UFC-ի թեթև քաշային կարգի նորընծա չեմպիոն Ջասթին Գեյջին մտադիր է Արման Ծառուկյանից ստանալ խոստացված RAM մակնիշի նոր ամենագնացը: Այս մասին հայտնում է «Спорт Шредингера»-ն։
Ավելի վաղ հայազգի մարտիկ Արման Ծառուկյանը խոստացել էր ամերիկացուն նվիրել այդ ավտոմեքենան, եթե նա կարողանա հաղթել իսպանացի Իլիա Թոփուրիային՝ Սպիտակ տան մոտ կայացած աննախադեպ UFC Freedom 250 մրցաշարում։ Ի վերջո, մենամարտն ավարտվեց Գեյջիի՝ ժամանակից շուտ տարած փայլուն հաղթանակով. նա ստիպեց Թոփուրիային հանձնվել չորրորդ ռաունդում։
«Թերևս վերցնեմ RAM-ը։ Ինձ հենց ժամանակն է փոխել պիկապս։ Նախորդը գնել էի 2020 թվականին, երբ հաղթեցի Թոնի Ֆերգյուսոնին։ Այնպես որ, թող ուղարկի»,- հաղթանակից հետո հայտարարել է Գեյջին։
Ուշագրավ է, որ մենամարտից առաջ Ծառուկյանի ընկերը 1 միլիոն դոլար խաղադրույք էր կատարել Գեյջիի հաղթանակի վրա, իսկ վերջնական շահումը կազմել է գրեթե 6 միլիոն դոլար։
UFC-ի գործադիր տնօրեն Դանա Ուայթը նույնպես ժպիտով է արձագանքել այս իրավիճակին՝ նշելով, որ 5,7 միլիոն դոլարի շահումը լուրջ հարված էր բուքմեյքերական գրասենյակի համար։ Հարկ է նշել, որ ԱՄՆ-ում RAM 1500 հանրաճանաչ մոդելի արժեքը տատանվում է 40-ից 90 հազար դոլարի սահմաններում՝ կախված կոմպլեկտավորումից։
Ջասթին Գեյջին մինչ այս օկտագոն էր դուրս եկել 2026 թվականի հունվարին՝ UFC 324 մրցաշարում մրցավարների միաձայն որոշմամբ հաղթելով Փեդի Փիմբլեթին։ Նրա ակտիվում կա 28 հաղթանակ և 5 պարտություն։
Իլիա Թոփուրիան իր նախորդ մենամարտն անցկացրել էր 2025 թվականի հունիսին UFC 317 մրցաշարում՝ առաջին ռաունդում նոկաուտով հաղթելով Չարլզ Օլիվեյրային։ Գեյջիից կրած պարտությունն առաջինն էր իսպանացու կարիերայում (17 հաղթանակի ֆոնին):
