Ֆուտբոլային շուկան անկայուն է և անկանխատեսելի։ Ֆուտբոլիստի տրանսֆերային արժեքի վրա կարող է ազդել ամեն ինչ՝ վնասվածքները, մարզավիճակի անկումը, մարտավարական փոփոխություններն ու նույնիսկ տարիքը։ 2025 թվականն այս առումով բավականին ցուցադրական ստացվեց․ համաշխարհային ֆուտբոլի մի շարք աստղեր զգալիորեն «էժանացան»։
ArmSport.am-ը ներկայացնում է այն 5 ֆուտբոլիստներին, որոնք ընթացիկ օրացուցային տարում գրանցել են տրանսֆերային արժեքի ամենամեծ անկումը։
1. Գավի (21 տարեկան, «Բարսելոնա»)
Արժեքը տարեսկզբին՝ 80 մլն եվրո
Ընթացիկ արժեքը՝ 40 մլն եվրո
Տարբերությունը՝ -40 մլն եվրո
Դեռ վերջերս Գավին համարվում էր «Բարսելոնայի» և Իսպանիայի հավաքականի գլխավոր հույսերից մեկը, սակայն ծանր վնասվածքը նրան երկար ժամանակով դուրս թողեց շարքից։ Վերադարձից հետո երիտասարդ կիսապաշտպանը միայն դրվագներով էր հիշեցնում իր նախկին խաղը։ Մասնագետների կարծիքով՝ խնդիրը խաչաձև կապանների վնասվածքի հետևանքներն էին։ Ցավոք, ընթացիկ մրցաշրջանի մեկնարկին ֆուտբոլիստը ստիպված եղավ ենթարկվել ևս մեկ վիրահատության, ինչը նրան խաղադաշտից կտրեց առնվազն ևս կես տարով։
2. Ռոդրիգո (24 տարեկան, «Ռեալ Մադրիդ»)
Արժեքը տարեսկզբին՝ 100 մլն եվրո
Ընթացիկ արժեքը՝ 60 մլն եվրո
Տարբերությունը՝ -40 մլն եվրո
«Ռեալում» Խաբի Ալոնսոյի գլխավոր մարզիչ նշանակվելուց հետո Ռոդրիգոն կորցրեց իր տեղը մեկնարկային կազմում։ Սկզբնական շրջանում բրազիլացին ստանում էր չնչին խաղաժամանակ կամ ընդհանրապես մնում պահեստայինների նստարանին։ Այնուամենայնիվ, վերջին հանդիպումներում իրավիճակը փոխվել է․ Ռոդրիգոն կրկին հայտնվում է հիմնական կազմում, իսկ ըստ շրջանառվող լուրերի՝ Ալոնսոն սկսել է ավելի շատ վստահել հարձակվողին։ Իսպանացի մասնագետը նույնիսկ արգելափակել է հունվարին ֆուտբոլիստի հնարավոր տեղափոխությունը։ Եթե բրազիլացին շարունակի արդյունավետ խաղ ցուցադրել, նրա տրանսֆերային արժեքը կրկին կսկսի աճել։
3. Վինիսիուս Ժունիոր (25 տարեկան, «Ռեալ Մադրիդ»)
Արժեքը տարեսկզբին՝ 200 մլն եվրո
Ընթացիկ արժեքը՝ 150 մլն եվրո
Տարբերությունը՝ -50 մլն եվրո
Մադրիդյան գրանդի ևս մեկ ներկայացուցիչ, որը զգալի տրանսֆերային արժեքի հետընթաց է գրանցել։ Վինիսիուսի արժեքի կտրուկ անկումը կապված է նրա անկայուն խաղի և ոչ միանշանակ վարքագծի հետ։ Անկասկած, ֆուտբոլիստի հոգեբանական վիճակի վրա ազդել են նախորդ տարվա «Ոսկե գնդակի» արդյունքները, քանի որ բրազիլացին մեծ հույսեր էր կապում այդ մրցանակի հետ։ Բացի այդ, խաղային անկման վրա կարող է ազդել նաև պայմանագրային անորոշությունը։ «Ռեալը» տևական ժամանակ է՝ չի կարողանում համաձայնության գալ ֆուտբոլիստի հետ, ինչի ֆոնին ակտիվանում են Սաուդյան Արաբիա հնարավոր տեղափոխության մասին խոսակցությունները։
4. Ռոդրի Էռնանդես (29 տարեկան, «Մանչեսթեր Սիթի»)
Արժեքը տարեսկզբին՝ 130 մլն եվրո
Ընթացիկ արժեքը՝ 75 մլն եվրո
Տարբերությունը՝ -55 մլն եվրո
Ռոդրիի պարագայում գնանկումը բացառապես պայմանավորված է առողջական խնդիրներով։ Խաչաձև կապանների պատռվածքից ապաքինվելուց հետո էլ իսպանացին շարունակում է խնդիրներ ունենալ ծնկի հետ։ Պրեմիեր լիգայի ընթացիկ մրցաշրջանում նա մասնակցել է ընդամենը վեց հանդիպման, ուստի 55 միլիոն եվրոյի կորուստը տրամաբանական է թվում՝ հաշվի առնելով նաև ֆուտբոլիստի տարիքը։
5. Ֆիլ Ֆոդեն (25 տարեկան, «Մանչեսթեր Սիթի»)
Արժեքը տարեսկզբին՝ 140 մլն եվրո
Ընթացիկ արժեքը՝ 80 մլն եվրո
Տարբերությունը՝ -60 մլն եվրո
2025 թվականի ամենաշատ արժեզրկված ֆուտբոլիստը «Մանչեսթեր Սիթիի» հարձակողական ոճի կիսապաշտպան Ֆիլ Ֆոդենն է, որը տարեսկզբին գնահատվում էր 140 միլիոն եվրո։ Այս գնահատականը, սակայն, վիճելի է, քանի որ Ֆոդենը շարունակում է մնալ «Սիթիի» առանցքային խաղացողներից մեկը։ Թեև նա այժմ այն մարզավիճակում չէ, ինչ մի քանի տարի առաջ, նույնը կարելի է ասել ամբողջ թիմի մասին։
Ընդհանուր առմամբ, Ֆոդենի վիճակագրությունը վատը չէ՝ 23 խաղում 10 գոլ և 4 գոլային փոխանցում։ Ավելին, Սուրբծննդյան խաղերի շրջանում անգլիացին գտնվում էր իր լավագույն մարզավիճակում՝ նոյեմբերի վերջին և դեկտեմբերի սկզբին Պրեմիեր լիգայի 4 խաղում վաստակելով 7 միավոր (գոլ+փոխանցում)։
