Հայաստանի ազգային հավաքականի և «Կրասնոդարի» կիսապաշտպան Էդուարդ Սպերցյանը Ռուսաստանի առաջնության 28-րդ տուրում Տոլյատիի «Ակրոնի» դեմ կայացած խաղում (0-1) աչքի է ընկել արդյունավետ փոխանցմամբ՝ գրանցելով պատմական ցուցանիշ:
Այսպիսով, «ցուլերի» ավագը հատել է կուբանյան թիմի մարզաշապիկով 100 արդյունավետ գործողության սահմանագիծը: Այս տպավորիչ նվաճման կապակցությամբ 25-ամյա կիսապաշտպանին պաշտոնապես շնորհավորել է «Կրասնոդարի» մամուլի ծառայությունը։
Հատկանշական է, որ Սպերցյանը ակումբի պատմության մեջ ընդամենը երկրորդ ֆուտբոլիստն է (Ջոն Կորդոբայից հետո), ում հաջողվել է գրանցել նման արդյունք: Սակայն, եթե դիտարկենք բացառապես «Կրասնոդարի» ակադեմիայի սաներին, ապա հայ ֆուտբոլիստը բացարձակ առաջատարն է և առաջինը, որը «գոլ + գոլային փոխանցում» համակարգով վաստակել է 100 միավոր:
Հիշեցնենք, որ Սպերցյանի գործող պայմանագրի ժամկետը ռուսական ակումբի հետ ուժի մեջ է մինչև 2029 թվականի ամառ:
