Ազատ ոճի ըմբշամարտի Հայաստանի հավաքականի անդամ, Եվրոպայի չեմպիոն ու բրոնզե մեդալակիր 61կգ քաշային Արսեն Հարությունյանն ասում է՝ իր համար կարևորն իր մարզումներն են. պատրաստ է ամեն դժվարության դիմանալ, միայն թե օրը երկու անգամ անհատական լիարժեք մարզումներ անցկացնի կարանտինային պայմաններում:
«Արտակարգ դրության պայմաններում օրը երկու մարզում եմ անցկացրել՝ հետևելով բոլոր կանոններին, որպեսզի բոլորս առողջ լինենք: Ինձ համար այս ժամանակը շատ հանգիստ էր անցնում, քանի որ պատրաստ էի ամեն դժվարության դիմանալ, բայց օրական իմ երկու մարզումն անցկացնել»,- ArmSport-ի հետ զրույցում պատմել է երիտասարդ ըմբիշը:
Արսեն Հարությունյանն ասում է՝ առաջադրանքները ստացել է մարզիչների կողմից ու եղբոր հետ մարզվել.
«Ես սեփական մարզադպրոց ունեմ, ու այնտեղ էլ շատ ինտենսիվ մարզումներ եմ անցկացնում եղբորս հետ. մարզիչների կողմից ստանում եմ առաջադրանքներն ու մարզվում եղբորս հետ»,- ասում է Արսենն ու պատմում, որ բացի մարզումներից այս ընթացքում հասցնում է նաև գրքեր կարդալ ու ֆիլմեր դիտել՝ ժամանակը հնարավորինս արդյունավետ օգտագործելու համար:
Նշենք՝ չնայած այն հանգամանքին, որ մայիսի 4-ից մասնակի գործունեություն է թույլատրվում նաև սպորտային բնագավառում ու ՀՀ 35 մարզական ֆեդերացիաներին թույլատրվել է վերսկսել մարզաձևերի տարբեր տարիքային խմբերի (մեծահասակ, երիտասարդ և պատանի) հավաքական թիմերի մարզումները և ուսումնամարզական հավաքները, ըմբիշներն այս հնարավորությունից չեն կարող օգտվել: Ինչպես հայտնի է, մարզիկներին թույլատրվում է մարզվել միայն ձեռնոցներով ու դիմակներով`միմյանցից 1,5 մ հեռավորություն պահելով, իսկ ըմբշամարտում հնարավոր չէ այս ամենը պահպանելով մարզումներ անցկացնել: Այնպես որ, ըմբիշները դեռևս ստիպված են անհատական մարզումներով պահպանել մարզավիճակը ու սպասել սահմանափակումների առավել թուլացման:
Կորոնավիրուսի համավարակի պայմաններում ստեղծված այս իրավիճակը հնարավորինս շուտ հաղթահարելու համար Արսեն Հարությունյանը շատ է կարևորում միմյանց օգնության ձեռք մեկնելը.
«Պետք է բոլորս օգնենք միմյանց: Չեմ կարող ասել, թե այս ամենը երբ կավարտվի, բայց Աստված մեզ բոլորիս հետո է ու ամեն ինչ լավ է լինելու: Վախենալ կամ խուճապի մատնվել պետք չէ, պարզապես պետք է հետևել կանոններին և վստահ եմ՝ ամեն ինչ լավ կլինի»,- ասում է Արսենը:
Ի դեպ, Արսեն Հարությունյանը վերջերս միացել էր «Օգնենք միմյանց» բարեգործական նախագծին ու իր օգնությունը ցուցաբերել մի քանի ընտանիքի.
Լավատեսությունն Արսենը պահպանում է ամեն պարագայում՝ ինչպես կորոնավիրուսի հաղթահարման մասին խոսելիս, այնպես էլ մարզական կյանքի հետագա ընթացքը քննարկելիս: 2020-ի հետ կապված ծրագրերը շատ մեծ էին՝ հաշվի առնելով այն, որ այս տարի անցկացվելու էր քառամյակի գլխավոր մարզական իրադարձությունը՝ Տոկիոյի Օլիմպիական խաղերը.
«Ինչպե՞ս ընդունեցի Խաղերի հետաձգման լուրը … ես առհասարակ վատը չեմ մտածում, ընդհակառակը, մտածում եմ՝ ինձ համար ավելի լավ է լինելու»,- եզրափակում է իր խոսքն Արսեն Հարությունյանը:
Նարե Հովհաննիսյան