Չեմպիոնների լիգայի որակավորման երրորդ փուլի առաջին խաղում Հայաստանի չեմպիոն «Փյունիկը» Բելգրադի «Ռայկո Միտիչ» ստադիոնում, որը հայտնի է նաև ինչպես «Մարականա», կհյուրընկալվի Սերբիայի չեմպիոն «Ցրվենա Զվեզդային»։
Ակումբը հիմնադրվել է 1945 թվականին։ Սերբիայի ամենատիտղոսակիր ակումբն է և միակը, որը նվաճել է Եվրոպական չեմպիոնների գավաթը և Միջմայրցամաքային գավաթը։
Armsport-ը ներկայացնում է Երևանի «Փյունիկի» առաջիկա մրցակցին՝ շեշտը դնելով վերջին 3 տարիների ելույթների վրա։ Ինչո՞ւ հենց վերջին 3 տարիների, որովհետև 2019 թվականի վերջից թիմը գլխավորում է «Ցրվենայի», «Լացիոյի», «Ինտերի» և Սերբիայի ազգային հավաքականի նախկին ֆուտբոլիստ Դեյան Ստանկովիչը, որը փոխարինել է Վլադան Միլոյեվիչին։
Դեյան Ստանկովիչի ժամանակաշրջանը
Սերբիայի առաջնությունում «Ցրվենա Զվեզդան» Ստանկովիչի գլխավորությամբ առաջին հանդիպումն անցկացրել է 2020 թվականի փետրվարի 15-ին՝ 2։0 հաշվով հաղթելով «Չուկարիչկիին»։ Այդ մրցաշրջանի գարնանային հատվածում թիմը 7 հաղթանակ է տարել, 2 ոչ-ոքի գրանցել և պարտվել ընդամենը 1 անգամ։ Ինչպես այդ, այնպես էլ հաջորդ երկու մրցաշրջաններում (2020-21թթ․ և 2021-22 թթ․) հռչակվել է Սերբիայի չեմպիոն։ Նախորդ 2 մրցաշրջաններում «Ցրվենա Զվեզդան» դարձել է նաև Սերբիայի գավաթակիր։
Դեյան Ստանկովիչի գլխավորությամբ «Ցրվենա Զվեզդան» 2020 թվականին Եվրոպա լիգայի որակավորման փլեյ-օֆֆ փուլում հաղթահարել է «Արարատ-Արմենիայի» արգելքը և դուրս եկել խմբային փուլ։
Հաշվի առնելով, որ 2020 թվականի սեպտեմբերի վերջին ռմբակոծվել են ՀՀ տարածքում գտնվող Վարդենիսի շրջանի գյուղերը, հանդիպման անցկացումը Հայաստանում նպատակահարմար չի եղել անվտանգության տեսանկյունից:
ՈՒԵՖԱ-ի որոշմամբ, «Արարատ-Արմենիա»-«Ցրվենա Զվեզդա» հանդիպումը կայացել է հոկտեմբերի 1-ին՝ Կիպրոսի մայրաքաղաք Նիկոսիայի GSP մարզադաշտում: Սերբական թիմը հաղթել է 2։1 հաշվով և դուրս եկել Եվրոպա լիգայի խմբային փուլ, որտեղ «Հոֆենհայմի», «Սլովան Լիբերեցի» և «Գենտի» հետ պայքարում, 11 միավորով զբաղեցրել է երկրորդ տեղը՝ 5 միավորով զիջելով գերմանական թիմին։ Եվրոպա լիգայի 1/16 եզրափակչում պայքարը զիջել է «Միլանին»։ Բելգրադում կայացած խաղն ավարտվել է 2։2, իսկ «Սան Սիրոյում»՝ 1։1։ Իտալական թիմը մրցակցի հարկի տակ խփած ավելի շատ գոլերի շնորհիվ անցել է հաջորդ փուլ։
Սերբիայի 2020-21 թթ․ առաջնությունում «Ցրվենա Զվեզդան» անպարտելի է եղել։ Թիմը 38 խաղից հաղթել է 35-ը, 3 հանդիպում էլ ավարտել ոչ-ոքի։
Չեմպիոնների լիգայի 2021-22 թթ․ մրցաշրջանում սերբական թիմը պայքարն սկսել է որակավորման երկրորդ փուլից, որտեղ երկխաղյա դիմակայությունում՝ ընդհանուր 6։2 հաշվով (առաջին խաղը՝ 1։2, երկրորդ խաղը՝ 5։0) հաղթել է ղազախական «Կայրաթին»։
Որակավորման երրորդ փուլում «Ցրվենա Զվեզդան» պայքարը զիջել է այդ մրցաշրջանի հայտնություն դարձած Տիրասպոլի «Շերիֆին» (առաջին խաղը՝ 1։1, երկրորդ խաղը՝ 0։1)։
ՉԼ-ի որակավորման երրորդ փուլում պարտվելով՝ Ստանկովիչի գլխավորած թիմը հայտնվել է Եվրոպա լիգայի որակավորման փլեյ-օֆֆում, որտեղ ուժեղ է գտնվել ռումինական «Կլուժից» (առաջին խաղը՝ 4։0, երկրորդ խաղը՝ 2։1)։
Եվրոպա լիգայի խմբային փուլում հայտնվելը պատահականություն չի եղել։ «Ցրվենա Զվեզդան» նույն խմբում լինելով «Բրագայի», «Միտյուլանդի» և «Լուդոգերցի» հետ, 11 միավորով զբաղեցրել է առաջին տեղը։
1/8 եզրափակչի առաջին խաղում «Ցրվենա Զվեզդան» հյուրընկալվելիս 0։3 հաշվով պարտվել է շոտլանդական «Ռեյնջերսին»։ Պատասխան խաղում սերբական թիմը տանը հաղթել է 2։1 հաշվով, բայց դուրս է մնացել մրցաշարից։
Սերբիայի առաջնության նախորդ մրցաշրջանում «Ցրվենա Զվեզդան» 30 խաղից հաղթել է 26-ում, 3 ոչ-ոքի գրանցել և պարտվել 1 անգամ։
Ընթացիկ մրցաշրջան
«Ցրվենա Զվեզդան» ընթացիկ մրցաշրջանում՝ 21-րդ դարի լավագույն մեկնարկն է գրանցել ներքին առաջնությունում։
Սերբիայի առաջնության ընթացիկ մրցաշրջանի մեկնարկային 4 խաղերում թիմը 4 հաղթանակ է տարել, խփել 17 գոլ և բաց թողել ընդամենը 1-ը։ Վերջին 10 մրցաշրջաններում սա 7-րդ դեպքն է, երբ թիմը հաղթում է առաջնության մեկնարկային 3 խաղերը, սակայն երբեք խփած և բաց թողած գոլերի ավելի լավ տարբերություն չի եղել։
Այս մրցաշրջանի առաջին տուրում թիմը 4։0 հաշվով հաղթել է «Ռադնիչկիին», երկրորդ տուրում՝ 5։0 հաշվով ջախջախել «Կոլուբարային», իսկ երրորդ տուրում՝ 2։1 հաշվով արտագնա հաղթանակ տարել «Մլադոստի» նկատմամբ։ Սերբիայի առաջնության նախորդ տուրում էլ 6 անպատասխան գնդակ է ուղարկել «Ռադնիկի» դարպասը։
Transfermarkt
Transfermarkt-ը «Ցրվենա Զվեզդայի» ֆուտբոլիստների ընդհանուր արժեքը գնահատում է շուրջ 55 մլն եվրո։ Ամենաբարձր տրանսֆերային արժեք ունեցող ֆուտբոլիստը 28-ամյա հարձակողական ոճի կիսապաշտպան Միրկո Իվանիչն (8 մլն եվրո)։ 5 մլն եվրո է գնահատվում հետևյալ ֆուտբոլիստների տրանսֆերային արժեքները՝
Ալեքսանդր Դրագովիչ — 31 տարեկան, կենտրոնական պաշտպան
Ալեքսանդր Կատայ — 31 տարեկան, ձախ վինգեր
Ստրահինյա Էրակովիչ — 21 տարեկան, կենտրոնական պաշտպան
Կազմը
«Ցրվենա Զվեզդայի» հարձակման գծի առանցքային ֆուտբոլիստներն են Միրկո Իվանիչը, Ալեքսանդր Կատայը և Միլան Պավկովը։
Նախորդ մրցաշրջանում Կատայը թիմի լավագույն ռմբարկուն էր՝ 32 գոլ և 14 արդյունավետ փոխանցում բոլոր մրցաշարերում:
«Ցրվենա Զվեզդայի» կազմին ավելի մանրամասն ծանոթացրել է սերբ լրագրող Դարկո Միտրովիչը՝ Armsport-ին տված հարցազրույցում։
«Ցրվենա Զվեզդա» — «Փյունիկ» առաջին հանդիպումը կկայանա վաղը՝ օգոստոսի 3-ին և կմեկնարկի Երևանի ժամանակով 22։45-ին։