Լեհաստանի Էքստրակլասայի 14-րդ տուրի կենտրոնական հանդիպումներից մեկում Վարշավայի «Լեգիան» սեփական հարկի տակ հյուրընկալել է «Ռակուվին» և գոլառատ պայքարում զիջել 2։4 հաշվով։ Տանտերերի կազմում գեղեցիկ գոլով աչքի է ընկել Հայաստանի ազգային հավաքականի կիսապաշտպան Վահան Բիչախչյանը։
Հանդիպման հաշիվը 21-րդ րոպեին բացել է հյուրերի հարձակվող Պատրիկ Մակուխը։ Առաջին խաղակեսում այլևս գոլեր չեն գրանցվել, իսկ ընդմիջմանը «Լեգիայի» մարզչական շտաբը խաղադաշտ է դուրս բերել Վահան Բիչախչյանին, որը փոխարինել է Ֆրանցիշեկ Ստեպնևսկուն։
Երկրորդ խաղակեսն անցել է գերլարված և արդյունավետ պայքարում։ 56-րդ րոպեին Կացպեր Խոդինան վերականգնել է հաշվի հավասարակշռությունը, սակայն ընդամենը երկու րոպե անց Էրիկ Օտիենոն կրկին առաջ է մղել «Ռակուվին»։ 61-րդ րոպեին Օլիվիեր Կվիատկովսկին կրկնապատկել է հյուրերի առավելությունը՝ 1։3։
Ընդամենը երկու րոպե անց՝ 63-րդ րոպեին, իր խոսքն է ասել Վահան Բիչախչյանը։ Հայ կիսապաշտպանը, ստանալով Բոգդան Վյուննիկի փոխանցումը, տուգանային հրապարակի մատույցներից կատարած դիպուկ հարվածով գրավել է մրցակցի դարպասն ու կրճատել հաշվի տարբերությունը։
Հայ ֆուտբոլիստի գոլից հետո վարշավյան ակումբը մեծացրել է ճնշումը և անգամ հասել հաջողության, սակայն Ռոբերտ Դեզիելի խփած գնդակը չեղարկվել է դարպասապահի նկատմամբ կանոնների խախտման պատճառով։ Հանդիպման վերջնական հաշիվը 72-րդ րոպեին ձևակերպել է նույն Կվիատկովսկին՝ դառնալով դուբլի հեղինակ (2։4)։
Այս տուրից հետո «Լեգիան» 24 միավորով զբաղեցնում է Լեհաստանի առաջնության մրցաշարային աղյուսակի 3-րդ հորիզոնականը։ Հիշեցնենք նաև, որ Վահան Բիչախչյանը չի ընդգրկվել Հայաստանի ազգային հավաքականի հայտացուցակում՝ Ազգերի լիգայի խաղարկության Կիպրոսի և Լատվիայի դեմ նոյեմբերյան հանդիպումների համար։
