UFC-ի մարտիկ Շարաբուտդին Մագոմեդովի (առավել հայտնի որպես Շարա Բուլետ) մարզիչ Գոր Ազիզյանը մեկնաբանել է իր սանի և Արման Ծառուկյանի միջև վերջերս կայացած գոտեմարտը։
Հիշեցնենք, որ մարտիկները մրցել էին գրեփլինգի կանոններով, և մենամարտն ավարտվել էր ոչ-ոքի։
Sport24-ին տված հարցազրույցում Ազիզյանը նշել է, որ թեև գրեփլինգը Մագոմեդովի հիմնական մարզաձևը չէ, նա հստակ գործել է նախապես հաստատված կանոնների շրջանակում։
«Սա մեր մարզաձևը չէ, բայց Շարան ցուցադրեց աշխատանք՝ հենց այդ կանոններին համապատասխան։ Ես Արմանի կողմից ցավեցնող հնարքների փորձեր չտեսա։ Կանոնները նախապես էին քննարկվել, և մենք գործում էինք դրանցից ելնելով։ Ի՞նչ իմաստ ուներ Շարայի համար թեյքդաուններ (գետնին տապալում) կատարել, եթե դրանք չեն գնահատվում», — նշել է մարզիչը։
Ազիզյանը նաև անդրադարձել է հանդիսատեսի դժգոհությանը, թե ինչու Ծառուկյանը չհաղթեց՝ չնայած կատարած գցումներին.
«Ըստ այս մարտի կանոնների՝ դու կարող ես մրցակցիդ թեկուզ հարյուր անգամ գցել գետնին, միևնույն է՝ դրանով միավոր չես վաստակում»։
Խոսելով հնարավոր ռևանշի մասին՝ Ազիզյանը չի բացառել այդ տարբերակը՝ նշելով, որ ամեն ինչ կախված է կազմակերպչական հարցերից․
«Ռևա՞նշ։ Կարելի է պայմանավորվել UFC-ի հետ, ինչո՞ւ ոչ։ Եթե դա լինի ցուցադրական մարտ, UFC-ն «կանաչ լույս» կվառի։ Կարելի է մեկնել Բանգկոկ և մրցել թայլանդական բոքսի սիրողական կանոններով։ UFC-ի տղաները սովորաբար դա չեն անում, քանի որ դրա համար չեն վճարում։
Շարան բազային հարվածային ոճի մարտիկ է, որը տանել չի կարողանում ըմբշամարտը։ Բայց նա դուրս է գալիս գրեփլինգի մրցման, և նրան չեն կարողանում հաղթել»,- եզրափակել է Ազիզյանը։
