Կոնֆերենցիաների լիգայի խմբային փուլի 5-րդ տուրի «Սլովան» — «Փյունիկ» խաղից հետո տեղի ունեցավ Հայաստանի չեմպիոնի գլխավոր մարզիչ Եղիշե Մելիքյանի հետխաղային ասուլիսը:
«Առաջին հերթին ես շնորհավորում եմ մրցակցին: Ֆուտբոլը 90 րոպե է և երկու թիմերն էլ տակտիկապես պատրաստ էին այս խաղին ու մոտիվացված էին: Այսօր այսպես ստացվեց՝ անհատական սխալների ու կենտրոնացվածության պատճառով: Մենք ընդունում ենք մեր սխալները ու տխուր ենք, որ չկարողացանք ուրախացնել մեր երկրպագուներին: Մենք պրոֆեսիոնալներ ենք, մենք ունենք բնավորություն, մենք ուժեղ ենք ու կարող ենք վերջին խաղում վճռել ամեն ինչ: Ինչ վերաբերում է Օտուբանջոյի փոփոխությանը, դա պայմանավորված էր նրանով, որ մրցակիցն ավելի ուժային խաղ էր թելադրում: Մրցակիցը ուժեղ էր նաև ստանդարտներից, իսկ այդ պարագայում ավելի օգտակար էր Դիոպը: Նա ժամանակին մտավ խաղադաշտ ու լուծեց հարցերը: Գոհ եմ Օտուբանջոյից, իսկ փոխարինումը տակտիկական որոշում էր, որն իրեն արդարացրեց, իսկ պարտությունը չի կարելի կապել այդ փոփոխության հետ: Սա անհատական սխալների հետևանք էր»,-ասաց մարզիչը:
Խոսելով Դավիդ Յուրչենկոյի սխալի մասին՝ «Փյունիկի» մարզիչն ասաց. «Յուրչենկոյի խաղակոշիկը վնասվել էր և նա ասել էր, որ հետ փոխանցում չանեն, բայց Տանկովը փոխանցեց հետ ու հենց այդպես բաց թողեցինք գոլը:
Ամսի 3-ին մեզ եզրափակիչ խաղ է սպասվում: «Բազելը» դժվար մրցակից է, պետք է վերլուծենք նրանց վերջին խաղերը: Մենք ունենք ժամանակ վերլուծելու համար: Մենք մեր մարզչական շտաբով միշտ գտել ենք մեր մրցակիցների ուժեղ ու թույլ կողմերը: Ինձ չի հետաքրքրում ինչ վիճակում է մեր առաջիկա մրցակիցը, ավելի շատ հետաքրքրում է մեր թիմը: Այս պարտությունը մեզ 1-2 օր սթրեսի մեջ կթողնի, բայց դուրս կգանք այս իրավիճակից: Շատ դժվար է լինելու, բայց սա լավ շանս է ու ես հավատում եմ, որ մեր երկրպագուների օգնությամբ կկարողանանք հասնել հաջողության»,-ասաց Մելիքյանը:
