UFC-ի թեթև քաշային կարգի դասակարգման առաջատար Արման Ծառուկյանը կիսվել է դիվիզիոնի նոր չեմպիոն Ջասթին Գեյջիի դեմ հնարավոր մենամարտի իր պլաններով։ Հայ մարտիկը մտադիր է օգտագործել ըմբշամարտի իր հմտությունները՝ մրցակցին զրկելով կանգնած դիրքում առավելության հասնելու հնարավորությունից։
Արման Ծառուկյանը բարձր է գնահատել Ջասթին Գեյջիի ներկայիս մարզավիճակը, ով նախօրեին կայացած մրցաշարում նոկաուտի էր ենթարկել Իլիա Թոփուրիային։ Ըստ Ծառուկյանի՝ ամերիկացին այժմ իր կարիերայի գագաթնակետին է՝ ցուցադրելով հիանալի արագություն, դիմացկունություն և ամուր ծնոտ:
Ծառուկյանը հստակ նախանշել է հնարավոր առերեսման իր մարտավարությունը.
«Ես դուրս կգամ այնտեղ, կտեղափոխեմ նրան պարտեր ու կխեղդեմ: Ես նրա հետ կանգնած չեմ մենամարտելու»։
Մարզիկն ընդգծել է, որ Գեյջին դեռ չպետք է ավարտի կարիերան, քանի որ իրեն լավագույն կողմերով է դրսևորել հոկտագոնում։
Ավելի վաղ Ծառուկյանը նշանակվել էր որպես տիտղոսային մենամարտի պահեստային մարտիկ, սակայն գլխավոր իրադարձությունն այլ կերպ դասավորվեց։ Մինչ այդ Արմանը հայտարարել էր, որ պատրաստ է փոխարինման դուրս գալ, եթե հիմնական քարտի մասնակիցներից որևէ մեկը չկարողանա մենամարտել: Իր հարցազրույցներում նա նաև նշել է, որ երազում է նվաճել չեմպիոնական գոտին և ապագայում հեռանալ պրոմոուշենից՝ դա համարելով իր գլխավոր նպատակը։
