«Լիվերպուլի» գլխավոր մարզիչ Առնե Սլոտը մեկնաբանել է Չեմպիոնների լիգայի քառորդ եզրափակիչի առաջին խաղում ՊՍԺ-ից կրած պարտությունը (0։2)։
«Եթե խոսենք խաղի մասին ընդհանուր առմամբ, կարծում եմ՝ մեր բախտը դեռ բերել է, որ հանդիպումն ավարտվեց 0։2 պարտությամբ, քանի որ նրանք ավելի շատ գոլային պահեր ունեին, քան խփված գոլեր։ Առաջին բաց թողած գնդակն առանձնապես դժվար էր ընդունել. մինչ այդ նրանք գրեթե ոչինչ չէին ստեղծել, իսկ հետո անդրադարձից հետո գնդակը հայտնվեց մեր դարպասում։ Դրանից հետո արդեն նրանք բավականաչափ շանսեր ունեին՝ հաշիվն ավելի խոշոր դարձնելու համար։
Իհարկե, միշտ մտածում ես, որ կարելի է ավելի լավ խաղալ և ստիպել մրցակցին սխալվել։ Բայց հանդիպման մեծ մասում մենք պարզապես փորձում էինք գոյատևել։ Նախորդ մրցաշրջանում նույն պատկերն էր։ Նրանք ավելի ուժեղ էին, բայց մենք չհանձնվեցինք։ ՊՍԺ-ն այս դիմակայությունում մեզ դեռ շանսեր է թողել՝ չօգտագործելով իր մի քանի հնարավորությունները»,- Սլոտի խոսքերն է մեջբերում ՈւԵՖԱ-ի մամուլի ծառայությունը։
Թիմերի միջև պատասխան հանդիպումը կկայանա մեկ շաբաթ անց՝ ապրիլի 14-ին, անգլիական «Էնֆիլդ» մարզադաշտում։ Խաղի մեկնարկը նախատեսված է Երևանի ժամանակով 23։00-ին։
