Հայաստանի ազգային հավաքականն այսօր կանցկացնի ԱԱ–2022–ի ընտրական փուլի հերթական հանդիպումը։ Կապառոսի թիմն արտագնա խաղում կմրցի Իսլանդիայի ընտրանու հետ։ Այս հանդիպումը թիմերի համար կլինի 5–րդը։
Հայաստանի հավաքականի տպավորիչ մեկնարկն ու իսլանդացիների ձախողումը
Տպավորիչ մեկնարկից հետո մեծ հույսեր արթնացան, որ Հայաստանի հավաքականն ընտրական այս ցիկլում ի զորու է պայքարել աշխարհի առաջնության եզրափակիչ փուլի ուղեգրի համար։ Առաջին երեք խաղերից հետո Հայաստանի թիմը վաստակած 9 միավորով գլխավորում էր խմբի մրցաշարային աղյուսակը՝ իրենից հետ թողնելով աշխարհի եռակի չեմպիոն Գերմանիայի ընտրանուն։ Սեպտեմբերյան խաղերից հետո Հայաստանի թիմը կարող էր մի քանի տեղով նահանջել մրցաշարային աղյուսակում, սակայն մյուս խաղերում գրանցվեցին արդյունքներ, որ օգուտ էր միայն մեզ: Հայաստանի հավաքականն ինքը դժվարեցրեց իր գործը՝ միավորներ կորցնելով հատկապես Լիխտենշտեյնի հետ խաղում, և հիմա ցանկացած միավորի կորուստ կարող է ճակատագրական լինել: 6-րդ տուրից հետո Հայաստանի հավաքականն ունի 11 միավոր և մեկ միավորով է գերազանցում երկրորդ տեղում գտնվող Ռումինիային, և 2 միավորով՝ 4-րդ տեղում գտնվող Հյուսիսային Մակեդոնիային:
Իսլանդացիների համար ընտրական այս փուլն ամենևին էլ հաջող չէր: Թիմը գործնականում զրկվել է երկրորդ տեղը գրավելու հնարավորությունից: Անցկացրած 6 խաղից հետո Իսլանդիան ունի ընդամենը 4 միավոր: Այդ խաղերում իսլանդացիները խփել են 6 գոլ՝ բաց թողնելով 14-ը:
Ընտրական այս ցիկլում թիմերն արդեն հանդիպել են։ Մարտի 28–ին Երևանում կայացած խաղում Հայաստանի ընտրանին երկու անպատասխան գնդակ ուղարկեց վիկինգների դարպասը։ Գոլի հեղինակ դարձան Տիգրան Բարսեղյանն ու Խորեն Բայրամյանը։ Այդ խաղից բացի թիմերը հանդիպել են 3 անգամ։
Առավելությունը իսլանդացիների կողմն է
Երկու հավաքականները նույն խմբում էին ընգրկվել նաև Եվրո-2000-ի ընտրական փուլում: Առաջին խաղը կայացել է 1998 թվականի հոկտեմբերի 10-ին՝ «Հրազդան» ստադիոնում։ Այդ խաղում գոլեր չեն գրանցվել։ 1999 թվականին Ռեյկյավիկում կայացած խաղում տանտերերը հաղթել են 2։0 հաշվով։
Թիմերը ևս մեկ անգամ հանդիպել են 2008 թվականին։ Այդ ընկերական խաղում իսլանդացիները կրկին հաղթել են 2։0 հաշվով։ Կայացած 4 խաղերում 2 հաղթանակ տարել են իսլանդացիները, մեկ հաղթանակ Հայաստանի ընտրանին, մեկ խաղ էլ ավարտվել է ոչ–ոքի։ Իսլանդիայի հավաքականը խփել է 4 գոլ՝ բաց թողնելով 2–ը։
Իսլանդական հեքիաթը
Առաջին պաշտոնական հանդիպումը Իսլանդիան անցկացրել է 1930 թվականին՝ մրցելով Ֆարերյան կղզիների դեմ (0-1)։ Ամենամեծ հաշվով հաղթանակը իսլանդացիները տարել են 1985 թվականի հուլիսի 10-ին՝ 9 գնդակի առավելությամբ հաղթելով Ֆարերներին։ 1967 թվականի օգոստոսի 23-ին Իսլանդիան տարավ իր ամենածանր պարտությունը՝ 2։14 հաշվով պարտվելով Դանիայի հավաքականին։
Իսկ հավաքականի ամենամեծ հաջողությունը կարելի է համարել Եվրո-2016-ում ունեցած ելույթները։ Իրենց պատմության մեջ առաջին խոշոր մրցաշարում փայլուն հանդես եկան՝ դուրս գալով մրցաշարի քառորդ եզրափակիչ, և ամբողջ աշխարհին ապացուցեցին, որ Իսլանդիայի նման փոքրիկ բնակչություն ունեցող երկրում ևս ֆուտբոլ խաղալ գիտեն։ 2018-ին Իսլանդիայի ընտրանին մասնակցեց Ռուսաստանում կայացած Աշխարհի առաջնությանը, սակայն չկարողացավ հաղթահարել խմբային փուլի արգելքը։
Բուքմեյքերների գործակիցները
Չնայած մրցաշարային աղյուսակում զբաղեցրած դիրքերին՝ բուքմեյքերներն այդուհանդերձ նախապատվությունը տալիս են տանտերերին, որոնց հաղթանակի գործակիցը գնահատվում է միջինը 2,2 գործակցով: Հայաստանի հավաքականի հաղթանակի միջին գործակիցը 3,2 է:
J խմբի՝ այսօր կայանալիք մյուս խաղերում Հյուսիսային Մակեդոնիան կհյուրընկալվի Լիխտենշտեյնի թիմին, իսկ Գերմանիայի ընտրանին կընդունի Ռումինիայի թիմին:
Երվանդ ՀԱԿՈԲՅԱՆ