Անգլիայի ազգային հավաքականի գլխավոր մարզիչ Թոմաս Տուխելը հրապարակել է թիմի կազմն Ազգերի լիգայի առաջիկա հանդիպումների համար: Գերմանացի մասնագետը Աշխարհի առաջնությունից հետո միանգամից 8 փոփոխություն է կատարել 27 հոգանոց հայտացուցակում, որը կնախապատրաստվի Իսպանիայի, Խորվաթիայի և Չեխիայի (երկու անգամ) դեմ կայանալիք հանդիպումներին:
Գլխավոր նորություններից է Մադրիդի «Ռեալի» աջ պաշտպան Տրենտ Ալեքսանդր-Առնոլդի և Լոնդոնի «Չելսիի» առաջատար Քոուլ Պալմերի վերադարձը ազգային թիմ: Տրենտը հավաքական չէր հրավիրվել 2025 թվականի ամառվանից, իսկ Պալմերը բաց էր թողել վերջին Մունդիալը: Փոխարենը, Տուխելը կրկին անտեսել է «Մանչեսթեր Սիթիի» կիսապաշտպան Ֆիլ Ֆոդենին: Հայտացուցակից դուրս են մնացել նաև ԱԱ-ի մասնակիցներ Օլի Ուոթքինսը, Այվան Տոունին և Նոնի Մադուեկեն, ինչպես նաև Մորգան Գիբս-Ուայթն ու Ադամ Ուորթոնը:
Անգլիացի փորձագետների կարծիքով՝ այս հայտացուցակը վկայում է այն մասին, որ Տուխելն ընդունում է Աշխարհի առաջնությունում (որտեղ թիմը զբաղեցրեց 3-րդ տեղը) թույլ տված սխալները և այժմ շատ ավելի հավասարակշռված կազմ է ընտրել՝ փորձելով վերականգնել երկրպագուների վստահությունը Արգենտինայի դեմ խաղում կրած ցավալի պարտությունից հետո: Տրենտի հրավերը հատկապես համարվում է Տուխելի մոտեցումների լուրջ փոփոխություն, քանի որ նախկինում գերմանացին հայտարարել էր, որ նա չի համապատասխանում իր տակտիկական պահանջներին:
«Նրանք լավ են սկսել մրցաշրջանը։ Ոչ մի սխալ բան չէին արել, պարզապես նախկինում այլ ֆուտբոլիստների էինք ընտրել: Հիմա նոր մրցաշար է սկսվում։ Քոուլն ապացուցելու բան ունի, նույնը վերաբերում է Տրենտին։ Նա միշտ էլ քննարկվել է որպես թեկնածու։ Հիմա նրա շանսն է գալ հավաքական և ցույց տալ իր լավագույն տարբերակը: Նա մեզ միանում է որպես աջ պաշտպան և պետք է պայքարի իր տեղի համար»,- նշել է Տուխելը։
Հավաքականում են նաև նոր դեմքեր. առաջին անգամ Տուխելի գլխավորությամբ հրավեր է ստացել «Էվերթոնի» պաշտպան Ջարեդ Բրենթուեյթը, ինչպես նաև «Լիվերպուլի» 18-ամյա վինգեր Ռիո Նգումոան և «Բորնմութի» կիսապաշտպան Ալեքս Սքոթը (վերջին երկուսը նորամուտը նշելու հնարավորություն ունեն): Վնասվածքների պատճառով հավաքը բաց կթողնեն Ռիս Ջեյմսը, Ջոն Սթոունզը, Դեն Բարնը, Բեն Ուայթը և մի շարք այլ ֆուտբոլիստներ։
Անգլիայի հավաքականի հայտացուցակը.
Դարպասապահներ՝ Ջորդան Փիքֆորդ («Էվերթոն»), Ջեյսոն Սթիլ («Բրայթոն»), Ջեյմս Տրաֆորդ («Լիդս Յունայթեդ»):
Պաշտպաններ՝ Տրենտ Ալեքսանդր-Առնոլդ («Ռեալ Մադրիդ»), Ջարեդ Բրենթուեյթ («Էվերթոն»), Տրևո Չալոբա («Կոմո»), Մարկ Գեհի («Մանչեսթեր Սիթի»), Լյուիս Հոլ («Նյուքասլ»), Էզրի Կոնսա («Արսենալ»), Տինո Լիվրամենտո («Նյուքասլ»), Նիկո Օ’Ռայլի («Մանչեսթեր Սիթի»), Ջարել Քուանսա («Բայեր»):
Կիսապաշտպաններ՝ Էլիոթ Անդերսոն («Մանչեսթեր Սիթի»), Ջուդ Բելինգհեմ («Ռեալ Մադրիդ»), Մայլզ Լյուիս-Սկելլի («Արսենալ»), Կոբի Մայնու («Մանչեսթեր Յունայթեդ»), Քոուլ Պալմեր («Չելսի»), Դեկլան Ռայս («Արսենալ»), Ալեքս Սքոթ («Բորնմութ»):
Հարձակվողներ՝ Հարի Քեյն («Բավարիա»), Դոմինիկ Կալվերտ-Լյուին («Լիդս Յունայթեդ»), Էբերեչի Էզե («Արսենալ»), Էնթոնի Գորդոն («Բարսելոնա»), Ռիո Նգումոա («Լիվերպուլ»), Մարկուս Ռեշֆորդ («Մանչեսթեր Յունայթեդ»), Մորգան Ռոջերս («Չելսի»), Բուկայո Սակա («Արսենալ»):
Անգլիայի հավաքականի խաղացանկը Ազգերի լիգայում (Երևանի ժամանակով)
- Սեպտեմբերի 26, 22:45 | Անգլիա — Իսպանիա
- Սեպտեմբերի 29, 22:45 | Չեխիա — Անգլիա
- Հոկտեմբերի 3, 20:00 | Խորվաթիա — Անգլիա
- Հոկտեմբերի 6, 22:45 | Անգլիա — Չեխիա
