Ուրախ եմ` վերադարձել եմ և կարող եմ օգնել թիմին զբաղեցնել իր արժանի տեղը․ Մայրովիչ

25-ամյա հարձակվող Մաքսիմ Մայրովիչը «Նոա» վերադառնալուց հետո հարցազրույց է տվել ակումբի մամուլի քարտուղարությանն ու խոսել թիմ վերադառնալու, մեկնարկած մրցաշրջանի, նոր թիմակիցների ու ռմբարկուական հավակնությունների մասին։

— Բարի վերադարձ «Նոա», Մաքսիմ։ Ուրա՞խ ես, որ կրկին հանդես ես գալու Հայաստանի Պրեմիեր լիգայում։

— Իհարկե՜, ուրախ եմ։ Այս ակումբը ինձ համար նոր հնարավորությունների դուռ բացեց՝ փորձել ուժերս Ռուսաստանում, ինչ-որ տեղ հաջողեցի, ինչ-որ տեղ՝ ոչ, դրա համար էլ այստեղ եմ։ Ես և մի քանի տղաներ հիմա միացանք ակումբին, քանի որ ներկա պահին «Նոա»-ն ուժեղացնելու, լավ արդյունքներ գրանցելու կարիք կա:

— Երբ անցած տարվա դեկտեմբերին տեղափոխվեցիր Ռուսաստան, «Նոա»-ում այլ մարզչական կազմ էր, ֆուտբոլիստներ։ Իչպիսի՞ն են առաջին տպավորություններդ հին-նոր ակումբից և թիմակիցներից։ Նաև ի՞նչ կարծիքի ես «Նոա»-ի նոր փիլիսոփայության մասին։

— Կարող եմ ասել, որ թիմում լավ մթնոլորտ է տիրում, լավ ֆուտբոլ ենք ցուցադրում, առայժմ միգուցե ինչ-որ բան չի ստացվում, պարտվեցինք իմ մասնակցությամբ առաջին՝ «Փյունիկ»-ի դեմ ընկերական խաղում, բայց փնտրում ենք մեր խաղը, հույս ունեմ կհաղթենք արդեն առաջնության առաջիկա խաղերում։

— Հետևե՞լ ես արդյոք Հայաստանի Պրեմիեր լիգայի առաջին մրցափուլերին, որոնք այնքան էլ հաջող չէին «Նոա»-ի համար։ Ինչո՞վ էր, ըստ քեզ, դա պայմանավորված։

— Թերևս, պատճառն այն է որ ամռանը թմից հեռացան մի շարք առանցքային ֆուտբոլիստներ, ստացվեց թիմի ամբողջական վերափոխում, ինչը իր հետ որոշակի դժվարություններ բերեց։ Ես այս երևույթին հանդիպել եմ նաև Ռուսաստանում, երբ կես տարին մեկ նոր թիմ է հավաքվում և դժվար է արդյունքի հասնել։ Այդ պատճառով հիմա պետք է շատ աշխատենք մարզումներին և շարժվենք ճիշտ ուղղությամբ։ Անկեղծ ասած, ընթացիկ մրցաշրջանի խաղերին այնքան էլ չեմ հետևել՝ ամբողջական խաղեր չեմ նայել, Instagram-ում տեսել եմ միայն «Նոա»-ի խփած գոլերը․․․ Ինչ վերաբերում է վեկտորի փոփոխությանը, ապա ճիշտ է հույսերը երիտասարդ ֆուտբոլիստների հետ կապելը, բայց դա երկարաժամկետ նպատակների խնդիր է, ինչը իր արդյունքները կտա ավելի ուշ։ Ես այս հարցով հանգամանալից քննարկում մարզչի հետ դեռ չեմ ունեցել։

— Մաքսիմ, Հայաստանի 2019/20թթ․ առաջնությունում դու լավագույն ռմբարկուների շարքում էիր՝ խփած 11 գնդակներով։ Հիմա ինչպիսի՞ն են ռմբարկուական հավակնություններդ։

— Ես թիմին միացա ոչ մրցաշրջանի մեկնարկից, ուստի հիմա դժվար է այդ մասին խոսելը։ Հիմա կարևոր չէ, թե ես որքան գոլ կխփեմ, գլխավորը՝ թիմը հաղթի և շարժվի առաջ, ես էլ իմ կողմից կանեմ հնարավոր ամենը, իսկ ռմբարկուական մրցավազքի մասին չեմ մտածի՝ գոնե մինչև դեկտեմբեր։

— Քննարկե՞լ ես խաղային դիրքդ մարզչի հետ, հաշվի առնելով, որ ներկայում «Նոա»-ի հարձակման գծում մրցակցություն կա, այդ թվում՝ կենտրոնական հարձակվողի դիրքում։

— Ինչպես նախկինում էի նշում՝ կխաղամ այնտեղ, որտեղ կորոշի մարզիչը, պատրաստ եմ հանդես գալ հարձակման կենտրոնում ու եզրերում և փակել բացը․․․

— Ինչ մարզավիճակում ես հիմա գտնվում, պատրա՞ստ ես և ակնկալում ես հանդես գալ «Նորավանք»-ի դեմ առաջիկա խաղին։

— Իհարկե, հույս ունեմ ընդգրկվել «Նոա»-ի հիմնական կազմում այդ խաղին, եթե մարզիչը նպատակահարմար գտնի։ Ինչ վերաբերում է մարզավիճակիս, ապա Ռուսաստանում ևս կայացել է 7 մրցափուլ և մեկ գավաթային խաղ, ես միայն մեկ խաղ եմ բաց թողել, լավ մարզավիճակում եմ, ինձ հյուծված չեմ զգում, հույս ունեմ միանգամից ամրապնդվել կազմում։

— Եվ վերջում․ երկրպագուները մեծ ոգևորությամբ ընդունեցին քո վերադարձի լուրը․․․

— Շատ հաճելի է, որ համարյա մեկ տարվա բացակայությունից հետո էլ երկրպագուները ինձ չեն մոռացել։ Կփորձեմ գոլերով և արդյունավետ փոխանցումներով այնպես անել, որ դեռ երկար-երկար ինձ հիշեն։ Հուսամ, կհաջողվի օգնել նորեկներին և թիմին բարձրանալ ներկայիս 8-րդ աղյուսակային տեղից և Եվրագավաթային գոտի։