Երևանում ընթացող ծանրամարտի Եվրոպայի առաջնության 67 կգ քաշայինների պայքարում Հայաստանի ներկայացուցիչներից Գոռ Սահակյանը դարձավ Եվրոպայի չեմպիոն: 19-ամյա մարզիկը նաև երկու փոքր ոսկե մեդալ նվաճեց պոկում և հրում վարժություններում:
Պոկում վարժությունում հայ ծանրորդը առաջին տեղը գրավեց 145 կգ արդյունքով և 4 կգ-ով գերազանցեց 2-րդ տեղը գրաված թուրք մարզիկին:
Հրում վարժությունում Գոռն առաջին մոտեցման համար պատվիրել էր ամենաբարձր՝ 170 կգ քաշը: Առաջին մոտեցմամբ Գոռը բարձրացրեց ծանրաձողն ու ապահովեց չեմպիոնությունը: Արդեն չեմպիոնի կարգավիճակում երկրորդ մոտեցմամբ Սահակյանը բարձրացրեց 175, իսկ երրորդ մոտեցմանը հրաժարվեց մասնակցել ու երկամարտի 320 կգ արդյունքով դարձավ Եվրոպայի չեմպիոն:
Հրում վարժությունում երկրորդ տեղը գրավեց թուրք Ֆերդի Հարդալը, իսկ երրորդ տեղը բուլղարացի Վալենտին Գենչևը:
Այսպիսով, Գոռ Սահակյանը երկամարտում 15 կգ-ով գերազանցեց երկրորդ տեղը գրաված իսպանացի Խուան Ակարան Մենդոսային:
Այսպիսով, Եվրոպայի երիտասարդական առաջնության չեմպիոն Գոռ Սահակյանն առաջին անգամ մասնակցելով մեծահասկաների առաջնությանը նվաճեց ոսկե մեդալ:
Ավելի վաղ Հայաստանի ներկայացուցիչներից մեդալ էր նվաճել Իզաբելլա Յայլյանը, որը 55 կգ քաշայինների պայքարում գրավել էր 3-րդ տեղը:
