Երեկ՝ օգոստոսի 11-ին, ՈւԵՖԱ-ի Չեմպիոնների լիգայի 2026/27 մրցաշրջանի որակավորման երրորդ փուլի պատասխան խաղում Հայաստանի գործող չեմպիոն «Արարատ-Արմենիան» Սլովենիայի «Զդեժելե» մարզադաշտում հյուրընկալվելիս 0-2 հաշվով պարտություն կրեց երկրի չեմպիոն «Ցելյեից»։
Երևանյան ակումբի գլխավոր մարզիչ Մանուել Տուլիպան հետխաղային ասուլիսի ժամանակ ամփոփել է հանդիպումն ու պատասխանել լրագրողների հարցերին։
— Բաց թողած առաջին գոլից առաջ մոտավորապես 5 րոպե գրոհում էր «Արարատ-Արմենիան» և գոլային պահեր ստեղծում։ Ի՞նչ փոխվեց։
«Այս խաղը հստակ ցույց տվեց, թե ինչքան դաժան կարող է լինել ֆուտբոլը, որովհետև այն անձինք, որոնք իսկապես ուշադիր դիտել են հանդիպումը, կփաստեն, որ մինչև մեր բաց թողած առաջին գոլը մենք պահեր ունեինք և արդեն շատ մոտ էինք գոլ խփելուն։ Բայց երբ չես խփում, փոխվում է իրավիճակը, և ստացվեց այնպես, որ բաց թողեցինք երկու գոլ։
Ամենակարևորը՝ ցանկանում եմ ընդգծել, որ մեր ֆուտբոլիստներն ուղղակի ֆենոմենալ էին․ անվախ ֆուտբոլ ցուցադրեցին, ընդ որում՝ այն պարագայում, երբ մրցակցի երկրպագուները շատ վախեցնող մթնոլորտ էին ստեղծել։ 0-2 հաշիվը չի արտացոլում խաղի պատկերը։ Ավելի արդար կլիներ, եթե գնայինք լրացուցիչ ժամանակ։ Կարծում եմ՝ մենք արժանի չէինք այս պարտությանը»։
— Արթուր Սերոբյանի փոխարինումը տակտիկակա՞ն որոշում էր, թե՞ նա հոգնել էր։
«Չափազանց բարդ խաղ էր Սերոբյանի համար, նա իսկապես շատ հոգնած էր, որովհետև թե՛ առաջին խաղակեսում, թե՛ երկրորդում պաշտպանվում էր սովորականից շատ։ Բայց նույնիսկ այդ դեպքում, երբ Արթուրը գնդակով էր, ամենավտանգավոր խաղացողն էր․ միակ ճանապարհը, որով մրցակիցը նրան կարողանում էր կանգնեցնել, կանոնների խախտումն էր։
Խաղի այն ժամանակահատվածում, երբ փոխարինեցի Սերոբյանին, արդեն թարմության կարիք ունեինք երկու եզրերում էլ, քանի որ մրցակիցը նոր ուժեր էր կուտակում։ Այնուամենայնիվ, Սերոբյանի փոխարինումից հետո ևս լավ պահեր ունեցանք, բայց եղավ այն, ինչ եղավ»։
— Ի՞նչ ասացիք ֆուտբոլիստներին խաղից հետո հանդերձարանում։
«Ես նրանց ասացի, որ ինձ համար մեծ հպարտություն է իրենց հետ աշխատելը, որովհետև նրանք արեցին այն, ինչ ես ի սկզբանե ցանկանում էի տեսնել։ Նրանք ցույց տվեցին, որ խաղադաշտ են դուրս եկել միայն ու միայն հաղթանակի համար։
Սովորաբար նման մեծ ու կարևոր խաղերում պարտությունից հետո վերականգնվելը շատ դժվար է ստացվում։ Բայց պետք է արագ վերականգնվել, քանի որ մի քանի օրից հանդիպում ունենք «Վանի» հետ։
Յուրաքանչյուր խաղի պետք է նայել որպես նոր հնարավորության։ Ցանկանում եմ, որ այս ֆուտբոլիստները, որոնք թիմում են, հնարավորինս երկար մնան մեր ակումբում»։
Հիշեցնենք, որ Չեմպիոնների լիգայում մրցելույթներն ավարտելուց հետո «Արարատ-Արմենիան» կշարունակի պայքարը եվրագավաթներում՝ Եվրոպա լիգայի որակավորման փլեյ-օֆֆ փուլում։
