Այսօր՝ սեպտեմբերի 20-ին, «Քաղաքացիական Պայմանագիր» կուսակցության 7-րդ համագումարի ժամանակ ՀՀ վարչապետ Նիկոլ Փաշինյանը ճեպազրույց է ունեցել լրագրողների հետ։ Հետևյալը նրա խոսքի մաքրագրված տարբերակն է՝ կապված սպորտի և ֆուտբոլի հարցերին միջամտելու մասին հարցի հետ։
Հաշվի առնելով լրագրողի կոչը՝ Հայաստանի ֆուտբոլի ֆեդերացիայի նախագահ Արմեն Մելիքբեկյանի հեռանալու մասին, ՀՀ վարչապետը պատասխանել է հետևյալ կերպ։
«Ի հեճուկս տարատեսակ բամբասանքների, լուրերի և հրապարակումների՝ 2018 թվականից ի վեր չի եղել մի դեպք, որ ես միջամտեմ ֆուտբոլի կամ սպորտի որևէ հարցի։ Ընդհակառակը, եղել են դեպքեր, երբ կոնկրետ անձինք փորձել են ինձ ներքաշել նման խոսակցությունների մեջ։
Օրինակ, մեր խմբակցությունում մի պատգամավոր կար, ով ամեն կերպ ցանկանում էր ընդգրկվել հավաքականի կազմում։ Վեց ամիս անընդհատ հետևիցս էր ընկած՝ համոզելով ինձ, որ իրեն և իր հորը պետք է ընդգրկենք հավաքականում։ Իրենք պնդում էին, որ Արթուր Ալեքսանյանը կամ Ռոման Ամոյանը չլինեն, իրենք պետք է լինեն, քանի որ մենք իշխանություն ենք։ Ես ասացի՝ եղբայր, գնա զբաղվիր քո գործերով։ Ի վերջո, նա գնաց իր գործերով»։
Լրագրողները նրանից ճշտեցին՝ Արսեն Ջուլֆալակյանի՞ն նկատի ունի, Նիկոլ Փաշինյանը պատասխանեց՝ բա ո՞ւմ հետ եմ։
«Ամիսներ շարունակ նրանք զանգում էին, նամակներ գրում, քննարկումներ կազմակերպում՝ պնդելով, որ պետք է ընդգրկվեն հավաքականում, մասնակցեն աշխարհի առաջնությանը, օլիմպիադային։ Ես ասացի՝ օլիմպիադան կուսակցական համաժողով չէ, որ ես որոշեմ, թե ով պետք է պատվիրակ լինի։
Հիմա որ հարցնես, Պետրոս Դուրյանի տողն է՝ «ազգի վիճակը ծանրացել է սրտին», դե ամոթ ա, գետինը մտեք արա, իսկականից։ Ներվերս կերան մի տարի, ասում էին՝ հավաքականի կազմ մտնենք, մենք կպնենք, ոչ մեկ չկպնի։ Իրենք ասում էին՝ մենք հեղափոխության կողմնակիցներ ենք, և դուք՝ որպես հեղափոխության առաջնորդ, պետք է մեզ պաշտպանեք, որ մենք մասնակցենք օլիմպիադային, աշխարհի կամ Եվրոպայի առաջնություններին։ Իրենք պնդում էին, որ միայն իրենք պետք է գնան, և ոչ ոք այլևս։
Մի անգամ հանդիպեցի հավաքականի տղաներին և հարցրի՝ ի՞նչ է կատարվում։ Նրանք ասացին՝ պարոն վարչապետ, եթե այդ անձանց անունները ներառեք, ապա ամբողջ հավաքականը հրաժարական կտա և կհեռանա սպորտից։ Ես ասացի՝ ես գործ չունեմ այդ հարցերի հետ, ժողովուրդ ջան։ Հիմա էլ գրում են, թե վարչապետն ասել է՝ սա խաղա, սա չխաղա։ Ինձ ու՞մ հետ եք խառնում։
Դա միակ դեպքն է եղել, երբ ինչ-որ մեկը փորձել է ինձ ներքաշել նման խոսակցությունների մեջ, և դա չի հաջողվել»,- պատասխանել է Փաշինյանը։
