Հայաստանի ազգային հավաքականի ու ղազախական «Աստանայի» կիսապաշտպան Տիգրան Բարսեղյանը ինստագրամյան ուղիղ եթերի ընթացքում պատասխանել է երկրպագուների հարցերին:
Կարանտինի ընթացքում զբաղվածության մասին հարցին Բարսեղյանը պատասխանել է հետևյալ կերպ.
«Սիրում եմ մուլտֆիլմեր դիտել, սերիալ չեմ նայում: Նայում եմ ֆիլմեր՝ բոլոր տեսակի, բացի սարսափ ժանրից: Կարող եմ օրը 10 ժամ ֆիլմ դիտել: Յութուբի միջոցով միայն երաժշտություն եմ լսում: Երբեմն դիտում եմ ամերիկյան հումորային հաղորդումներ՝ պրանկեր. այնտեղ հայ տղա է մասնակցում: Ցանկանում եմ կիթառ նվագել սովորել: Ցանկանում եմ նաև բոքսով զբաղվել: Ինստագրամ հնարավոր չէ մտնել հիմա, քանի որ նույնիսկ նրանք, որոնք չգիտեին, թե ինչպես է գրվում տրենաժոր(մարզասարք) բառը, հիմա սովորեցնում են, թե ինչպես է պետք մարզվել: Ով չգիտեր, թե ինչպես են պատրաստում ձվածեղ, դարձել է շեֆ խոհարար: Մյուս կողմից, լավ էր. շատ մարդկանց վրա կարանտինը դրական ազդեցություն ունեցավ»:
Հարց է հնչել Բարսեղյանի՝ ֆուտբոլի հանդեպ սիրո մասին.
«Հայրս ֆուտբոլիստ է եղել, դրա համար ես այլ տարբերակ չունեի: 5 տարեկանից զբաղվել եմ պրոֆեսիոնալ ֆուտբոլով»:
Հարց է եղել այն մասին, թե ով կդառնար Բարսեղյանը, եթե չընտրեր ֆուտբոլը.
«Եթե ես ծնվեի ԱՄՆ-ում, ապա, հաստատ, կդառնայի UFC-ի մարզիկ կամ ամերիկյան ֆուտբոլով կզբաղվեի»:
Ղազախական ֆուտբոլին հարմարվելու մասին.
«Ես այստեղ նախկինում եղել էի՝ հավաքականի հետ: Հեշտ է հարմարվել, երբ բոլորը խոսում են նույն լեզվով: Այստեղ նաև շատ հայեր կան: Ես ինձ լեգիոներ չէի զգում»:
Բարսեղյանը պատասխանել է, որ կարողանում է արդեն խորոված պատրաստել ու ոչ միայն: Հայ ֆուտբոլիստը նաև կատակել է, որ իր սարքածից դեռ ոչ մեկ չի թունավորվել:
Բարսեղյանն ակումբում ունի արդեն մտերիմ ընկերներ.
«Բոլորի հետ լավ հարաբերություններ ունեմ, բայց ամենից շատ ժամանակ անցկացնում եմ Տոմաշևիչի, Շիմունովիչի ու Ռուկավինայի հետ»:
Պարզվեց, որ Տիգրանը սիրում է լսել ամերիկյան ռեպ, սերբական ու հայկական երաժշտություն: Ռուսական շոու-բիզնեսից լսում է Կրիդին ու Blackstar: Բարսեղյանը չի լսում ռոկ, բայց, միևնույն ժամանակ, չի ասում, որ այն վատն է:
Բարսեղյանն ունի սիրելի դերասան.
«Ֆրունզիկ Մկրտչյան: Երբ նայում ես նրա ֆիլմերը, անհնար է, որ չսիրես նրան»:
Մարդկանց մեջ Տիգրանն ամենաշատը գնահատում է հավատարմությունը:
Հայ ֆուտբոլիստը տիրապետում է մի քանի լեզվի. հայերեն, ռուսերեն, անգլերեն, մակեդոներեն, սերբերեն, բուլղարերեն ու խորվաթերեն (քիչ): Ըստ Բարսեղյանի, սլավոնական լեզուները իրար շատ նման են:
«Աստանայի» նորեկին հարցրել են նաև, թե ո՞վ է ՂՊԼ-ի լավագույն խաղացողը:
«Մեր թիմում նրանք շատ են. Շոմկո, Բեյսեբեկով, Պերցուխ, Ժալմուկան, ինչպես նաև երիտասարդ Դիմաշ Կաշկենը: Մյուս ակումբների խաղացողների մասին ոչինչ ասել չեմ կարող: Նախորդ տարի Կուատն ու Իսլամխանն էին»:
Քոբիի մահվան մասին.
«Ներկա եմ եղել Քոբիի վերջին խաղին, իսկ կողքիս նստած էր Անտուան Գրիզմանը: Քոբիի մահը, դա… իհարկե, ծանր էր: Մենք այդ ընթացքում Պորտուգալիայում հավաք էինք անցկացնում: Սկզբում չհհավատացի, զանգեցի ԱՄՆ-ի ընկերներիա՝ ճշտելու: Հաջորդ օրը խնդրեցի մարզչին՝ պարապմունքը սկսել մեկ րոպե լռությամբ: Տեսել եմ Շաքիլի արցունքները, և ես ինքս ուզում էի լաց լինել: Նա հրաշալի կյանք ուներ…Ավելի լավ է ապրել այդպես, քան 100 տարի ու անիմաստ: Ես նույնիսկ Քոբի Բրայանտի նկարով խաղակոշիկներ եմ պատվիրել, որոնք կհագնեմ, երբ առաջնությունը վերսկսվի»,-ասել է Բարսեղյանը:
Հարցերն ու պատասխանները խմբագրել էր ղազախական kazfootball.kz կայքը: