Եվրոպայի մինչև 20 տարեկանների Բ դիվիզիոնի առաջնությունը Երևանում հյուրընկալելն աննախադեպ իրադարձություն է մեզ համար, քանի որ նման մասշտաբի միջոցառում մեր երկրում երբևէ չի անցկացվել թիմային մարզաձևերից: Այս մասին ArmSport-ի հետ զրույցում պատմել է Հայաստանի բասկետբոլի ֆեդերացիայի գլխավոր քարտուղար Արթուր Նազարյանը:
ՀԲՖ գլխավոր քարտուղարն, ինչպես ավելի վաղ հայտնել էինք, Շվեյցարիայում գտնվող ՖԻԲԱ-ի գրասենյակում օրերս հանդիպել է միջազգային ֆեդերացիայի գլխավոր քարտուղար Ադրեաս Զագկլիսի և ՖԻԲԱ Եվրոպայի գլխավոր քարտուղար Կամիլ Նովակի հետ:
Նրա խոսքով՝ հանդիպումների շրջանակում քննարկվել են 2025 թվականի հուլիսին Երևանում կայանալիք առաջնությանը, ինչպես նաև Հայաստանի բասկետբոլի ֆեդերացիայի ռազմավարությանն առնչվող մի շարք հարցեր:
«Սա, իսկապես, շատ բացառիկ իրադարձություն է լինելու: Փաստացի, Եվրոպայի գրեթե կեսը՝ 22-24 երկրի հավաքականներ, գալու են Երևան: Նախևառաջ ընդգծվեց, որ նմանօրինակ մրցաշարերը պետք է անցկացվեն պետության մասնակցությամբ, որպեսզի կազմակերպվեն բարձր մակարդակով: ՀՀ կառավարությունը որդեգրել է միջազգային մրցաշարեր հյուրընկալելու քաղաքականություն, այնպես որ մեր հայտն ավելի նախընտրելի էր: Փորձելու ենք մեծացնել ռեսուրսներն ու մեր աշխատանքի ծավալները, որպեսզի կարողանանք դիմագրավել բոլոր մարտահրավերներին: Ընդ որում, աշխատանքներ են տարվում թե՛ Հայաստանում, թե՛ սփյուռքում, որպեսզի մեր հավաքականները մարտունակ լինեն և կարողանան բարձր պահել Հայաստանի պատիվը միջազգային ասպարեզներում»,- տեղեկացնում է Արթուր Նազարյանը:
Եվրոպայի մինչև 20 տարեկանների Բ դիվիզիոնի առաջնությունը կանցկացվի Երևանի երեք մարզադահլիճներում 2025 թվականի հուլիսին և կտևի շուրջ 12 օր:
«Հաշվի առնելով խաղերի քանակը՝ պետք է լիովին կահավորված երեք մարզադահլիճ ունենանք: Մարզադահլիճներից մեկն, անշուշտ, կլինի Մարզահամերգային համալիրը, որն ամենախոշորն է և ունի ամենալավ պայմանները: Երկրորդը կլինի նախկին «Միկա» մարզահամալիրը, որտեղ մեծ ծավալի աշխատանք կա կատարելու: Երրորդ մարզադահլիճի հարցում այս պահին քննարկումներ են ընթանում»,- ասում է Արթուր Նազարյանն ու տեղեկացնում՝ առաջնությանը շուրջ 800 մասնակից է ակնկալվում:
«Պատվիրակությունները բաղկացած են լինում 20 հոգուց: Սպասում ենք նաև շուրջ 2 հազար հանդիսականի, այդ թվում՝ հավաքականների երկրպագուներ, մարզիկների ծնողներ: Յուրաքանչյուր հավաքականի հետ շուրջ 100 հոգի սովորաբար մեկնում է մրցաշարերի»,- ներկայացնում է ՀԲՖ գլխավոր քարտուղարը:
Արթուր Նազարյանն ընդգծում է՝ Հայաստանը ՖԻԲԱ Եվրոպայի ակտիվ անդամներից է. այս ամառ Եվրոպայի տարբեր տարիքային առաջնությունների մասնակցության առումով գրեթե մոտեցել ենք առավելագույն քանակին:
«ՖԻԲԱ Եվրոպան սա ևս շատ գնահատում է ու փորձում է հասկանալ, թե ինչպես կարող է նպաստել Հայաստանում բասկետբոլի զարգացմանը: Մենք նաև ցանկություն հայտնեցինք գրեթե ամեն տարի որևէ խոշոր իրադարձություն անցկացնել Հայաստանում: Վերջերս կայացած Հայաստան-Ալբանիա խաղն էլ ցույց տվեց, թե որքան մեծ է հետաքրքրությունը մեր երկրում: Այդուհանդերձ, Եվրոպան այսօր ամենամրցակցային և ուժեղ աշխարհամասն է, որտեղ գրեթե թույլ երկրներ չեն մնացել: Ու պետք է նաև այդ մրցակցությանը դիմակայել: Այդ իսկ պատճառով մենք մեծ ծավալի աշխատանք ունենք կատարելու թե՛ ակումբների, թե՛ մարզադպրոցների ու խմբակների հետ: 3X3 բասկետբոլի հետ կապված ևս ծրագրեր կան. փորձելու ենք այն ավելի ակտիվացնել ու մրցունակ դարձնել»,- ասում է Արթուր Նազարյանը:
Նրա խոսքով՝ Եվրոպայի մինչև 20 տարեկանների Բ դիվիզիոնի առաջնության անցկացմամբ Հայաստանը միանգամից մի քանի խնդիր է լուծելու:
«Առաջինը մասսայականությունն է, դահլիճների կահավորումը, որը թույլ կտա մարզադահլիճները մշտապես պահել լավ վիճակում: Որքան շատ մրցաշարեր անցկացվեն, այնքան դահլիճների վիճակն ավելի կլավանա: Մարզահամերգային համալիրն այսօր գտնվում է փայլուն վիճակում, քանի որ անընդհատ սպորտին ծառայում է: 5-6 տարի առաջ Մարզահամերգային համալիրը մոռացել էինք որպես սպորտային կառույց, իսկ այսօր այդ խնդիրը չունենք: Սա շատ կարևոր է: Հաջորդ խնդիրը մեր երկիրը համաշխարհային բասկետբոլային քարտեզի վրա ամրագրելն է: Սա նաև մեր հեղինակության հարցն է. ցույց կտանք, որ մենք պատրաստ ենք միջազգային խոշոր մրցաշարեր ընդունել նաև բասկետբոլում: Այսօր Եվրոպայում շատ քիչ երկրներ կան, որոնք ի վիճակի են նման մակարդակի մրցաշարեր ընդունել»,- ընդգծում է ՀԲՖ գլխավոր քարտուղարը:
Անդրադառնալով Մ20 տարեկաների խաղամակարդակին՝ Արթուր Նազարյանը նշում է՝ սա մեծ հաշվով շատ մոտ է ազգային հավաքականներին. «Խոսքը փաստացի երիտասարդական հավաքականների մասին է: Խաղացողների մեծ մասն ընդգրկված է նաև ազգային հավաքականներում: Նույնը նաև մեր պարագայում է: Ալբանիայի դեմ խաղում մեր թիմի հայտացուցակի 5 խաղացող Մ20 տարեկանների թիմից էր: Խաղում են շատ հասուն բասկետբոլ»:
Արթուր Նազարյանը նաև տեղեկացնում է՝ Հայաստանի բասկետբոլի ֆեդերացիան այժմ ՖԻԲԱ-ի հետ համատեղ մշակում է ՀԲՖ զարգացման ռազմավարությունը, որը կհամապատասխանի հայկական կողմի հնարավորություններին: Այդ ուղղությամբ, ըստ ՀԲՖ գլխավոր քարտուղարի, անընդհատ աշխատանքներ են իրականացնում, քանի որ Հայաստանը՝ որպես փոքր երկիր և սահմանափակ ռեսուրսների տեր, պետք է ճիշտ ռազմավարությամբ շարժվի:
«Առավելագույնս պետք է օգտագործենք մեր հնարավորությունները: Այդ ուղղությամբ նաև ՖԻԲԱ-ն է աշխատանքներ իրականացնում, որպեսզի հասկանանք, թե ինչ կետում կլինենք 2030 թվականին»:
