Լեհաստանի Կրակով քաղաքում ընթացող Եվրոպական ամառային երրորդ խաղերին առաջին անգամ մասնակցում է նաև Հայաստանի թեքբոլի հավաքականը: 3 մարզիկով Լեհաստան ժամանած թիմը նախապատրաստական բավական լուրջ փուլ է անցել և ձգտելու է առավելագույնին:
Հավաքականի գլխավոր մարզիչ, թիմի ղեկավար Հովհաննես Գաբրիելյանն ArmSport-ի հետ զրույցում խոսել է Եվրոպական խաղերից ունեցած սպասելիքների և առաջիկա ծրագրերի մասին:
«Որակավորման երեք մրցաշարի մասնակցեցինք, որոնց արդյունքներով եվրոպական 30 երկրների շարքում 6-րդ տեղով իրավունք ստացանք մասնակցելու Եվրոպական խաղերին: Սպասելիքներ իհարկե կան, վիճակահանությունն էլ ինչ-որ առումով դրական է ստացվել մեզ համար: Շատ նպատակասլաց ենք արդյունք ցույց տալու համար, քանի որ Հայաստանի պատմության մեջ սա առաջին դեպքերից է, երբ խաղային ու թիմային ձևից մասնակից ունենք Եվրոպական խաղերին»,- ասում է Հովհաննես Գաբրիելյանը:
Հայաստանի թեքբոլի հավաքականը, նախապատրաստվելով Եվրոպական խաղերին, նաև համատեղ ուսումնամարզական հավաք է անցկացրել Լեհաստանի ընտրանու հետ: Հովհաննես Գաբրիելյանի խոսքով՝ լավ են պատրաստվել ու տրամադրված են լավ ելույթների. «Թե՛ որակավորման փուլի մրցաշարերին, թե՛ ուսումնամարզական հավաքին մասնակցել ենք Օլիմպիական կոմիտեի աջակցությամբ: Տղաները մարզիչ Դավիթ Վահրադյանի հետ մեկ շաբաթ առաջ էին ժամանել Լեհաստան: Կարծում եմ՝ հիմա այն մարզավիճակում են, որ պետք է հնարավորինս լավ արդյունք գրանցեն»:
Հովհաննեսի խոսքով՝ ամենամեծ սպասելիքները Գոռ Սարգսյանից են. «Գոռն այս պահին աշխարհի լավագույն թեքբոլիստների 20-յակում է: Կարծում եմ՝ Գոռը մեդալային հույսեր է պահպանում: Լավ ենք պատրաստվել: Հուսամ՝ մեր սպասելիքները կարդարացվեն»:
Եվրոպական խաղերում հանդես կգա Գոռ Սարգսյան-Ռաֆայել Վարդանյան երկյակը, իսկ Քրիստինա Մանգասարյանն ու Ռաֆայել Վարդանյանը ելույթ կունենան նաև թիմային միքս տարբերակով:
Խոսելով առաջիկա ծրագրերի մասին՝ Հովհաննես Գաբրիելյանը նշել է, որ առաջիկայում Գոռ Սարգսյանը մեկնելու է ԱՄՆ, որտեղ ֆեդերացիայի մյուս մարզիկի՝ Տիգրան Վարդանյանի հետ մեկ-երկու մրցաշարի կմասնակցի: Հայաստան վերադառնալուց հետո՝ մարզիկները կնախապատրաստվեն նոյեմբերին կայանալիք աշխարհի առաջնությանը:
Հայաստանում թեքբոլը սկսել է զարգանալ շուրջ 4 տարի առաջ: Գաբրիելյանի խոսքով՝ առաջինը թեքբոլի կենտրոն են հիմնվել Հայաստանի պետական տնտեսագիտական համալսարանում, բուհի աջակցությամբ նաև համապատասխան սեղաններ են ձեռք բերվել. «Այնուհետև սեղաններ ենք տրամադրել ֆուտբոլի շուրջ 10 ակումբների, որտեղ նույնպես զբաղվում են թեքբոլով: Այժմ, այն ուզում ենք զարգացնել արդեն մարզադպրոցների մակարդակով: Հիմնական ֆինանսավորումը ստանում ենք մասնավոր ընկերություններից. մարդիկ, ովքեր տեսել ու գնահատել են այս նոր զարգացող մարզաձևը և օգնում են մեր երկրում այն ավեի մասսայական դարձնելու համար»:
Մասնագետների հավաստմամբ՝ թեքբոլն արդեն 2028 թվականին կարող է ընդգրկվել Օլիմպիական խաղերի ծրագրում:
