Մադրիդի «Ռեալի» մարզաբազայում՝ Վալդեբեբասում, կայացել է թիմի գլխավոր մարզիչ Խաբի Ալոնսոյի մամուլի ասուլիսը՝ նվիրված Չեմպիոնների լիգայի շրջանակում «Մանչեսթեր Սիթիի» դեմ կայանալիք հանդիպմանը։
«Սելտայից» կրած պարտությունից հետո «Արքայական ակումբում» լարված մթնոլորտ է։ Ղեկավարությունը պահանջում է անհապաղ լուծումներ, և Խաբի Ալոնսոն հայտնվել է քննադատությունների կիզակետում։ Իրավիճակը բարդանում է նաև կադրային լուրջ խնդիրների պատճառով. պաշտպանությունում իսկական ճգնաժամ է։
Կադրային խնդիրներ. ընդամենը 4 պաշտպան «Սիթիի» դեմ խաղին Ալոնսոն մոտենում է սահմանափակ ռեսուրսներով։ Շարքում են միայն չորս պաշտպան՝ Ռյուդիգերը, Ասենսիոն, Կարերասը և Ֆրան Գարսիան։ Սպասվում է, որ աջ պաշտպանի դիրքը ստիպված կլինի զբաղեցնել կիսապաշտպան Ֆեդե Վալվերդեն, իսկ պաշտպանության կենտրոնում կգործի Ասենսիո-Ռյուդիգեր զույգը։
Խաբի Ալոնսոյի հիմնական շեշտադրումները
Մամուլի ասուլիսի ընթացքում Ալոնսոն պատասխանել է լրագրողների սուր հարցերին՝ կապված թիմի խաղի, իր ապագայի և հանդերձարանի մթնոլորտի հետ։
Խաղի և տրամադրվածության մասին. «Սա մեծ օր է, մեզ սպասվում է Չեմպիոնների լիգային վայել մթնոլորտ։ Մենք հոգեբանորեն պատրաստ ենք։ Թիմում բոլորը համոզված են, որ կարող ենք հաղթել վաղը։ Անհրաժեշտ է խաղալ բարձր տեմպով և ինտենսիվությամբ, և այդ հարցում կասկածներ չկան»։
Անկայուն ելույթների մասին. «Բարսելոնայի» նկատմամբ տարած հաղթանակից հետո թիմը ձախողվեց «Սելտայի» դեմ խաղում։ Ալոնսոն նշել է. «Մենք հետևություններ ենք արել։ Հիմա մեր մտքում միայն «Սիթին» է։ Ֆուտբոլում իրավիճակը շատ արագ է փոխվում՝ թե՛ դեպի լավը, թե՛ դեպի վատը»։
Ճնշման և պաշտպանվածության մասին. Հարցին, թե արդյոք նա իրեն մենակ է զգում, մարզիչը պատասխանել է. «Մենք միասնական ենք, բոլորս միասին ենք։ Երբ մարզում ես «Ռեալը», պետք է պատրաստ լինես ցանկացած իրավիճակի։ Իմ ուշադրությունը կենտրոնացած է միայն խաղադաշտի վրա, դա այն է, ինչ ես կարող եմ վերահսկել»։
Վինիսիուսի և ֆուտբոլիստների աջակցության մասին. Անդրադառնալով Վինիսիուսի հետ կապված որոշումներին՝ Ալոնսոն նշել է, որ դրանք պահի թելադրանքով կայացված որոշումներ էին, և ինքը կասկած չունի իր քայլերի ճշմարտացիության մեջ։ Ամենակարևորը՝ նա հաստատել է, որ զգում է ամբողջ թիմի և ֆուտբոլիստների աջակցությունը. «Մենք այս ամենի մեջ միասին ենք, առանց պառակտումների»։
Վերջում մարզիչը հավելել է, որ Պեպ Գվարդիոլայի «Մանչեսթեր Սիթին» էվոլյուցիա է ապրել, ունի նոր խաղացողներ և շարունակում է մնալ բարդ մրցակից։
