Հունահռոմեական ոճի ըմբիշ, Օլիմպիական խաղերի արծաթե մեդալակիր, աշխարհի ու Եվրոպայի չեմպիոն Արսեն Ջուլֆալակյանը լրագրողների հետ հանդիպման ժամանակ անդրադարձել է այն հարցին, թե ինչու է ինքը գործում որպես անհատ մարզիկ ու չի մասնակցում հավաքականի հավաքներին․
«Մեծագույն սիրով կմասնակցեի բոլոր հավաքներին հավաքականի կազմում, բայց հաշվի առնելով, թե ինչեր են տեղի ունեցել անցած տարի, հաշվի առնելով իմ հարաբերությունները մի քանի մարզիկի հետ, նրանց հետ իմ ֆիզիկական ներկայությունը անհամատեղելի է․․․ վտանգ եմ տեսնում վնասվածքների, սննդի անվտանգության, ու առհասարակ իմ հոգեբանական վիճակի։ Ստիպված եմ բացակայում հավաքներից, արդյունքում ինձ համար ավելի անբարենպաստ պայմաններ են ստեղծվել, ունեմ զույգի խնդիր, եղբայրս է ինձ հետ մարզվում՝ որպես զույգ, իմ հաշվին եմ գնում հավաքների, իմ հաշվին եմ ունենում բժիշկ, մերսող․․․ այսինքն ինձ համար անհավասար պայմաններ են ստեղծվել մրցակցային, բայց ես պատրաստ եմ»,- ասել է Արսեն Ջուլֆալակյանը ու ընդգծել, որ հավաքականի մեծ մասի հետ խնդիրներ չունի․
«Հավաքականի մեծ մասի հետ խնդիրներ չունեմ, նույն մարզիչների հետ հարաբերություններս թշնամական չեն»։
Լևոն Ջուլֆալակյանն էլ նշել է, որ չի կարող անուններ տալ, թե ովքեր են եղել հավաքականում խժդժություններ իրականացնողները․
«Ես անուններ չեմ տա, հաշվի առնելով, որ դա մի մեծ ընտանիք է։ Բայց այն մարզիկները, ովքեր իրենց ամենագետ են պատկերացրել, ժամանակը ցույց կտա։ Հրաժարականի ժամանակ ասել եմ՝ մեկ տարի պետք է պահեն իմ ստեղծած հավաքականը, քանի որ ափսոս է։ Բայց այն մարդիկ, ովքեր անշնորհակալ են, Աստված կպատժի։ Մի քանի հոգի, ովքեր շեղվել են, դա իրենց խնդիրն է։ Ինձ համար որպես մարզիկներ կան, բայց որպես մարդ հասկացություն, վերացած են։ Ինձ համար առաջնայինը մարդ հասկացությունն է, հետո նոր կարիերան։ Ցավոք, եղել է այն, ինչ եղել է։ Ժամանակը ցույց կտա, միգուցե՝ իրենք էին ճիշտ»,- ասել է Լևոն Ջուլֆալակյանը։
Հավաքականի նախկին գլխավոր մարզիչն ընդգծել է, որ ինքը միշտ դեմ է եղել, որ մարզիկը հավաքականի հետ չմարզվի, բայց ներկա իրավիճակում աբսուրդ է այս ամենը․
«Ես թույլ չեմ տա, որ իմ տղային թունավորեն։ Ես այդքան վախ եմ ապրում այնտեղի հետ կապված»,- եզրափակել է իր խոսքը Լևոն Ջուլֆալակյանը։