Մյունխենի «Բավարիան» պատրաստակամություն է հայտնել վճարելու «Մանչեսթեր Յունայթեդի» հարձակվող Մարկուս Ռեշֆորդի տրանսֆերի համար։
Ըստ Football365 պարբերականի տեղեկությունների՝ տրանսֆերն այժմ անորոշ վիճակում է և մեծապես կախված է «Բարսելոնայի» հետ կապված իրավիճակի հետագա զարգացումից, որտեղ անգլիացի հարձակվողը վարձավճարով հանդես էր գալիս նախորդ մրցաշրջանում։
Կատալոնական ակումբն իրավունք ունի գնելու ֆուտբոլիստի տրանսֆերը 30 միլիոն եվրոյով, սակայն առայժմ ցանկություն չի հայտնում ակտիվացնել պայմանագրի այդ կետը։ Փոխարենը, «Բարսելոնայում» դիտարկում են այլընտրանքային տարբերակներ՝ կնքել վարձակալության նոր պայմանագիր կամ հասնել տրանսֆերային արժեքի նվազեցման։
Սպասելով իսպանական ակումբի վերջնական որոշմանը՝ «Մանչեսթեր Յունայթեդի» ղեկավարությունը հայտարարել է, որ պատրաստ է դիտարկել նաև այլ թիմերի առաջարկները։ Ստեղծված իրավիճակից օգտվել է մյունխենյան ակումբը, որը դեմ չէ անգլիացիներին վճարել պահանջվող գումարը։
Այնուամենայնիվ, հնարավոր գործարքի գլխավոր խոչընդոտը շարունակում է մնալ ֆուտբոլիստի բարձր աշխատավարձը, որը կազմում է շաբաթական 346 հազար եվրո։
