ՈւԵՖԱ Կոնֆերենցիաների լիգայի որակավորման 3-րդ փուլում «Նոան» սեփական հարկի տակ ոչ-ոքի (2:2) խաղաց շվեյցարական «Սյոնի» հետ։ Հանդիպումից հետո մեր թիմի գլխավոր մարզիչ Սանդրո Պերկովիչն ամփոփել է խաղը՝ պատասխանելով լրագրողների հարցերին։
«Կարծում եմ՝ Երևանում շատ հաճելի եվրոպական երեկո ունեցանք։ Իրականում քամու պատճառով նման պայմաններում խաղալն ամենևին էլ հեշտ չէր։ Հանդիպման մեկնարկում մենք շատ լավ ֆուտբոլ էինք ցուցադրում ու ամբողջովին վերահսկում էինք խաղը։ Նախաձեռնությունը մեր ձեռքում էր, և նույնիսկ 1:1 հաշվի ժամանակ մենք էինք թելադրում պայմաններն ու կարողացանք հաշիվը դարձնել 2:1։
Կարմիր քարտից հետո մեր գործը պետք է ավելի հեշտանար, սակայն մեր որոշումները, հատկապես դաշտի կենտրոնում և գրոհների եզրափակիչ փուլում, այլևս ամենաբարձր մակարդակի վրա չէին։ Երբ վերլուծում ես, թե ինչպես բաց թողեցինք երկու գոլ և կարմիր քարտ ստացանք, կարող է թվալ, որ մենք մի փոքր միամիտ գործեցինք։ Բայց դա այդպես չէ. պարզապես «Սյոնն» անհատապես շատ ուժեղ ֆուտբոլիստներ ունի։
Նման մրցակիցների դեմ այսպիսի խաղերում, եթե թեկուզ մեկ վայրկյան կորցնում ես կենտրոնացվածությունը և փոքր սխալներ ես թույլ տալիս, անմիջապես պատժվում ես։ Կմեկնենք այնտեղ, կփորձենք ցուցադրել մեր լավագույն խաղն ու կտեսնենք, թե արդյունքում դա մեզ ինչ կտա»,- նշել է խորվաթ մասնագետը։
Հիշեցնենք, որ մրցող թիմերի միջև կայանալիք պատասխան հանդիպումն օգոստոսի 13-ին է։
Մամուլի ասուլիսն ամբողջությամբ՝ ստորև․
