«Դինամոյի» նախկին հարձակվող Վիկտոր Խլուսը կիսվել է Կոնֆերենցիաների լիգայի այսօրվա հանդիպումներից ունեցած սպասելիքներով, որոնց շրջանակում կիևցիները կմրցեն հայկական «Նոայի», իսկ «Շախտյորը»՝ խորվաթական «Ռիեկայի» հետ։
— «Դինամոյի» մասնակցությամբ այսօրվա խաղի հանդեպ հատուկ ուշադրություն կա՞։
— Թերևս՝ ոչ։ Թեկուզ միայն այն պատճառով, որ այս խաղն արդեն ոչ ոքի պետք չէ։ Միակ մարդը, ում այն անհրաժեշտ է, «Դինամոյի» գլխավոր մարզիչ Իգոր Կոստյուկն է՝ Իգոր Սուրկիսին ապացուցելու համար, որ նա սխալ չի գործել։ Անձամբ ես կցանկանայի մայրաքաղաքային թիմի ղեկին տեսնել մեկին, ով կազմում ավելի շատ կներգրավեր սեփական սաներին, որպեսզի մենք տեսնեինք «Դինամոյի» հեռանկարը։ Գոնե ազգանուններով ճանաչեինք նրանց։ Դրա շնորհիվ կհասկանայինք, թե ինչպես են դինամոյականները խաղալու 2026 թվականին։
— Ինչպիսի՞ն եք պատկերացնում «Նոայի» դեմ հանդիպումը։
— Այս խաղից սպասելիքներս կապված են նրա հետ, որ մենք պետք է տեսնենք մեր երիտասարդությանը։ Եթե խաղան երիտասարդ ֆուտբոլիստները և արդյունք գրանցեն, կնշանակի՝ մենք ճիշտ ուղու վրա ենք։ Չէ՞ որ նույն խաղացողները, ովքեր ելույթ են ունենում արդեն մի քանի տարի, «Դինամոյին» փակուղի տարան։ Եկավ Կոստյուկը, բայց խաղացողները մնացին նույնը։ Այդ դեպքում ասացեք՝ ինչի՞ համար է մարզիչը։ Պետք է գոնե ինչ-որ բան փոխել, ընդ որում՝ շտապ, քանի որ թիմը նահանջել է մինչև 7-րդ հորիզոնական ներքին առաջնությունում, իսկ Կոնֆերենցիաների լիգայի աղյուսակում զբաղեցնում է 28-րդ տեղը։ Ե՞րբ է նման բան եղել նախկինում։
— Իսկ ի՞նչ կասեք «Շախտյորի» մասին, որն այսօր մրցելու է խորվաթների հետ։
— «Հանքափորներին» ցանկանում եմ մաղթել միայն մեկ բան՝ վաստակել հերթական երեք միավորը։ Ուկրաինայի համար դա մեծ պլյուս կլինի, քանի որ վարկանիշային միավորները մեզ շատ անհրաժեշտ են։ «Ռիեկային» հաղթելու դեպքում դոնեցկյան թիմը երաշխավորված կերպով կշարունակի ելույթները Կոնֆերենցիաների լիգայում նաև գարնանը։ Այնտեղ արդեն բոլորովին այլ ֆուտբոլ կլինի։ Հաշվի առնելով, որ «Շախտյորը» վերջերս ուժեղացել է, դա հույս է ներշնչում։ Բոլորս էլ շատ ենք ուզում եվրոգավաթներում տեսնել գոնե մեկ ուկրաինական թիմի։
