Սա ճանապարհ է դեպի մեծ բռնցքամարտ․ Մանրամասնում է նորաստեղծ ֆեդերացիայի նախագահը

Համահայկական բռնցքամարտի և պրոֆեսիոնալ մարզաձևերի ֆեդերացիան  Հայաստանում գործում է մեկ տարուց ավելի։ Ֆեդերացիայի նախագահը նախկին բռնցքամարտիկ Գառնիկ Հարությունյանն է, փոխնախագահը՝  նախկին բռնցքամարտիկ, վերջին տարիներին մարզչական գործունեություն ծավալող Արթուր Կրիկյանը։ Պրոֆեսիոնալ բռնցքամարտի հավաքական թիմն այս օրերին հավաք է անցկացնում Ծաղկաձորում։ ArmSport–ի հետ զրույցում Հարությունյանն ու Կրիկյանը խոսել են ֆեդերացիայի հիմնադրման, գործունեության, հավաքական թիմի հավաքի, ինչպես նաև առաջիկա ծրագրերի մասին։

«Ֆեդերացիայի հիմնադրման նպատակն է աջակցել ու զարգացնել սպորտը Հայաստանում, ինչպես նաև աջակցել արտերկրում գտնվող մեր հայ մարզիկներին, որպեսզի կարողանան հանդես գալ եռագույնի ներքո, հնչեցնել մեր հիմնը, ուժեղացնել մեր երկիրը սպորտային առումով, որովհետև մենք ոլորտի մարդիկ ենք ու տեսնում ենք, որ ինչ-որ տեղ կաղում է մարզաձևը։

Պետք է զարգացնենք ոլորտը, ունենք մեծ պոտենցիալ, լավ մարզիկներ, որոնք արտերկրում են հանդես գալիս, քանի որ թե՛ ֆինանսապես, թե՛ բարոյապես, ուրիշ երկրներում լավ են վերաբերվում մարզիկներին, հատկապես՝ բռնցքամարտիկներին։ Այդ պատճառով ամբողջ աշխարհում ավելի շատ հայ բռնցքամարտիկ կա, քան հենց Հայաստանում: Ցավալի է, բայց դա փաստ է: Այդ պատճառով մենք որոշել ենք զարկ տալ պրոֆեսիոնալ բռնցքամարտին: Մեզ ճանաչում են ամբողջ աշխարհում, մեզ հետ պայմանագիր են կնքում կամ համագործակցում համաշխարհային կազմակերպությունները, որոնք իրենք են որոշում չեմպիոնական թե՛ գոտիները, թե՛ մենամարտերը։

Գնալով ավելի  կբարելավենք մեր դիրքերը համաշխարհային ասպարեզում: Նրանք բոլորը համագործակցում են մեզ հետ, տեսել են մեր ուժն ու պոտենցիալն ու հավանում են մեր մոտեցումը սպորտին, թե՛ բարոյական և թե՛ սպորտային առումով: Այս ամենի նպատակը ո՛չ թե բարելավել մեր անձնական կարիքները, շահերը, այլ՝ աճեցնել ու զարգացնել մարզաձևը երկրում,  որպեսզի մարզիկները բարելավեն իրենց բարոյական, ֆիզիկական և ցանկացած տեսակի շահերը։ Այդ մարզիկները մանկուց սպորտի մեջ են եղել, նպատակ ունենալով ինչ-որ բանի հասնել՝ ծախսում են իրենց ժամանակը, էներգիան, չեն հասնում ոչնչի և հիասթափված գնում են։ Մենք  փորձում ենք հակառակն անել: Եթե մարդը տրամադրվել է և ամեն ինչ ներդրել է այդ գործում, որպեսզի ստանա  արդյունք, ուրեմն մենք կօգնենք նրան: Փորձում ենք օգնել բացառապես բոլորին:

Օգնել, աջակցել՝ բառի ամենաբուն իմաստով, և ոչ թե խանգարել կամ ինչ-որ մեկին շարքից հանել, կամ նմանատիպ  բաներ: Մենք աջակցելու ենք բոլորին՝ անկախ նրանից, թե ինչքանով մեզ կօգնեն կամ կխանգարեն, անկախ նրանից թե ինչքանով կփորձեն այլ տպավորություններ ստեղծել մարդկանց մոտ: Մենք բարի գործ ենք անում, ունենք լավ նպատակներ և կհասնենք դրանց»,–ներկայացնելով ֆեդերցիայի հիմնադրման գաղափարը՝ ասում է նախագահ Գառնիկ Հարությունյանը:

Նրա խոսքով, հավաքական թիմը ստեղծվել է  եղած մարզիկներից, լավագույն բռնցքամարտիկներից, իսկ հետո շեշտը կդնեն նաև նոր բռնցքամարտիկներ պատրաստելու վրա:

«Քանի որ մարզաձևը պրոֆեսիոնալ է, ու այնտեղ ներկայացվում են ուժեղագույնները, մենք ներկայացնում ենք մեծահասականերին, ովքեր ինչ-որ հաջողություններ են ունեցել  կամ ունեն մեծ պոտենցիալ: Դրանից հետո մենք կպատրաստենք ուժեղ բռնցքամարտիկներ, քանի որ չի կարելի հիմնվել միայն ամենալավերի վրա, ովքեր արդեն գործող մարզիկ են: Մենք պետք է զրոյից ստեղծենք, գտնենք տաղանդը, պոտենցիալը: Մեր մարզիկներին մենք ներկայացրել ենք միջազգային մրցասպարեզում, որոնք կարողացել են լավագունս դրսևորել իրենց: Բնագավառը ինքնին փոխկապակցված է՝ թե՛ մարզիչների, թե՛ մարզիկների և թե՛ կազմակերպիչների առումով: Ամեն մեկը պետք է իր գործը ճիշտ անի»,–նշում է Հարությունյանը։

Նախորդ տարի պրոֆեսիոնալ բռնցքամարտի հավաքականը մասնակցել է մի շարք միջազգային մրցաշարերի՝ թե՛ սիրողական, թե՛ պրոֆեսիոնալ։

«Մասնակցել ենք բազմաթիվ մրցաշարերի, որտեղ հասել ենք մեծ հաջողությունների: Սիրողական մրցաշարերում բավականաչափ մեդալներ ենք բերել, և դա երկրի համար է և ոչ թե մեր անձնականի:  Նույնը պրոֆեսիոնալ բռնցքամարտում կարողացել ենք մտերիմ հարաբերություններ ստեղծել համաշխարհային կազմակերպությունների հետ՝ հատկապես WBC-ի, որը մեզ հրավիրել է Մեքսիկա, որտեղ գտնվում են աշխարհի ուժեղագույն բռնցքամարտիկները: Բայց մեր բռնցքամարտիկները կարողացել են ապացուցել, որ մեքսիկացիներն այդքան ուժեղ չեն, որքան խոսում են նրանց մասին, քանի որ մեր մասին չգիտեին: Այնտեղ հասկացան, որ մենք այն ուժեղագույններից ենք, որ կարող ենք զարմացնել ամբողջ աշխարհին»,–նկատում է նորաստեղծ ֆեդերացիայի նախագահը:

Գառնիկ Հարությունյանն անդրադարձավ նաև Հայաստանի բռնցքամարտի ֆեդերացիայի հետ համագործակցությանը․

«Մենք անում ենք ամեն ինչ միայնակ: Մենք փորձել ենք համագործակցել բոլոր այն կազմակերպությունների հետ, ովքեր մեր պատկերացմամբ պետք է շահագրգռված լինեին մարզաձևը զարգացնելու հարցում, ովքեր ներկայացնում են մարզաձևը կամ սպորտը Հայաստանում: Հանդիպել ենք խոչընդոտների, մարդիկ կամ կազմակերպությունները չեն փորձել մեզ հետ համագործակցել, ամեն ինչ արել ենք մեր ուժերով, ու մեր ուժերով ենք հաղթահարել բոլոր խոչընդոտները ու հասել նրան, ինչ որ ունենք այսօր: Սա բռնցքամարտիկների համար միակ ճանապարհն է մեծ հաջողությունների հասնելու համար պրոֆեսիոնալ բռնցքամարտում, և մենք կօգնենք բոլորին՝ անկախ նրանից, թե ում հետ են աշխատել կամ աշխատում: Մեզ պետք չէ այդ հաղթանակները վերագրել մեզ, մենք օգնում ենք անշահախնդիր: Եթե կփորձեն խանգարել, ասեմ, որ իրենց մոտ չի ստացվի: Ավելի լավ է համագործակցեն, որովհետև մենք հենց իրենց ենք օգնում»։

Փոխնախագահ Արթուր Կրիկյանի խոսքով, համագործակցության համար բազմիցս են առաջարկ արել ՀԲՖ–ին, բայց մերժում են ստացել։

«Մեր գործունեությունն ի օգուտ է սիրողական և պրոֆեսիոնալ բռնցքամարտի: Մեր առաջարկը եղել է, որ օգնենք և շատ մրցաշարերի տանենք բռնցքամարտիկներին: Մենք կապ ունենք բոլոր երկրների ֆեդերացիաների հետ։ Այսօր պրոֆեսիոնալ և սիրողական բռնցքամարտերը քույր ու եղբայներ են, դրա համար աշխատում ենք երկու ուղղություններով: Այսօր թույլատրվում է միաժամանակ մենամարտեր անցկացնել պրոֆեսիոնալ և սիրողական բռնցքամարտում: Ամեն դեպքում, չենք բողոքում ոչ մեկից, կանգնած ենք բռնցքամարտի կողքին:»,–ասում է Կրիկյանը:

Կրիկյանից տեղեկանում ենք, որ  WBC-ի նախագահի հրավերով եղել են Մեքսիկայում, մասնակցել միջազգային կոնֆերանսի, որտեղ գտնվել են WBC–ն ներկայացնող աշխարհի բոլոր պրոմոութերական ընկերությունները։ Ֆեդերացիան նաև պայմանագիր ունի Golden Boy համաշխարհային պրոմոութերական ընկերության հետ։ 

Խոսելով առաջիկա անելիքների մասին՝ ֆեդերացիայի նախագահն նշում է․

«Հիմա ուսումնամարզական հավաքներ ենք անցկացնում՝ առաջնահերթ մարզավիճակը բարելավելու և Հայաստանի առաջնությանը պատրաստվելու համար, որից հետո ունենք նախատեսված մրցաշարեր և հանդիպումներ այլ երկրների հետ: Այս տարի պլանավորված են շատ միջազգային մրցաշարեր սիրողական և պրոֆեսիոնալ բռնցքամարտում: Մնացածը ցույց կտա մարզիկների ֆիզիկական վիճակը: Իհարկե, կան նպատակներ, որոնք որ առաջնահերթ կլինեն,ու կխանգարեն մեր պլաններին, քանի որ կարիք կլինի, որ մեր մարզիկները մասնակցեն Եվրոպայի առաջնությանը, որը տեղի կունենա Երևանում։

Բնականաբար առաջնահերթ մեր հարցը կլինի մասնակցությունն այդ մրցաշարերին և ոչ թե մեր պլանավորված մրցաշարերին: Պլանները նախնական են, պետք է անենք այն, ինչն այդ պահին առաջնահերթ է: Մեր ցանկությունն է, որ մեր մարզիկները մշտապես ֆիզիկապես պատրաստ լինեն որևէ մրցաշարի մասնակցելու համար»,– եզրափակեց իր խոսքը Գառնիկ Հարությունյանը: