկնաբանել ուրիշների սուբյեկտիվ կարծիքները:
Եզրափակելով իր խոսքը՝ գլխավոր մարզիչը խիստ ռացիոնալ և իրատեսական գնահատական է տվել հավաքականում ստեղծված իրավիճակին.
«Ես կախարդական փայտիկ չունեմ խնդիրները մեկ վայրկյանում լուծելու համար: Թիմում սերնդափոխություն է, բավականին երիտասարդ կազմ ունենք: Եթե անգամ այս տարի շոշափելի արդյունքներ չգրանցենք, ես հաստատ չեմ հուսահատվի: Այս ամենը ժամանակ և մեծ համբերություն է պահանջում: Վաղ թե ուշ մենք կունենանք այն թիմը, որը կկարողանա ապահովել կայուն և հստակ արդյունք: Եթե համբերությամբ զինվեք, ես թիմին կտանեմ այդ ճանապարհով, եթե ոչ՝ մեկ այլ մասնագետ կգա և կշարունակի գործը»:
Հիշեցնենք, որ Հայաստան — Ղազախստան ընկերական հանդիպումը կկայանա վաղը՝ հունիսի 6-ին, Երևանի Վազգեն Սարգսյանի անվան «Հանրապետական» ստադիոնում: Խաղի մեկնարկը նախատեսված է ժամը 18:00-ին:
